Mayın 9-da Azərbaycan Respublikasının Prezidenti Heydər Əliyevin anadan olmasının 80 illiyi münasibətilə Zəngilan rayon ictimaiyyəti nümayəndələrinin təntənəli yığıncağı keçirilmişdir.

Yığıncaqda rayon icra hakimiyyətinin başçısı Vəli Quliyev “Heydər Əliyev Azərbaycan xalqının xilaskarıdır” mövzusunda geniş məruzə etmişdir.

Təntənəli yığıncaqda Milli Məclisin deputatı İmamverdi İsmayılov, YAP rayon təşkilatının sədri Sabir Nəcəfov, mərkəzi rayon xəstəxanasının baş həkimi Eldar Babayev, rayon müharibə və əmək veteranları şurasının sədri Rzaxan Rzayev, rayon əmək və əhalinin sosial müdafiəsi mərkəzinin direktoru Həsən Ələkbərov, “Sevil” qadınlar şurası rayon şöbəsinin sədri Maya Bağırova, rayon təhsil şöbəsinin müdiri Zakir İbrahimov, rayon maliyyə şöbəsinin rəisi Nazir Kərimov çıxış etmişlər.

Məruzə və çıxışlarda dövlətimizin başçısının Vətən və xalq qarşısındakı xidmətləri yüksək qiymətləndirilərək qarşıdan gələn prezident seçkilərində Heydər Əliyev namizədliyi irəli sürülmüş və seçki günü ona yekdilliklə səs verəcəklərini bəyan etmişlər.

Təntənəli yığıncağın sonunda Azərbaycan Prezidenti Heydər Əliyevə müraciət qəbul olunmuşdur.

Müraciətdə deyilir:

Zati-aliləri!

Biz Zəngilan rayon ictimaiyyəti nümayəndələrinin yığıncağı iştirakçıları Sizi 80 illik yubileyiniz münasibətilə ürəkdən təbrik edir, Sizə möhkəm cansağlığı, uzun ömür, müstəqil Azərbaycanımızın durmadan tərəqqi etməsi, xalqımızın firavan yaşaması, demokratik ölkə kimi daha qüdrətli olması naminə apardığınız məqsədyönlü fəaliyyətinizdə yeni-yeni uğurlar arzulayırıq.

Sizin Vətən və xalq qarşısındakı xidmətləriniz, keşmə-keşli müxtəlif hadisələrlə müşayiət olunan həyat yolunuz xalqımızın qəlbinə, Azərbaycanımızın tarixinə qızıl hərflərlə əbədi həkk olunmuşdur. Qərinədən artıq zaman kəsiyində bir dövlət xadimi, dünyəvi siyasətçi kimi göstərdiyiniz fəaliyyət, bu illərdə Azərbaycanın adını bütün dünyada uca zirvələrə qaldırmağınız böyük bir tarixdir. Sizin siyasətdə atdığınız uğurlu addımlar, dövləti idarə etmə məharətiniz, xalqa, Vətənə məhəbbətiniz əvəzsiz bir məktəbdir.

İctimaiyyət, siyasətçilər, dünya dövlətlərinin liderləri çox haqlı olaraq Sizi tarixi şəxsiyyət kimi qəbul edirlər. İstər 1969-1982-ci illərdə Azərbaycan KP.MK-nın birinci katibi, istərsə də 1982-1987-ci illərdə SSRİ Nazirlər Soveti sədrinin birinci müavini vəzifələrində işləyərkən xalqa, Vətənə sədaqətiniz hamıya bəlli olub. Sizin 1993-cü il iyunun 15-də xalqın təkidli tələbi ilə hakimiyyətə ikinci dəfə qayıdışınız isə Azərbaycanın qurtuluşu günü oldu, o gündən etibarən Siz gözlənilən bəlaların, faciələrin qarşısını aldınız.

Hörmətli Prezident!

Tarix boyu Azərbaycanın başına olmazın müsibət gəlmişdir. Doğma torpaqlarımız dəfələrlə təcavüzə məruz qalmışdır. Lakin hər dəfə xalqımız özündə təpər, qüdrət tapmış, dirçəlmişdir. Bu dirçəlişlərin hər birinin öz müəllifi – şəxsiyyəti olmuşdur. XX əsrin Azərbaycana bəxş etdiyi dahi şəxsiyyət isə Sizsiniz.

Doğma torpaqlarımızın nankor ermənilər tərəfindən işğalının qarşısını aldınız, sui-qəsdlər, dövlət çevrilişi törətmək istəyənlərin niyyətlərini vaxtında görüb, bu bəd niyyətlərə yol vermədiniz. Ölkəmizin durmadan inkişafı, xalqın firavan həyatı, qaçqın və məcburi köçkünlərin sosial-məişət şəraitinin yaxşılaşdırılması, dünya standartlarına cavab verən islahatların keçirilməsi sahəsindəki uğurlu addımlarınız bu gün Sizi xalqın gözündə bir daha ucaldır.

Cənab Prezident, bütün xalqımız kimi, biz zəngilanlılar üçün də Siz əziz, doğma və müqəddəs rəhbərsiniz. Sizin ikinci dəfə hakimiyyətə qayıdışınıza qədər Azərbaycana rəhbərlik edənlərin bacarıqsızlığı, laqeyidliyi, səriştəsizliyi üzündən Xocalı faciəsi baş verdi. Lakin Xocalıdan da ağır vəziyyət gözləyən, tam mühasirədə olan zəngilanlıları bilavasitə Sizin uzaqgörən siyasətiniz, dövlətçilik məharətiniz, xalqa məhəbbətiniz faciədən qurtardı, əhali Araz çayından keçib İran İslam Respublikası ərazisindən Vətənə gəldi. Bunun üçün Sizə bir daha dərin minnətdarlığımızı bildiririk.

Sizin səhhətinizlə əlaqədar bir sıra müxalifət qəzetlərində dərc olunmuş iftira dolu, səmimiyyətdən kənar, əxlaq normalarımıza sığmayan yazıları müxalifətin yeni iyrənc təxribatı hesab edirik.

Biz zəngilanlılar həmişə hər yerdə Sizinləyik, daxili və xarici siyasətinizi bəyənirik, onu müdafiə edirik, bu il keçiriləcək prezident seçkilərində Sizin namizədliyinizi irəli sürürük və prezident seçkiləri günü yekdilliklə Sizə səs verəcəyimizi bildiririk.

Əlamətdar yubileyiniz münasibətilə Sizi bir daha təbrik edir, Ulu Tanrıdan cansağlığı arzulayırıq.

(Müraciət Zəngilan rayonu ictimaiyyəti

nümayəndələrinin 2003-cü il mayın 9-da

keçirilmiş təntənəli yığıncağında qəbul

edilmişdir)