Bakı, 18 aprel, AZƏRTAC

Azərbaycan Respublikasının Prezidenti İlham Əliyevin sədrliyi ilə aprelin 17-də Yevlaxda qeyri-neft ixracatçılarının respublika müşavirəsi strateji yol xəritələrində qarşıya qoyulan hədəflərin reallaşmasında mühüm rol oynayacaq. Belə ki, sözügedən müşavirə 2025-ci ilədək qeyri-neft sektoru üzrə adambaşına ixracın ən azı 450 ABŞ dollarına çatdırılacağı və strateji yol xəritələrinin əsas hədəflərindən birinə nail olunacağını bir daha təsdiqlədi.

AZƏRTAC xəbər verir ki, bu barədə İqtisadi İslahatların Təhlili və Kommunikasiya Mərkəzinin eksperti Ramil Hüseyn deyib.

"Bu isə həm qeyri-neft sektoru üzrə məşğulluğun artmasına, yeni iş yerlərinin açılmasına, əhalinin rifah halının yaxşılaşmasına, həm də sahibkarların bu yöndə stimullaşdırılmasına xidmət edəcək. Müşavirə, eyni zamanda, ixracatçıların problemlərinin həllinə, ölkənin ixrac potensialının tam reallaşmasına da təkan verəcək", - deyə R.Hüseyn qeyd edib.

R.Hüseyn deyib: "Azexport" portalının yaradılması da qeyri-neft sektoru üzrə ixracın artmasına xidmət edir. Hazırda bizim regionda "Azexport" portalının analoqu yoxdur. Prezident İlham Əliyevin müşavirədə qeyd etdiyi kimi, "Azexport" portalının yaradılması dövlət tərəfindən sahibkarlara verilən dəstəkdir və bu portala maraq getdikcə artır. Konkret faktlara nəzər salsaq görə bilərik ki, bu portal sahibkarlara ixrac üçün böyük imkanlar yaradır. Qeyd edək ki, bu il aprel ayının ilk yarısına olan məlumata görə, artıq dünyanın 34 ölkəsindən "Azexport" portalına sifariş daxil olub. Bu ölkələrin sırasında ABŞ, Çin, Hindistan, Ukrayna, İspaniya, Səudiyyə Ərəbistanı, Misir, Rusiya, Türkiyə, İran, İraq, Qazaxıstan, Özbəkistan, Danimarka, Fransa, Latviya, Belarus, Moldova, Rumıniya, Tacikistan və s. ölkələr var. Aprel ayının ilk yarısında portal mahlıc, yataq dəsti, mebel, şərab, konyak, quru süd, toyuq yumurtası, nar şirəsi, albalı şirəsi, mineral sular, fındıq ləpəsi və sair məhsullarla bağlı sifarişlər daxil olub. Sifarişləri ölkələr üzrə təhlil etdikdə aydın olur ki, çinli sahibkarlar Azərbaycan fındığına, hindistanlı sahibkarlar nar şirəsinə, qonşu Gürcüstandan olan sahibkarlar isə albalı şirəsinə maraq göstərirlər.

Onu da qeyd edək ki, "Azexport.az" portalı qeyri-neft sektoru üzrə ixracı töhfə verməklə yanaşı, həm də idxalın əvəzlənməsində də rol oynamağa başlayıb. Belə ki, Azərbaycan sahibkarları portal vasitəsilə yerli istehsal müəssisələrinə sifarişlər verirlər. Məsələn, aprelin 18-nə olan sifarişlərə nəzər salsaq aydın olur ki, yerli sahibkarlar portal vasitəsilə 10 min ədəd yumurta sifariş veriblər (Sifariş "Hacıqabul Quşçuluq" MMC-yə yönəldilib).

Göründüyü kimi, aprel ayının 20-də fəaliyyətə başlamasının 4 ayı tamam olacaq "Azexport.az" portalı qeyri-neft sektoru üzrə ixracın artması və idxalın əvəzləməsi sahəsində uğurlara imza atmaqdadır. Qarşıdakı aylardan etibarən məhz www.azexport.az internet portalı vasitəsilə Azərbaycan Respublikasında istehsal olunan malları elektron ticarət qaydasında təqdim edən ixracatçılar icazələri vahid elektron ərizə əsasında elektron qaydada əldə edə biləcəklər. Dövlət tərəfindən "Azexport.az" portal vasitəsilə sahibkarlara verilən bu dəstək onların işini daha da yüngülləşdirəcək.