İQTİSADİYYAT


"Bakutel-2018"də 20 ölkədən 230 şirkət iştirak edəcək

Bakı, 3 dekabr, Elvin Camalov, AZƏRTAC

Dekabrın 4-7-də Bakıda “Bakutel-2018” XXIV Azərbaycan Beynəlxalq Telekommunikasiya, İnnovasiya və Yüksək Texnologiyalar Sərgi-Konfransı keçiriləcək. “Yüksək texnologiyalar həftəsi” çərçivəsində baş tutacaq ənənəvi “Bakutel” sərgisi təkcə informasiya texnologiyaları sahəsində əldə olunan nailiyyətlərin nümayişi ilə məhdudlaşmır. Sərgi işgüzar konfransların, perspektivli əməkdaşlıqların, rəqəmli gələcəyin yeni aspektlərinin formalaşması üçün qlobal platforma rolunu oynayır.

“Bakutel-2018” sərgisi Azərbaycan Respublikası Nəqliyyat, Rabitə və Yüksək Texnologiyalar Nazirliyi, Beynəlxalq Telekommunikasiya İttifaqı (ITU), Regional Rabitə Birliyi (RRB), Azərbaycanda İxracın və İnvestisiyaların Təşviqi Fondu (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) və Azərbaycan Respublikasının Kiçik və Orta Biznesin İnkişafı Agentliyinin dəstəyi ilə keçirilir. Sərginin təşkilatçısı “Caspian Event Organisers” (“CEO”) şirkətidir. Baş sponsor isə iyirmi ildən artıq tədbirin əsas iştirakçılarından olan “Azercell” şirkətidir.

Ənənəvi olaraq, sərgini beynəlxalq mütəxəssislər, İKT qurumların rəhbərləri ziyarət edirlər. Bu il sərginin fəxri qonaqları arasında Rusiya, Türkiyə, Belarus, Əfqanıstan, Qazaxıstan, Qırğızıstan, Türkmənistan, İran, Özbəkistan, Latviya, Bolqarıstanın İKT sahəsi üzrə nazirləri və yüksək rütbəli nümayəndələri yer alıb. AZƏRTAC xəbər verir ki, bunu dekabrın 3-də sərgi ilə bağlı keçirilən mətbuat konfransında “Caspian Event Organisers” şirkətinin direktoru Edvard Stroun bildirib. O, həmçinin məlumat verib ki, builki sərgidə dünyanın 20 ölkəsini təmsil edən 230 şirkət iştirak edəcək, sərgi sahəsi 25 faiz artıb. Sərginin debütantları isə iştirakçıların ümumi sayının 30 faizini təşkil edir. Debütantlar arasında “Silk Way Biznes Aviasiya”, Azərbaycan Dövlət Reklam Agentliyi (ADRA), “Sistematiks” (Rusiya), “Suntech” (Polşa), “Azmonbat” (Azərbaycan), “BMS Global” (Azərbaycan), “Hostimul” (Azərbaycan), “IPG IRE-Polus” (Rusiya), “Xerrow Technologies” (BƏƏ) və digərləri yer alır.

Nəqliyyat, rabitə və yüksək texnologiyalar nazirinin müavini Elmir Vəlizadənin sözlərinə görə, sərgidə 10 ölkə – ABŞ, Türkiyə, Belarus, Birləşmiş Ərəb Əmirlikləri, Fransa, İtaliya, Polşa, Xorvatiya, İran, Sloveniya milli pavilyonla təmsil olunacaq. Sərgi çərçivəsində Nəqliyyat, Rabitə və Yüksək Texnologiyalar Nazirliyinin tabeli qurum və müəssisələri eyni milli pavilyonda məhsul və xidmətlərini, həyata keçirdiyi layihələri təqdim edəcəklər. Pavilyonda telekommunikasiya, poçt, yüksək texnologiyalar, o cümlədən nanotexnologiyalar, “Elektron imza” infrastrukturu, “Data Mərkəzi”n “bulud” texnologiyası əsasında xidmətləri üzrə həyata keçirilən layihələr və əldə edilmiş ən son nailiyyətlər, eləcə də nazirlik tərəfindən dəstək alan bir sıra startap layihələr nümayiş olunacaq. Həmçinin kompleksin ikinci zalındakı ayrıca stenddə e-ticarət (“e-commerce”) müəssisələri fəaliyyət göstərəcək.

Nazir müavini qeyd edib ki, sərginin keçiriləcəyi günlərdə Azərbaycanda poçt rabitəsinin 200 illik yubileyinə həsr olunmuş muzey fəaliyyət göstərəcək. Burada poçt tarixinə aid eksponatlar, məktublar, teleqramlar, rabitə qurğuları, komutator telefonları, “Morze” əlifbası, sahənin dövrlər üzrə rəsmi sənədləri, poçt və rabitə işçisinin geyim formaları, istifadə etdiyi əşyalar, bağlama, məktub, kiçik paketlər və banderol nümunələri nümayiş olunur. Eyni zamanda, II Dünya müharibəsi illərinə aid poçt göndərişləri, əsgər məktubları, poçt qutuları, ötən əsrin 70-80-ci illərinə təsadüf edən poçt nümunələri sərgilənir. Həmçinin ulu öndər Heydər Əliyevin hakimiyyəti dövründə poçt sahəsinin inkişafını xarakterizə edən xüsusi güşə fəaliyyət göstərəcək. “Azərpoçt” MMC-nin stendində sərginin bütün iştirakçıları üçün hədiyyəli lotereya keçiriləcək.

E.Vəlizadə bildirib ki, “bu il sərginin işgüzar proqramı yenilənərək daha dolğun olacaq. Peşəkar işgüzar tədbirlər artıq dekabrın 3-dən start götürür. Proqramın açılışı Regional Rabitə Birliyinin Rabitə Administrasiyaları Rəhbərləri Şurasının 54-cü toplantısı ilə baş tutub. Bunun ardınca Qara Dəniz İqtisadi Əməkdaşlıq Təşkilatına üzv dövlətlərin İKT nazirlərinin yüksək səviyyəli görüşü keçiriləcək. Daha sonra estafeti dekabrın 5-də “Davamlı inkişaf üçün rəqəmsal əməkdaşlıq” mövzusuna həsr olunmuş Birinci Xəzər İnnovasiya Konfransı qəbul edəcək. Belarus-Azərbaycan 4-cü İKT Forumu da dekabrın 5-də planlaşdırılıb.

“Xəzər İnnovasiya Konfransının keçirilməsinin təşəbbüskarı Azərbaycan Respublikası Nəqliyyat, Rabitə və Yüksək Texnologiyalar Nazirliyidir. Tədbir “Genişzolaqlı rabitə”, “Süni intellekt”, “Əşyaların İnterneti”, “Elektron xidmətlər”, “İKT yönlü startaplar və innovativ sahibkarlıq”, “Dördüncü sənaye inqilabı”, “Elm tutumlu istehsal” və “Kiberhazırlıq” kimi mövzuları əhatə edir. Birinci Xəzər İnnovasiya Konfransı hökumət nümayəndələri, sənaye liderləri, tənzimləyici struktur və beynəlxalq təşkilatların rəsmi təmsilçilərini, o cümlədən nəhəng regional telekommunikasiya və peyk operatorlarının rəhbərlərini bir araya gətirəcək. Konfrans İKT sahəsinin bütün iştirakçıları arasında səmərəli əməkdaşlığın müzakirə edilməsi üçün regional platforma funksiyasını yerinə yetirəcək, eləcə də bu sahədə tapşırıqların həllinə kömək edəcək. Gələcəkdə bu konfransın beynəlxalq “Bakutel” sərgisi çərçivəsində hər il keçirilməsi planlaşdırılır”, - deyə nazir müavini vurğulayıb.

Sərginin meneceri Emiliya İsmayılova isə sərgi çərçivəsində qadınlar və onların İKT sahəsindəki roluna xüsusi diqqət yetirib. Bildirib ki, tədbirin ikinci iş günü eksponentlərin iştirakı ilə keçiriləcək axşam ziyafəti çərçivəsində Azərbaycanın informasiya və telekommunikasiya texnologiyaları sahəsində çalışan ən uğurlu qadınlara “AWITA 2018” “Azerbaijan - The Women in IT Award” mükafatının təqdimetmə mərasimi baş tutacaq.

Onun sözlərinə görə, bu il təşkilatçılar sərgi çərçivəsində ilk dəfə olaraq yeni müzakirə platforması “Bakutel Tech Talks” proqramını təşkil edəcək. Dekabrın 5-6-da “Bakutel Tech Talks” tədbiri bir sıra faydalı məlumatlar və qeyri-adi məzmunu ilə auditoriyanın diqqətini cəlb edəcək. Dekabrın 5-də “Bizimkilər” sessiyası keçiriləcək. Sessiyanın adını şərtləndirən amil dünyaca məşhur olan xarici IT şirkətlərində çalışan həmvətənlərimizin spikerlər qismində çıxış etməsidir. “Bizimkilər” sessiyasının məqsədi tədbirə toplaşan auditoriyanı nəhəng beynəlxalq IT şirkətlərinin təcrübəsi, eləcə də sənaye yenilikləri və istehsal sirləri ilə tanış etməkdir.

Tədbirdə “Kompüter obrazlarının tanınması üzrə kompleks təlim”, “Müasir kompleks proqram təminatı mühəndisliyi”, “Sosial robotlar, onların layihələndirilməsi üzrə təmayüllər, eləcə də sosial robotların qlobal bazara daxil edilməsinin mümkün nəticələri”, “Süni İntellekt Tibdə və Elmdə: Bilinən bilinməyənlər, süni intellektin məhdudiyyətləri və mümkün gələcəyi”, “Onlayn platformalarda individual tövsiyə sistemləri: Müasir dövrdə proqram təminatının işlənib hazırlanması və onun nəticələri üzrə praktiki nümunənin araşdırılması” üzrə məruzələr təqdim ediləcək.

Dekabrın 6-da “Bakutel Tech Talks” proqramı “Baxış bucağınızı bizimlə IT-iləyin” şüarı altında panel müzakirələr ilə davam edəcək. Burada əsas ideya teleradio yayım, nəqliyyat, təhsil və turizm kimi müəyyən sahələrdə tələb olunan IT texnologiyalar və həll variantlarının göstərilməsidir. Tədbirin məqsədi rəqəmli innovasiyaların istehlakçıları və təchizatçıları arasında dialoq qurmaqdır.

Elə həmin gün “Bakutel Tech Talks” öz işini “Startap-dan böyük biznesə” sessiyası ilə davam etdirəcək. Startap və gənc iş adamlarının dəvət olunduğu bu sessiyada təcrübəli məruzəçilər dinləyiciləri istənilən ideyanı reallaşdırmağın mümkün olduğuna əmin etməyə çalışacaqlar. Beləliklə, “Tech Talks” proqramında sənayenin ən aktual məsələlərinə toxunulacaq və tədbir ideya rəhbərləri ilə müzakirələr üçün müasir təmayüllü platformaya çevriləcək. Bundan sonra hər il sərgi çərçivəsində “Tech Talks” proqramının keçirilməsi planlaşdırılır.

E.İsmayılova qeyd edib ki, ilk dəfə olaraq “Bakutel” sərgisində alman alimlərinin ixtirası olan ultramodern texnologiyası əsaslı “RoboKeeper” təqdim olunacaq. “RoboKeeper” - dünyanın ən sürətli qapıçısı hesab edilir. Hətta Neymar, Messi və Ronaldinyo kimi dünya futbol ulduzları bu qapı keşikçisini məğlub edə bilməyiblər.

“Bakutel 2018” sərgisinin ziyarətçiləri və qonaqları “RoboKeeper”ə qol vurmaqda özlərini sınaya biləcəklər. Oyun iştirakçılarına vurduqları hər bir qola görə müxtəlif hədiyyələr təqdim ediləcək. “Bakutel-2018” sərgisinin açılış mərasiminə Azərbaycan klublarının tanınmış futbolçuları, həmçinin Azərbaycan yığmasının baş məşqçisi Qurban Qurbanov dəvət olunublar. Onlar ən sürətli qapıçının qapısına qol vurmağa cəhd edəcəklər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.