Quba, 28 mart (AZƏRTAC). Xəbər verdiyimiz kimi, Martın 28-də Amerika Birləşmiş Ştatlarının Azərbaycandakı səfiri Riçard Morninqstar Quba rayonuna səfər etmişdir.

AZƏRTAC xəbər verir ki, Quba Rayon İcra Hakimiyyətində keçirilmiş görüşdən sonra Riçard Morninqstar ötən əsrin əvvəllərində ermənilərin azərbaycanlılara qarşı törətdikləri soyqırımının bariz nümunəsi olan Quba kütləvi məzarlığını ziyarət etmişdir.

Günün ikinci yarısında isə səfir və xanımı Feyt Pirs Morninqstar xalçaçılıq müəssisəsində və dağ yəhudilərinin yığcam yaşadıqları Qırmızı qəsəbədə olmuşlar.

Xalça emalatxanasında toxumanın qədim texnologiyasının, tarixi kompozisiyaların və təbii boyaqların əldə edilməsi üsullarının günümüzə kimi qorunub saxlanılması qonaqların diqqətini cəlb etmişdir.

Bundan sonra Riçard Morninqstarın və səfirlik nümayəndələrinin iştirakı ilə dağ yəhudilərinin yığcam yaşadıqları Qırmızı qəsəbədəki İsaak Xanukov adına 1 nömrəli məktəbdə görüş olmuşdur.

Görüşdə çıxış edən dağ yəhudiləri dini icmasının üzvləri, eləcə də qəsəbə sakinləri Azərbaycanda bütün dinlərin nümayəndələri, o cümlədən müsəlmanlar, yəhudilər və xristianlar arasında çox gözəl münasibətlərin olduğunu bildirmiş, ölkəmizin dini dözümlülük, qarşılıqlı sayğı və tolerantlıq baxımından dünyanın bütün dövlətlərinə nümunə ola biləcəyini vurğulamışlar.

Səfir Riçard Morninqstar ölkəmizin şimal bölgəsinə səfəri çərçivəsində martın 29-da Xaçmaz rayonunda da bir sıra görüşlər keçirəcəkdir.