Tbilisi, 17 yanvar (AZƏRTAC) Yanvarın 17-də Yerevana səfər etmiş Gürcüstanın Baş naziri Bidzina İvanişvili Abxaziya dəmir yolunun açılmasına razı olduğunu, lakin buna 3 dövlətin siyasi iradəsinin lazım gəldiyini bildirmişdir.

Bu məsələyə münasibət bildirən Gürcüstan Prezidenti Mixeil Saakaşvili jurnalistlərə demişdir ki, Baş nazirin bu bəyanatı bir neçə amil baxımından təhlükəlidir. Bu bəyanatda geosiyasi və siyasi-strateji maraqlar nəzərə alınmamışdır. Prezident qeyd etmişdir ki, vaxtilə bu dəmir yolu Rusiya vasitəsilə Gürcüstanın Avropaya çıxmasına şərait yaratmışdı, lakin indi həmin yol köhnəlmişdir, Gürcüstanın artıq buna ehtiyacı yoxdur.

M.Saakaşvili demişdir ki, əvvəllər başqa dəmir yolumuz yox idi, lakin Rusiya bizi blokadaya aldıqdan sonra Azərbaycanla yeni - daha sürətli, müasir Qars-Axalkalaki dəmir yolunu tikməyə başladıq. Bu gün Abxaziya dəmir yolunun bərpası Gürcüstan üçün vacib deyildir. Rusiya üçün isə Qars-Axalkalaki dəmir yolu Transsibir yoluna rəqibdir. M.Saakaşvili bildirmişdir ki, kim Abxaziya dəmir yolunun açılmasına tərəfdar olduğuna dair bəyanat verirsə, o, Abxaziyanın müstəqilliyini gerçəkləşdirməyə çalışır.

Prezident demişdir ki, Gürcüstan Ermənistanla yaxşı əlaqələr yaradılmasını arzulayır. Biz Gürcüstan ərazisindən Ermənistana yük daşınması sahəsində çox iş görmüşük, buna görə hətta Rusiya ilə Yuxarı Lars gömrük-buraxılış məntəqəsini də açmışıq.

M.Saakaşvili, həmçinin Azərbaycanın Gürcüstanın strateji tərəfdaşı olduğunu da diqqətə çatdırmışdır.

Gürcüstan parlament azlığının nümayəndələri Abxaziya dəmir yolunun açılmasına razılığını bildirən Bidzina İvanişvilinin bəyanatını məsuliyyətsiz bəyanat adlandırmış və bunun rəsmi Tbilisinin Abxaziyanın müstəqilliyini tanıması demək olduğunu qeyd etmişlər. Gürcü ekspertlərin bəzilərinin qənaətincə dəmir yolunun açılması ölkə iqtisadiyyatının inkişafına xidmət göstərəcəkdir. Bəzi ekspertlər isə bunun Azərbaycan Respublikasının Gürcüstana qarşı haqlı narazılığına səbəb olacağına əmindirlər. Digər qrup ekspertlər isə Baş nazir Bidzina İvanişvilinin Yerevana səfərdən qayıtdıqdan sonra bu bəyanatı başqa cür şərh edəcəyini demişlər.

İslam Əliyev

AZƏRTAC-ın xüsusi müxbiri

Tbilisi