Quba, 16 sentyabr, Elxan Yusifli, AZƏRTAC

Azərbaycan Dövlət Pedaqoji Universitetinin Quba filialında Vətən müharibəsi şəhidi Nuran Akif oğlu Mirzəyevin adına yaradılan ingilis dili auditoriyasının açılışı olub.

AZƏRTAC-ın bölgə müxbiri xəbər verir ki, auditoriyada şəhidin həyat və döyüş yoluna, Müzəffər Ali Baş Komandan İlham Əliyevə və Quba rayon şəhidlərinə həsr olunan stendlər yer alır.

Auditoriyanın açılışında ADPU-nun Quba filialının direktoru dosent Yusif Alıyev, şəhidin ailə üzvləri, şair Ramiz Qusarçaylı, Quba rayon Ağsaqqallar Şurasının sədri İldırım Məmmədov, filialın struktur rəhbərləri, müəllim və professor heyəti və tələbələr iştirak ediblər.

Tədbirdə şəhidlərin əziz xatirəsi bir dəqiqəlik sükutla yad olunub.

Çıxış edənlər şəhid Nuran Mirzəyevin döyüş yolundan, qəhrəmanlıqlarından danışıblar.

Şəhid Nuran Mirzəyev 1999-cu il iyulun 27-də Quba rayonunun Qımıl kəndində anadan olub. Həqiqi hərbi xidmətini iki il əvvəl başa vuran Nuran səfərbərlik çağırışı əsasında Vətən müharibəsinə yollanıb. O, Füzuli, Cəbrayıl, Qubadlı uğrunda gedən döyüşlərdə qəhrəmanlıqla döyüşüb. 21 yaşlı qəhrəman 2020-ci il oktyabrın 19-da Qubadlı istiqamətində şəhidlik zirvəsinə ucalıb.

Ölümündən sonra "Vətən uğrunda", "Cəbrayılın azad olunmasına görə", "Qubadlının azad olunmasına görə", "Hərbi xidmətdə fərqlənməyə görə" medalları ilə təltif olunub.

Nuran Mirzəyenin valideynləri şəhidin adına layiq auditoriyanın hazırlanaraq tələbələrin ixtiyarına verilməsinə görə filialın rəhbərliyinə minnətdarlıqlarını bildiriblər.