Ağdaşda yaz əkinlərinə ciddi hazırlıq işləri görülür, suvarma arxları lildən təmizlənir
Ağdaş, 11 mart (AZƏRTAC). Yaz fəsli ərəfəsində Ağdaşın kəndlərində işlərin qızğın çağıdır. Rayon icra hakimiyyətindən AZƏRTAC-a bildirmişlər ki, hazırda kəndlərdə meyvə-tərəvəz məhsullarının yetişdirilməsi üçün torpaq sahələri şumlanaraq əkinə hazırlanır, əraziyə üzvü və mineral kübrələr səpilir. Kəndlərdə quraşdırılan istixanalarda pomidor və xiyar şitilləri yetişdirilir, kartof və kələm əkini, yonca səpini davam etdirilir, yeni meyvə bağları salınır.
Yaz-yay fəsillərində əkin sahələrinin suvarma suyuna olan tələbatının normal ödənilməsi üçün hazırda arxların lil və çöküntülərdən təmizlənməsi işləri davam etdirilir. Ağdaş rayon Suvarma Sistemləri İdarəsinin maşın və mexanizmləri hazırda 8 kəndin suvarma arxının yenidən qazılmasına cəlb olunmuşdur. Ötən iki ayda 10 kilometrdən çox arx lildən təmizlənmişdir. Bundan əlavə ayrı-ayrı kəndlərin bələdiyyələri yerli əhalinin iştirakı ilə iməciliklər keçirməklə fərdi həyətyanı sahələrdən və pay torpaqlarından keçən daxili arxları əl ilə qaydaya salırlar.
Bölmənin digər xəbərləri
