DÜNYA
Aİ Şurası 2014-cü ildə Avropa İttifaqı məmurlarının əməkhaqlarını və pensiyalarını dondurmuşdur
Bakı, 11 oktyabr (AZƏRTAC). Avropa İttifaqının Nazirlər Şurası büdcə vəsaitinə qənaət məqsədi ilə Avropa İttifaqı təsisatları məmurlarının əməyinin ödənişində dəyişikliklər etmişdir.
Bunu Aİ Şurasının mətbuat xidmətinin nümayəndəsi bildirmişdir.
Qəbul olunmuş qərarda 2014-2020-ci illərin maliyyə dövrü üçün əməkhaqqı və pensiya ödənişlərinin dondurulması tətbiq edilir. Mətbuat xidməti nümayəndəsinin sözlərinə görə, 2015-ci ildən başlayaraq Avropa məmurlarının əməkhaqları və pensiyaları təshih ediləcəkdir, onların alıcılıq qabiliyyəti isə Aİ-nin 11 ölkəsinin - Belçika, Almaniya, İspaniya, Fransa, İtaliya, Lüksemburq, Niderland, Avstriya, Polşa və Böyük Britaniyanın hökumət məmurları barəsində tətbiq edilən formul üzrə hesablanacaqdır.
Agentliyin nümayəndəsi demişdir: “Yeni qərarda nəzərdə tutulur ki, Aİ-də ümumi daxili məhsul 3 faizdən çox azalarsa, əmək haqqı artırılmır”.
O həmçinin bildirmişdir ki, 2014-cü il yanvarın 1-dən Aİ təsisatlarının məmurları üçün 6 faiz həcmində “həmrəylik” vergisi qoyulacaqdır, yüksək pillənin rəsmi şəxsləri üçün isə bu göstərici 7 faiz təşkil edəcəkdir.
Bundan başqa, Avropa məmurlarının iş həftəsi müddətinin kompensasiya ödənilmədən 37,5 saatdan 40 saatadək artırılması nəzərdə tutulmuşdur. Pensiya yaşı 63 yaşından 65 yaşınadək artırılır. Özü də Aİ Şurası mətbuat xidmətinin əməkdaşı bildirmişdir ki, məmur “işin xeyrinə” 67 yaşınadək, müstəsna hallarda isə 70 yaşınadək işləyə bilər. O bildirmişdir ki, bundan başqa, 2013-2017-ci illər dövründə Aİ təsisatları işçilərinin ştatını 5 faiz azaltmaq qərara alınmışdır.
Aİ qulluqçusunun minimum əmək haqqı ayda 2600 avro, maksimum əməkhaqqı isə 18000 avro təşkil edir. 55 min nəfərdən ibarət bürokratik maşının saxlanmasına, müxtəlif məlumatlara görə, Avropa İttifaqının büdcəsindən 3 faizdən 6 faizədək vəsait sərf olunur.
İslahatdan narazı olan, böhranla əlaqədar artıq bu ildən əmək haqqı indeksasiyası dondurulmuş Avropa məmurları Brüsseldə dəfələrlə tətillər keçirmişlər.