SİYASƏT
AMERIKANIN AZƏRBAYCAN CƏMIYYƏTININ MÜRACIƏTI
İran hərbi qüvvələrinin Xəzər dənizində Azərbaycan gəmisinə qarşı təxribat xarakterli hərəkətləri ABŞ-ın azərbaycanlı icmasının da kəskin etirazına səbəb olubdur. Nyu-Cersidə yerləşən Amerikanın Azərbaycan Cəmiyyəti yaydığı mətbuat məlumatında iyulun 23-də Xəzərdə baş vermiş hadisəni və iyulun 29-na İİR-in Qanunvericilik Şurasının katibi Rezainin müstəqil Azərbaycan barədə dediklərini dəstəkləməsini beynəlxalq münasibətlərdə qəbul edilməz hesab edir. Həmvətənlərimiz ABŞ prezidentini, Dövlət Departamentini və Konqresi Xəzər regionunda baş verənlərə və xüsusilə də, Azərbaycana qarşı yönələn hərəkətlərə münasibət bildirməyə çağırır. Cəmiyyətin üzvləri onu da xatırladırlar ki, 1991-ci ildən müstəqilliyini bərpa edən və 1992-ci ilin martından BMT-nin üzvü olan Azərbaycan Respublikası son 10 ildə qonşu İranla dostluq münasibətləri qurmağa çalışır. Amerikada yaşayan həmvətənlərimiz ölkəmizin ABŞ və Avropanın neft şirkətləri ilə birlikdə Xəzərin Azərbaycan sektorundakı yataqları işlətdiyini vurğulayır və bildirirlər ki, İran hökumətinin bu cür gözlənilməz hərəkətləri, bəyanatları və hərbi hədələri beynəlxalq hüquq normalarını birmənalı olaraq pozur. Amerikanın Azərbaycan Cəmiyyəti Konqres tərəfindən İrana qarşı tətbiq edilən sanksiyaların davam etdirilməsini dəstəkləyərək, ABŞ-ı və digər dövlətləri bütün mümkün vasitələrlə İranı qonşularının ərazi bütövlüyünə və müstəqilliyinə hörmətlə yanaşmağa vadar etməyə çağırır.
Şəfəq Akifqızı
AZƏRTAC-ın xüsusi müxbiri
Vaşinqton