SİYASƏT
“AQO” MONİTORİNQ QRUPUNUN SƏDRİ AZƏRBAYCANDA HƏYATA KEÇİRİLƏN DEMOKRATİK İSLAHATLAR PROSESİNDƏ POLİS ORQANLARININ BUNDAN SONRA DA FƏAL İŞTİRAK EDƏCƏYİNƏ ƏMİNLİYİNİ BİLDİRMİŞDİR
Bakı, 24 noyabr (AZƏRTAC). Azərbaycan Respublikası Daxili İşlər Nazirliyinin mətbuat xidmətindən bildirmişlər ki, noyabrın 24-də nazir, general-polkovnik Ramil Usubov ölkəmizdə səfərdə olan Avropa Şurası Nazirlər Komitəsinin “Aqo” monitorinq qrupunun üzvləri ilə görüşmüşdür.
Qonaqlara Daxili İşlər Nazirliyinin funksiyası barədə qısa məlumat verən Ramil Usubov qeyd etmişdir ki, Azərbaycan Respublikası Prezidentinin rəhbərliyi altında ölkəmizdə dövlət müstəqilliyinin, demokratik prinsiplərin möhkəmlənməsi, hüquqi, dünyəvi dövlət quruculuğu işləri, ictimai münasibətləri tənzimləyən hüquqi mexanizmlərin təkmilləşməsi prosesi uğurla davam edir. Həyata keçirilən genişmiqyaslı sosial, iqtisadi və demokratik hüquqi islahatlar çərçivəsində Daxili İşlər Nazirliyinin fəaliyyətinin beynəlxalq norma və standartlara uyğun təkmilləşdirilməsi üzrə də əhəmiyyətli işlər görülmüş, bir sıra normativ aktlar və sənədlər, o cümlədən qanunlar qəbul olunmuşdur. Polisin fəaliyyətinin cəmiyyətdə baş verən demokratik dəyişikliklərə uyğunlaşdırılması istiqamətində həyata keçirilmiş tədbirlər nəticəsində xidmətin səmərəliliyi, demokratik prinsiplərə, insan hüquq və azadlıqlarına riayət olunması daha da artmışdır.
Daxili işlər naziri xüsusi vurğulamışdır ki, islahatların aparılması və struktur dəyişiklikləri insan hüquq və azadlıqlarına, qanunun aliliyinə riayət olunmasını prioritet istiqamətə çevirmişdir. Cəmiyyətdə insan faktorunun başlıca rol oynaması baxımından onların hüquq və azadlıqlarının hüquqazidd əməllərdən qorunması əsas vəzifə hesab edilərək bu yönümdə məqsədyönlü təşkilati-praktiki tədbirlər həyata keçirilir. Qarşıda duran perspektivlərə nail olmaq üçün həmin tədbirləri əhatə edən ayrı-ayrı xüsusi planlar işlənib hazırlanmışdır ki, burada da kadrların peşəkarlıq, idarəçilik qabiliyyəti, mövcud qanunların tələblərinə uyğun fəaliyyət göstərmə bacarığı, şəxsi-mənəvi keyfiyyətləri kimi meyarlar əsasında seçilməsi, habelə fəaliyyəti tənzimləyən hüquqi bazanın təkmilləşdirilməsi öz əksini tapmışdır. Daxili işlər orqanlarının şəxsi heyəti arasında mənəvi-psixoloji durumun möhkəmləndirilməsi, kadrların bəşəri əxlaqi dəyərlər, habelə BMT-nin “Hüquq-mühafizə orqanlarının Davranış Məcəlləsi” və “Polis etikası haqqında Avropa Məcəlləsi”ndə təsbit olunmuş prinsiplər əsasında formalaşdırılması işinin təkmilləşdirilməsi baxımından “Daxili işlər orqanları əməkdaşlarının etik davranış kodeksi” qəbul edilmişdir.
Qeyd olunmuşdur ki, müasir tələblərə tam cavab verə bilən polis əməkdaşının formalaşdırılmasına böyük əhəmiyyət verilir. Bu baxımdan qabaqcıl təcrübənin öyrənilməsi və tətbiqi məqsədi ilə son 10 ildə daxili işlər orqanlarının mindən çox əməkdaşı BMT, Avropa Şurası, ATƏT və digər beynəlxalq təşkilatların xətti ilə müxtəlif ölkələrdə, o cümlədən ABŞ-da, Almaniya, Avstriya, Fransa, Macarıstan və s. Avropa dövlətlərində, Türkiyə, Çin və Misir Ərəb Respublikasında təşkil olunmuş 100-dən çox forum, müşavirə, treninq, seminar və təlimlərdə iştirak etmişdir. Polisin gündəlik işində insan hüquqlarına riayət olunması, demokratik dəyərlərin möhkəmləndirilməsi yollarının öyrənilməsi problemlərinə həsr edilmiş belə seminarlar və elmi-praktik konfranslar ölkəmizdə də keçirilir. Avropa Şurası və ATƏT-in xətti ilə müxtəlif mövzuları əhatə edən 100-dən çox seminarda 2 min 300-dən artıq əməkdaş iştirak etmişdir. Eyni zamanda, müxtəlif qeyri-hökumət təşkilatları və Beynəlxalq Qızıl Xaç Komitəsinin xətti ilə təşkil olunan seminar və təlim kurslarına 450-dən artıq əməkdaş cəlb olunmuşdur.
Ramil Usubov bildirmişdir ki, beynəlxalq təşkilatlarla aparılan birgə işlərin nəticəsi olaraq, insan və vətəndaş hüquq və azadlıqlarına riayət olunması üzrə Xüsusi Tədris Proqramı hazırlanmışdır və bu sənəd əsasında Polis Akademiyasında, habelə şəxsi heyətin xidməti hazırlıq dərslərində seminarlar keçirilir.
Müasir dövrdə kütləvi informasiya vasitələrinin cəmiyyətin həyatındakı roluna toxunan nazir KİV-lə qarşılıqlı əlaqələrin, işgüzar münasibətlərin genişləndirilməsinə xüsusi diqqət yetirildiyini bildirərək, bu sahədə görülən işlər barədə məlumat vermişdir.
Təəssüflə qeyd olunmuşdur ki, həyata keçirilən bütün zəruri tədbirlərə baxmayaraq, ayrı-ayrı əməkdaşların xidməti fəaliyyətində hələ də müxtəlif qanun pozuntularına, nöqsan və çatışmazlıqlara da rast gəlinir. Məhz elə bu səbəbdən müxtəlif hüquqpozmalara görə onlarla əməkdaş cəzalandırılmış, hətta cinayət məsuliyyətinə cəlb edilmişdir.
Monitorinq qrupunun sədri Stelian Stoyan səmimi qəbula və ətraflı məlumata görə təşəkkür edərək, Azərbaycanda görülən işlərdən məmnunluq duyduğunu, Avropa Şurasının dəstəyi ilə ölkəmizdə həyata keçirilən demokratik islahatlar prosesində polis orqanlarının bundan sonra da fəal iştirak edəcəyinə əminliyini bildirmişdir.
Görüşdə bir sıra digər məsələlər də müzakirə olunmuşdur.