Bakı, 21 iyun (AZƏRTAC). Bir neçə gün bundan əvvəl İsrail Knessetinin ümumi iclasında “erməni soyqırımı” ilə əlaqədar ictimai dinləmələr olmuşdur. İclasın gedişində parlamentin müxtəlif fraksiyalarının nümayəndələri “erməni soyqırımının” tanınmasına tərəfdar çıxmışlar.

AZƏRTAC xəbər verir ki, Knessetin iclasını öz bloqunda şərh edən “İsrail-Azərbaycan” Beynəlxalq Assosiasiyasının (AZİZ) İdarə Heyətinin üzvü, beynəlxalq münasibətlər sahəsində ekspert Arye qeyd etmişdir: “Təəssüf ki, bu məsələ İsrailin erməni icması tərəfindən irəli sürülən və İsrailin bir sıra deputatları tərəfindən dəstəklənən siyasi fitnəkarlıq predmetidir”.

A.Qut yazır: “Bu, faktdır ki, “erməni soyqırımının” rəsmən tanınması onsuz da mürəkkəb və gərgin olan Türkiyə-İsrail münasibətlərini sarsıdacaq, hətta məhv edəcəkdir. Türk və yəhudi xalqları arasında qarşılıqlı münasibətlərin və qarşılıqlı anlaşmanın 500 illik zəngin tarixi vardır. Tarixi faktları unutmaq olmaz. Vaxtilə türk sultanı İspaniya yəhudilərinə hər cür vətəndaş hüquqları verməklə onları tam məhv olmaqdan xilas etmişdi. İkinci Dünya müharibəsi zamanı, Avropada yəhudilər dəhşətli, vəhşi qırğına məruz qaldıqda Türkiyə yəhudiləri qoruyub xilas etmişdi”.

Arye Qutun fikrincə, “erməni soyqırımının” tanınması İsrailin Azərbaycanla münasibətlərini ciddi şəkildə sarsıdacaqdır.

A.Qut demişdir: “Hazırda Azərbaycan Cənubi Qafqazın ciddi geosiyasi və geoiqtisadi perspektivləri olan əsl regional lideridir. 20 il ərzində İsrailin Azərbaycanla çox ciddi strateji tərəfdaşlıq münasibətləri yaranmışdır. Bu gün İsrailin xeyli sayda iri şirkətləri Azərbaycanda yüksək texnologiyalar, telekommunikasiyalar, neft-qaz, tibb, kənd təsərrüfatı kimi müxtəlif sahələrdə çalışır. Ölkələr arasında ticarət dövriyyəsinin həcmi təqribən 5 milyard dollara çatır”.

A.Qut İsrail üçün Azərbaycanın strateji əhəmiyyətindən danışarkən Azərbaycanda 20 min nəfərlik yəhudi icmasının olduğunu qeyd etmişdir.

A.Qut öz bloqunda yazır ki, təkcə son illərdə Azərbaycan dövləti öz hesabına yəhudi icması üçün iki ən müasir sinaqoq tikmiş, Cənubi Qafqazda ən böyük yəhudi təhsil mərkəzi yaratmışdır. İsrail politoloqu yazır: “Dünyada mənə, fərqi yoxdur, xristian və ya müsəlman olsun, elə bir dövlət göstərin ki, öz hesabına sinaqoq tikmiş olsun. Bu, Azərbaycan dövlətinin və onun rəhbərliyinin yəhudi xalqına və İsrail dövlətinə rəğbətini bir daha sübut edir”.

A.Qut yazır: “İndi gəlin, Ermənistanın özündəki vəziyyətə baxaq. Bu gün Ermənistanın yəhudi icmasının sədri Rimma Varjapetyan belə vəziyyətdə Ermənistanı nə qədər müdafiə etməyə cəhd göstərsə də, həqiqətin gözünə dik baxmaq lazımdır. Biz hamımız gözəl bilirik ki, xanım Varjapetyan monoetnik bir ölkəni müdafiə edir, burada şovinizm və millətçilik adamlara ana südü ilə keçir. Demək olar ki, hər il Yerevanda günahsız Xolokost qurbanlarının abidəsi təhqir olunur. Bu, təsdiq edir ki, Xocalıda azərbaycanlıların soyqırımı hazırda Ermənistanın hakim güruhunun təbliğ etdiyi faşist etnik təmizləmə ideologiyasının nəticəsi olmuşdur. Bu güruh azərbaycanlıları öz doğma torpaqlarından qovaraq çoxlu qan bahasına monoetnik dövlət yarada bilmişdir. Ermənistandan 200 min azərbaycanlı amansızlıqla qovulmuşdur, orada rus və yəhudi demək olar ki, qalmamışdır. Təbii olaraq belə bir sual meydana çıxır: “Nə üçün yəhudi icmasının liderindən başqa erməni siyasətinin qaymaqlarından heç kəs bu erməni faşistlərin hərəkətlərini pisləməmişdir”.

İsrail eksperti yazır ki, 7 il bundan əvvəl Ermənistanın paytaxtında erməni gənclərin Osmanlı imperiyasında “erməni soyqırımının” 90-cı ildönümünə həsr olunmuş məşəl yürüşü olmuşdu. İzdiham Yerevanın mərkəzi küçələrinədək gedib çıxmışdı. Daşnaksutyun gənclər təşkilatının üzvləri Matenadaranın önündə İsrail bayrağını yandırmışdılar. Üzərində Davud ulduzunun təsviri olan ağ-mavi bayrağın nə indiki Türkiyə bayrağına, nə də Osmanlı imperiyasına heç bir aidiyyəti yox idi. Xüsusilə, qeyd etmək lazımdır ki, erməni xalqı nasistlərin məşəl yürüşlərinə bənzər hərəkətlər edən bu “gənclərlə” fəxr edir. Belə hal demək olar ki, hər il təkrarlanır. Faktlardan qaçmaq lazım deyil. Xolokost qurbanlarının xatirəsinə yaradılmış memorial daşın üzərində də faşist nişanı çəkilmişdir. Lakin bu dəfə vandallar bununla kifayətlənməmişlər. Ermənilər belə bir fikirlə razılaşa bilmirlər ki, Avropa yəhudilərinin faciəsi bütün dünyada tanınmışdır, “erməni soyqırımı” isə daim dolaşıqlıqla qarşılaşır. Ermənistanda antisemitizm və ksenofobiya əfsanə deyildir, erməni “arilərinin” türk, semit və digər xalqların nümayəndələri üzərində irqi üstünlüyü ideyaları kimi kədərli reallıqdır. Məhz buna görə də müasir Ermənistan əslində monoetnik dövlətdir və burada yəhudilər daim azalan mikroskopik azlıq təşkil edir. Yaxın gələcəkdə onlar bu ölkənin etnik xəritəsindən sadəcə yox olub gedəcəklər.

“Haqlı olaraq belə bir sual meydana çıxır: İsrail dövləti nəyin xatirinə “erməni soyqırımını” tanımalıdır - Ermənistandan və ermənilərdən komplimentlər qəbul etmək üçün? İndi bu faktdır ki, Ermənistan Cənubi Qafqazda İranın yeganə strateji tərəfdaşıdır”.

A.Qut İsrailin həqiqi milli mənafeyi barədə düşünməyə və erməni lobbisinin təzyiqi altında olan fitnəkar siyasətçilərin “erməni soyqırımını” tanımaq tələbini yerinə yetirməməyə çağırmışdır. İsrail politoloqu yazır: “Biz erməni lobbisinin arzuları barədə deyil, İsrailin milli mənafeyi barədə düşünməliyik”.