SİYASƏT
AŞPA-nın Mədəniyyət, Elm və Təhsil komitəsinin iclası Bakıda keçiriləcək
Strasburq, 24 iyun (AZƏRTAC). AŞPA-nın yay sessiyasının gedişində deputat Rafael Hüseynov elm, təhsil və mədəniyyət komitəsinin iclasında “Avropada təhsil məkanının bütün ölkələrə doğru genişləndirilməsi” adlı məruzəsi üzərində işi ilə əlaqədar çıxış etmiş, Avropa ali təhsil fazasının daha geniş həcmdə inkişafı, müasir ali təhsilin standartlarının təkmilləşdirilməsi ilə bağlı mülahizələrini səsləndirmişdir. R.Hüseynov Bolonya prosesinin dünəni və sabahı ilə əlaqədar fikirlərini söyləməklə yanaşı, Azərbaycanın bu hərəkata verə biləcəyi töhfələrdən bəhs edərək demişdir: “Son aylarda üzərində intensiv şəkildə işlədiyim məruzənin sadəcə sərlövhəsi problemin nə qədər əhəmiyyətli olduğunu nümayiş etdirməkdədir. Ali təhsil müasir cəmiyyətin inkişafının təməl amillərindəndir və onun XXI əsrin tələb etdiyi yüksək standartlara uyğun şəkildə təşkili həm bütövlükdə Avropa, həm də üzv dövlətlərin hər birindən ötrü son dərəcə önəmlidir. 2010-cu ilin martında təhsil nazirlərinin Budapeşt və Vyanada keçirilən, Bolonya prosesinin 10 illiyinə həsr edilən yubiley konfransında xüsusi qərar qəbul olunmuşdur. O vaxta qədər şərti olaraq “Bolonya prosesi” adlanan cərəyanın əvəzində Avropa Ali Təhsil Məkanının yaradıldığı elan edildi. Burada əsas məqsəd Avropada ali təhsilin rəqabətədözümlülüyü və cəlbediciliyini artırmaq, müxtəlif universitetlərin tələbə və müəllimləri üçün mübadilə proqramlarının genişləndirilməsi, habelə diplomların standartlaşdırılması vasitəsilə Avropa ölkələri arasında əmək bazarının yaradılmasını təmin etməkdir. Prosesin mövcud olduğu 12 il ərzində iştirakçı ölkələrin sayı 29-dan 47-yə çatmışdır. Bundan əlavə, Avropa Şurası da burada YUNESKO, Avropa Komissiyası kimi məşvərətçi üzvlər sırasındadır. Başqa sözlə, Assambleyada bu məsələnin dərindən təhlil edilərək ayrıca məruzə hazırlanması elə təşkilatımızın prosesə töhfəsi kimi dəyərləndirilə bilər. Məruzədə başlıca olaraq bir neçə mühüm istiqamətə diqqət yönəldilir və bunlarla əlaqədar həm praktiki, həm də nəzəri məqamlar mətndə əks olunur. Mən özüm də təhsil işçisi olduğumdan və 30 ildən artıq müddətdə bilavasitə təhsil şəbəkəsində çalışdığımdan bu problemlərlə daim üz-üzəyəm. Həmin prosesin əsasında dayanan müddəalardan hansının gerçəklikdə özünü doğrultduğunu, hansının təkmilləşməyə ehtiyacı olduğunu, eyni təhsil fazasına birləşməkdə hansı ölkələrin, xüsusən gənc demokratiya ölkələrinin hansında hansı korrektələri etməyin zəruriyyətini əyani şəkildə görür, hiss edirəm. Avropa Ali Təhsil fazasının durmadan genişləndirilməsi bu gün əsas vəzifədir və 1997-ci il Lissabon konvensiyası ölkələr arasında bu istiqamətdə əməkdaşlığı inkişaf etdirmək üçün möhkəm əsas yaradır. 2010-cu ildən etibarən AATM-də sədrliyi 2 dövlət həyata keçirir. Bunlardan biri Avropa İttifaqına prezidentlik edən ölkənin, digəri isə əlifba sırası ilə, Avropa İttifaqına daxil olmayan ölkənin nümayəndəsi olur. 2012-ci ildə həmsədrlik Danimarka və Azərbaycana keçəcəkdir. Mənim ölkəm bu prosesdə yeni olsa da istər üzvlüyü, xüsusilə də həmsədrliyi dönəmində inkişafa yeni təkan sayıla biləcək addımlar atmaq əzmindədir. Mənim - Azərbaycanı Avropa Şurasında təmsil edən şəxsin bu mövzuda məruzəçi olması, zəruri layihələr hazırlaması elə həmin niyyətin daha bir təsdiqi kimi qəbul edilə bilər”.
Rafael Hüseynovun müəllifi olduğu məruzə Parlament Assambleyasının qrafikinə görə 2012-ci ilin yazında tamamlanmalı və həmin ilin payız sessiyasında Avropa Şurasında açıq müzakirəyə çıxarılmalıdır. Mədəniyyət, elm, təhsil komitəsinin AŞPA yay sessiyasının dördüncü iş günü çərçivəsində Mədəniyyət, elm, təhsil komitəsinin iclasında qərara alınmışdır ki, R.Hüseynovun məruzəsinin yekun mətni və qətnamə layihəsinin müzakirə ediləcəyi toplantı və kollokvium Bakıda keçirilsin. Bu haqda AŞPA sədrinə ayrıca rəsmən müraciət edilmişdir. Avropa Şurası adətən Parisə təyin olunan öz komitə iclasını Bakıda keçirməyi qət edərkən digər bir cəhəti də nəzərə almışdır. 2012-ci ildə Bakıda Avropa təhsil nazirlərinin zirvə konfransının təşkil edilməsi planlaşdırılır. Həmin konfransla eyni vaxtda baş tutacaq komitə iclası əsnasında Rafael Hüseynovun təqdim edəcəyi “Avropa ali təhsil məkanının bütün ölkələrə doğru genişləndirilməsi” adlı məruzənin müzakirəsinə Avropanın müxtəlif ölkələrindən Azərbaycan paytaxtına gəlmiş görkəmli mütəxəssislər, bir sıra təhsil nazirləri də cəlb ediləcəkdir.
Əsgər Əliyev
AZƏRTAC-ın xüsusi müxbiri
Strasburq