Bakı, 11 sentyabr (AZƏRTAC). Azərbaycan 2001-ci il sentyabrın 11-də Nyu-Yorkda törədilmiş terror aktından sonra antiterror koalisiyasına qoşulan ilk ölkələrdən biridir.

Ölkəmizin beynəlxalq antiterror əməliyyatlarında iştirakı ilk növbədə onu göstərir ki, terrordan əziyyət çəkən Azərbaycan dünyada sülhün və əmin-amanlığın bərqərar olmasında israrlıdır.

Bu gün 11 sentyabr faciəsi qurbanlarının xatirəsi yad edilir. 11 sentyabr hadisələrindən sonra dünya terrorizmə qarşı birgə vuruşmaq və onu məğlub etmək barədə ciddi düşünməyə başlamışdır. Artıq dünyanın əksər dövlətləri qlobal antiterror əməliyyatlarında iştirak edir. Bu ölkələr sırasında Azərbaycanın da xüsusi yeri var. Azərbaycan bu mübarizədə öz köməyini təklif etmiş ilk dövlətlərdəndir. Ölkəmiz bu beynəlxalq fəlakətlə mübarizədə ilk növbədə informasiya mübadiləsi, beynəlxalq terrorizm şəbəkəsi ilə əlaqəsi olan şəxslərin və ya qurumların ifşa olunması, terrorizmin maliyyələşmə şəbəkəsinin üzə çıxarılması kimi məsələlərə xüsusi diqqət yetirir.

Son səkkiz ildə Azərbaycanın hüquq mühafizə orqanları beynəlxalq terrorizmdə günahlandırılan onlarla insanı həbs edərək istintaqa təhvil vermişdir. Azərbaycan dünyada narahatlıq mənbələrinin aradan qaldırılmasına kömək etməkdə davam edir. Bu baxımdan ABŞ Azərbaycanın terrorizmə qarşı mübarizədə mühüm rolunu yaxşı dərk edir. Çünki son illərdə terrorizmə qarşı mübarizədə birgə əməkdaşlıq nəticəsində uğurlu nəticələr əldə olunmuşdur. Azərbaycan ilə uğurlu əməkdaşlıq bir çox terror təşkilatlarının maliyyələşdirilməsinin qarşısını almışdır. Ölkəmiz özü də terror təhlükələrinə qarşı mühafizə üçün təcrübə və texniki vasitələr əldə etmişdir. Antiterror koalisiyasının fəal üzvü olan Azərbaycan terrorizmlə mübarizəyə dair əsas beynəlxalq konvensiyalara qoşulmuşdur. Ermənistanın hərbi təcavüzünə və terroruna məruz qalan Azərbaycan üçün bu ümumbəşəri bəlaya qarşı mübarizə xüsusi əhəmiyyət kəsb edir. Bu sahədə beynəlxalq təşkilatlarla, o cümlədən BMT, ATƏT və Avropa Şurası ilə səmərəli əməkdaşlıq davam etməkdədir.

Azərbaycan hərbçiləri Əfqanıstanda və İraqda antiterror koalisiyası tərkibində fəaliyyət göstərmişlər. Sülhməramlılarımız İraqa BMT Təhlükəsizlik Şurası tərəfindən 2003-cü ildə qəbul olunmuş qərara əsasən göndərilmişlər. 14 zabit, 16 çavuş və 120 əsgərimiz İraqdakı su elektrik stansiyasını mühafizə etmişlər. Milli Məclisin 2008-ci ilin 11 noyabr tarixli qərarı ilə 150 Azərbaycan hərbçisi İraqda öz vəzifələrini yerinə yetirərək Vətənə qayıtmışdır. Əfqanıstanın təhlükəsizliyini təmin edən beynəlxalq qüvvələr strukturunda isə 90 Azərbaycan hərbçisi sülhməramlı missiyalarını yerinə yetirir. Azərbaycandan Əfqanıstana əvvəl 22, 2008-ci il yanvarın 4-də 23, keçən ilin sentyabrında isə 45 sülhməramlı göndərilmişdir. Bunlar hamısı bir daha onu göstərir ki, terrorizmə qarşı mübarizədə öz prinsipiallığını dəfələrlə nümayiş etdirən Azərbaycan həm regionda, həm də dünyada sülh və əmin-amanlığın tərəfdarı kimi öz töhfəsini verir.