Bakı, 17 iyun (AZƏRTAC). “Sərhədçi” İdman Olimpiya Mərkəzində keçirilən sərbəst və yunan-Roma güləşi üzrə böyüklər arasında Azərbaycan çempionatı davam edir.

İyunun 17-də ölkə çempionatında sərbəst güləş üzrə 74, 84, 96 və 120 kq çəki dərəcələri üzrə qaliblər müəyyənləşmişdir. Bu çəkidə ümumilikdə 93 pəhləvan mübarizə aparmışdır. Onlardan ən güclüləri Əşrəf Əliyev (74 kq), Çamsulvara Çamsulvarayev (84 kq), Cəmaləddin Maqomedov (96 kq) və Toxtar Təmrəzov (120 kq) olmuşlar.

Bu gün həmçinin, yeniyetmələr arasında “Region Kuboku” uğrunda komanda birinciliyinin sərbəst güləş üzrə final görüşləri keçirilmişdir. Final görüşündə Sumqayıtın 2 saylı nümayəndəliyi və Gəncənin 7 saylı nümayəndəliyinin pəhləvanları mübarizə aparmışlar. Qarşılaşma 6:4 hesabı ilə Gəncə güləşçilərinin xeyrinə başa çatmışdır.

Qeyd edək ki, yeniyetmələr arasında “Region Kuboku” uğrunda komanda birinciliyi yarışları ilk dəfədir ki keçirilir. Yarışlar 2 mərhələdən ibarətdir. Bu turnirdə Azərbaycan Güləş Federasiyasının (AGF) 8 nümayəndəliyinin - Bakı, Gəncə, Sumqayıt, Naxçıvan, Lənkəran, Göyçay, Şamaxı və Yevlax komandaları qüvvələrini sınayırlar. Qalib komanda AGF-nin diplomları, keçici kubok və 2000 manatla mükafatlandırılacaqlar. Finalda uduzan kollektiv diplomlarla yanaşı, 1000 manat əldə edəcəkdir.

Şəxsi yarışlarda çəki dərəcələri üzrə ilk 3 yeri tutmuş idmançılara müvafiq diplom, medal və pul mükafatı veriləcək, həmin güləşçilər ölkə yığma komandasının heyətinə cəlb olunacaqlar. Yığma komandada yer alan idmançılar tam dəst idman geyimi ilə təmin olunacaqlar.

Çempionatda 1-ci yeri tutan idmançı 4000 manat, 2-ci yeri tutan 2000 manat, 3-cü pillədə qərarlaşan güləşçi isə 1000 manat pul mükafatı alacaqdır. Həmçinin 1-ci yeri tutan idmançıların şəxsi məşqçilərinə də 1000 manat mükafat veriləcəkdir. Birinci və ikinci yerləri tutan pəhləvanlar növbəti seçim yarışına qədər hər ay müvafiq olaraq 600 və 500 manat maaş alacaqlar. 

Azərbaycan çempionatında görüşlərin daha obyektiv və şəffaf keçirilməsi məqsədi ilə AGF tərəfindən qonşu dövlətlərdən olimpiya və beynəlxalq dərəcəli hakimlər dəvət edilmişdir. Eyni zamanda, yarışları FİLA-nın (Beynəlxalq Güləş Federasiyası) təlimatçısı Konstantin Mixaylov da müşahidə edir. Bu, AGF-nin ölkəmizdə güləşin inkişafı üçün atdığı növbəti addımdır. Qeyd edək ki, oyunların idarə olunmasında yerli hakimlərlə yanaşı, Xorvatiya, İran, Türkiyə, Gürcüstan, Rusiya, Qırğızıstan, Yunanıstan və Rumıniyadan olan hakimlər də iştirak edirlər.