SİYASƏT
AZƏRBAYCAN İLƏ GÜRCÜSTAN DOST ÖLKƏLƏRDİR VƏ QARŞILIQLI MÜNASİBƏTLƏRDƏKİ BÜTÜN PROBLEMLƏR HƏLL OLUNACAQDIR
Tbilisi, 16 noyabr (AZƏRTAC). Azərbaycan Respublikası Dini Qurumlarla İş Üzrə Dövlət Komitəsinin sədri Hidayət Orucov noyabrın 16-da Gürcüstana üçgünlük səfərə gəlmişdir.
H.Orucov ulu öndər Heydər Əliyevin Tbilisi şəhərindəki büstü önünə əklil qoymuşdur. Əklilqoyma mərasimində qonağı Gürcüstanın diaspor məsələləri üzrə dövlət naziri Yulon Qaqoşidze, Azərbaycanın Gürcüstandakı səfiri Namiq Əliyev və digər rəsmi şəxslər müşayiət etmişlər.
H.Orucov Azərbaycanın ictimai-siyasi xadimlərinin Tbilisi şəhərinin Nəbatat bağındakı qəbirlərini də ziyarət etmiş, Tbilisi Cümə məscidinə baş çəkmişdir.
Sonra Hidayət Orucov Ümumgürcüstan Katolikos-Patriarxı II İlya ilə görüşmüşdür. Görüşdən sonra II İlya jurnalistlərə demişdir: “Mən bütün Azərbaycan xalqını, Azərbaycan Respublikasının Prezidenti İlham Əliyevi səmimi qəlbdən salamlayıram. Bu günlərdə Bakıya qardaşlıq səfərim məndə xoş təəssürat oyatmışdır. Səfər zamanı çox məzmunlu görüşlər keçirmişdik. Azərbaycan Respublikasının Prezidenti İlham Əliyev, Heydər Əliyev Fondunun prezidenti Mehriban xanım Əliyeva və başqa rəsmilərlə görüşmüşdük. Görüşlərdə dini məsələlərə əsas yer verilmişdi. Razılaşdıq ki, Bakı şəhərində gürcü kilsəsi tikilsin, Gürcüstanda məscidlər üçün problemlər yaranmasın. Səfərim zamanı mən bir daha şahid oldum ki, xalqlarımız bir-birinə nə qədər yaxındırlar. Bir daha əmin oldum ki, bütün problemləri birgə həll etməliyik. Qafqaz Müsəlmanları İdarəsinin sədri şeyx hacı Allahşükür Paşazadə ilə çoxillik dostluğumuz vardır və bütün problemlərin həllində bu dostluq həmişə böyük rol oynamışdır. Bundan sonra da çalışacağıq ki, bütün vasitələri Qafqazda sülhün, sabitliyin və təhlükəsizliyin təmin olunmasına yönəldək”.
Kvemo Kartli-Borçalı bölgəsinin Bolnisi rayonundakı Faxralı kənd məscidinin bərpasına gürcü dindarların mane olması ilə əlaqədar sualı cavablandıran II İlya bildirdi ki, burada əvvəldən səhvə yol verilmişdir. Bütün ölkələrdə belə məsələlər hakimiyyətlə razılaşdırılır. Faxralıda isə razılıq alınmadan məscidin bərpasına başlanmışdır. Çalışacağıq ki, problem yoluna qoyulsun.
Hidayət Orucov II İlya ilə görüşdən məmnun qaldığını söyləmişdir. Demişdir ki, görüşümüzdə əsasən Azərbaycanla Gürcüstan arasında mədəni, mənəvi əlaqələrin daha da dərinləşdirilib möhkəmləndirilməsinə diqqət yetirdik. Qafqazda mövcud vəziyyətlə bağlı da danışıqlarımız oldu. Strateji tərəfdaşlar olan ölkələrimizin bütün problemlərin sülh yolu və qanun çərçivəsində həlli məsələlərində maraqlı olduqları bir daha öz əksini tapdı.
Görüşdə Azərbaycanın Gürcüstandakı səfiri Namiq Əliyev, diaspor məsələlər üzrə dövlət naziri Yulon Qaqoşidze iştirak etmişlər.
Yulon Qaqoşidze jurnalistlərə demişdir ki, səfər mənim dəvətimlə baş tutmuşdur. Dövlət naziri vurğulamışdır ki, dost ölkələr olan Gürcüstan və Azərbaycan həmişə bir olub, bir də olacaqlar. Y.Qaqoşidze səfər zamanı azərbaycanlı qonaqla Gürcüstanda yaşayan azərbaycanlıların problemləri ilə yanaşı, Azərbaycanda yaşayan gürcülərin problemlərinin də müzakirə olunacağını bildirmişdir. Faxralı kəndində məscid binasının bərpası ilə əlaqədar mövcud problemə toxunan dövlət naziri belə məsələlərin ölkələrimiz arasında münasibətlərə xələl gətirməyəcəyinə və hər bir problemin qanun çərçivəsində həll ediləcəyinə əmin olduğunu vurğulamışdır.
Noyabrın 16-da H.Orucov Kvemo Kartli-Borçalı bölgəsinin qubernatoru David Kirkitadze ilə görüşmüşdür. Görüşdən sonra D.Kirkitadze hər iki tərəfi maraqlandıran məsələlərə toxunulduğunu, Bolnisi rayonunun Faxralı kəndində məscid binasının bərpası ilə bağlı da söhbət aparıldığını vurğulamış və belə səfərlərin, görüşlərin ənənəvi xarakter alacağına əmin olduğunu bildirmişdir.
Gürcüstana səfəri çərçivəsində Dini Qurumlarla İş üzrə Dövlət Komitəsinin sədri Hidayət Orucovun reinteqrasiya məsələləri üzrə dövlət naziri Temuri Yakobaşvili, Tbilisi şəhərinin meri Qiqi Uqulava, mədəniyyət, abidələrin mühafizəsi və idman naziri Nikoloz Rurua, diaspor məsələləri üzrə dövlət naziri Yulon Qaqoşidze, Gürcüstan parlamentinin vitse-spikeri Fridon Todua və yerli azərbaycanlıların nümayəndələri ilə görüşəcək, Gürcüstanın ərazi bütövlüyü uğrunda şəhid olanların Tbilisidəki abidəsi önünə əklil qoyacaqdır.
İslam Əliyev
AZƏRTAC-ın xüsusi müxbiri
Tbilisi