Bakı, 12 dekabr (AZƏRTAC). Bu hüznlü gündə Fəxri xiyabana gələn ziyarətçilər arasında tanınmış elm adamları da çoxdur. Bu isə təsadüfi deyildir. Axı xalqımızın ümummilli lideri Heydər Əliyev Azərbaycan elminin əsl himayədarı olmuş, elm adamlarına qayğı göstərmişdir. İstər iyirminci əsrin 70-ci, istərsə də 90-cı illərində Heydər Əliyevin elmə diqqət və qayğısı çox yüksək səviyyədə olmuşdur. O, çox gözəl bilirdi ki, hər bir ölkənin, hər bir xalqın tərəqqisində elmin inkişafı müstəsna rol oynayır.

Azərbaycan Milli Elmlər Akademiyasının birinci vitse-prezidenti, akademik Arif Həşimov da ziyarətçilər arasındadır. O, müxbirimizə demişdir:

-Akademiyaya milli statusun verilməsi də Heydər Əliyevin adı ilə bağlıdır. Ulu öndərimiz xalqın təkidli tələbi ilə hakimiyyətə qayıtdıqdan sonra AMEA özünün yeni, intibah dövrünü yaşamağa başladı. Heç də təsadüfi deyildir ki, 2009-cu ildə Azərbaycanda elmin inkişafını əks etdirən strateji sənəd hazırlananda da bu, Milli Strategiya adlandırıldı. Hazırda bu strategiyanın həyata keçirilməsi istiqamətində müəyyən işlər yerinə yetirilir. Bütün bu görülən işləri biz Heydər Əliyevin əvvəlki fəaliyyəti ilə bağlayırıq.

Ulu öndər Heydər Əliyev hələ 1970-ci illərdə respublikaya rəhbərlik edən zaman Azərbaycanda güclü elm infrastrukturunun yaranmasına, peşəkar kadrların hazırlanmasına çox böyük diqqət yetirirdi. 1990-cı illərin əvvəllərində Azərbaycan öz dövlət müstəqilliyini bərpa etdikdən sonra ölkəmizdə vəziyyət bütövlükdə çox acınacaqlı idi. Ölkədə xaos, böhran hökm sürürdü. Faktik olaraq, bütün sahələrdə tənəzzül müşahidə olunurdu. Ancaq 1993-cü ildə Heydər Əliyev hakimiyyətə qayıdandan sonra bütün sahələrin inkişafına təkan verildi, o cümlədən Azərbaycan elminə. Təsadüfi deyildir ki, ulu öndərin ilk görüşlərindən biri də məhz Elmlər Akademiyasının binasında Azərbaycan ziyalıları ilə keçirilmişdir.

Bugünkü anma mərasimində Milli Akademiyanın əməkdaşlarının iştirakı onların ulu öndərin qarşısında vətəndaşlıq borclarını yerinə yetirmələridir. İnamla bəyan edirəm ki, AMEA-nın gələcək nailiyyətləri də ümummilli liderin adı ilə bağlı olacaqdır.