AZƏRBAYCAN PREZİDENTİ İLHAM ƏLİYEVİN BƏYANATI
-Hörmətli cənab Prezident,
Hörmətli xanımlar və cənablar,
İlk növbədə, cənab Prezident, məni ölkənizə dövlət səfərinə dəvət etdiyinizə görə Sizə öz təşəkkürümü bildirmək istəyirəm.
Cənab Prezident, Sizin qeyd etdiyiniz kimi, bizim münasibətlərimiz strateji xarakter daşıyır və şübhə etmirəm ki, bu səfərdən sonra bu münasibətlər bütün istiqamətlərdə daha da möhkəmlənəcəkdir. Siyasi əlaqələr inkişaf etdikcə, əlbəttə ki, iqtisadi sahədə də əməkdaşlıq daha da yüksək pilləyə qalxacaqdır. Beləliklə, ikitərəfli münasibətlər hərtərəfli şəkildə inkişaf edəcəkdir.
2006-cı ildə Azərbaycan Avropa Birliyi ilə Yeni qonşuluq proqramının icrasına başlayanda bizim məqsədimiz 5 il ərzində Azərbaycanda mövcud olan meyarları Avropa Birliyinin meyarlarına yaxınlaşdırmaq olmuşdur və bu istiqamətdə biz çox sürətlə irəliyə gedirik. Macarıstanın qonşuluq proqramı çərçivəsində bizə verdiyi dəstəyə görə mən Sizə öz təşəkkürümü bildirirəm.
Bu gün ikitərəfli münasibətlərin, demək olar ki, bütün aspektləri müzakirə olundu və vahid bir qərara, fikrə gəldik ki, biz münasibətlərimizi bundan sonra da sürətlə inkişaf etdirməliyik, ölkələrimizi bir-birinə daha da yaxınlaşdırmalıyıq. İndiki zamanda dünya və Avropa üçün xüsusi əhəmiyyət daşıyan enerji təhlükəsizliyi məsələləri də bu gün müzakirə olunmuşdur. Əminəm ki, ikitərəfli münasibətlərin inkişafında bu amil də öz rolunu oynayacaqdır.
Azərbaycan çox zəngin neft və qaz yataqlarına malikdir. Azərbaycanda çıxarılan neft və qaz dörd istiqamətdə, dörd boru kəməri vasitəsilə Avropa və dünya bazarlarına nəql edilir. Keçən ilin sonunda tarixdə ilk dəfə olaraq, Azərbaycan qazı Avropa Birliyi məkanına göndərilmişdir. Avropa Birliyi ilə və Macarıstanla bu sahədəki əməkdaşlığımız davam etdiriləcəkdir. Biz yeni layihələrin üzərində işləyirik və bu layihələr həyata keçdikcə, Avropanın enerji təhlükəsizliyi daha da böyük dərəcədə təmin olunacaqdır. Azərbaycanın isə ixrac imkanları daha dolğun şəkildə icra ediləcəkdir.
Bir sözlə, mən aparılan danışıqların məzmunundan çox razıyam. Onu da qeyd etmək istəyirəm ki, mən cənab Prezidenti Azərbaycana dövlət səfərinə dəvət etdim və münasib bildiyi vaxtda biz onu Azərbaycanda qarşılamağa hazırıq. Əminəm ki, bu səfər də şübhəsiz, uğurlu olacaq və ikitərəfli münasibətlərin inkişafında çox ciddi rol oynayacaqdır. Təşəkkür edirəm.
Bölmənin digər xəbərləri
