AZƏRBAYCAN PREZİDENTİ İLHAM ƏLİYEVİN NİTQİ
Əziz bacılar və qardaşlar!
Mən sizin hamınızı ürəkdən salamlayıram. Sizə öz dərin hörmət və məhəbbətimi bildirirəm.
Bu, mənim Xaçmaza ilk gəlişim deyildir. Mən Xaçmazda dəfələrlə olmuşam və hər dəfə çox böyük təəssüratla Bakıya dönmüşəm. Xalqımızın ümummilli lideri Heydər Əliyev demişkən, Xaçmaz Azərbaycanın ən gözəl guşələrindən biridir. Bu, həqiqətən belədir. Buranın çox gözəl təbiəti, iqlimi var. Amma hesab edirəm ki, Xaçmazın ən böyük sərvəti sizlərsiniz, qəhrəman, vətənpərvər insanlar, zəhmətkeş xaçmazlılardır.
Mən son dəfə Xaçmazda keçən ilin sentyabrında olmuşdum. Burada yeni böyük emal müəssisəsi açılırdı, mən də açılışda iştirak edirdim. O zaman mən bildirdim ki, vaxtilə belə bir müəssisənin yaradılması ilə əlaqədar xalqımızın ümummilli lideri Heydər Əliyevə müraciət olunmuşdu. Onun məsləhətinə ehtiyac var idi ki, bu zavod hansı rayonda tikilsin. Xatırlayıram, Heydər Əliyev demişdi ki, bunu Xaçmazda tikin. Bu zavod Xaçmazda tikildi və bu gün “Qafqaz” konserv zavodu çox gözəl fəaliyyət göstərir. Orada insanlar çalışır, kəndlilər öz məhsulunu zavoda təhvil verirlər. Beləliklə, Azərbaycanda ən yüksək standartlara cavab verən yeni müəssisə yaranmışdır. Mən bu gün oraya gedəcək, zavodun fəaliyyəti ilə tanış olacağam.
Bilirsiniz ki, seçkilərdən sonra Azərbaycanda qəbul edilmiş proqramlar çərçivəsində böyük işlər görülür. Bu işlərin təməli 1993-cü ildə qoyulmuşdur. 1993-cü ildə Heydər Əliyevin Azərbaycana rəhbərliyə gəlişindən sonra ölkə iqtisadiyyatına böyük həcmdə xarici sərmayə qoyuldu. Ölkə iqtisadiyyatı inkişaf etməyə başladı. Xüsusilə kənd təsərrüfatı inkişaf etməyə başladı. Torpaq islahatı aparıldı. Bu gün bu siyasət davam etdirilir, o cümlədən kənd təsərrüfatının inkişafı istiqamətində bu yaxınlarda çox ciddi addımlar atılacaqdır.
Azərbaycanda kənd təsərrüfatı məhsullarının həcmi ildən-ilə artır. Hamımız onu da bilirik ki, texnikamız kifayət qədər yoxdur, bu texnikanın alınması üçün müəyyən tədbirlər görüləcəkdir. Əminəm ki, bu addımlar atılandan sonra bu istiqamətdə daha da böyük işlər görüləcəkdir.
Azərbaycanın hər bir bölgəsi inkişaf edir. Minlərlə, on minlərlə yeni iş yerləri açılır. Seçkilərdən keçən dövr ərzində Xaçmaz rayonunda da iş yerlərinin açılması üçün böyük səylər göstərilmiş, böyük uğurlar əldə edilmişdir.
Dünən Qubada böyük bir tədbir keçirildi. Orada Xaçmazdan olan sahibkarlar da iştirak edirdilər. Mən onlarla da görüşdüm, məhsulları ilə tanış oldum. Görürəm ki, bu meyllər güclənir. Azərbaycanda sahibkarlar sinfi yaranır, güclənir. Bu bizim gələcək inkişafımızın ən başlıca amilidir.
Azərbaycanın neft strategiyası uğurla inkişaf edir və bu istiqamətdə görülmüş işlər göz qabağındadır. Heydər Əliyev tərəfindən həyata keçirilən neft strategiyası uğurla davam edir. Qeyri-neft sektorunun inkişafı, bölgələrin, rayonların inkişafı, abadlaşması indi bizim prioritet məsələmizdir. Bu məqsədlə seçkilərdən sonrakı real vəziyyətlə, problemlərlə tanış olmaq üçün, insanların həyatı ilə yaxından tanış olmaq, problemləri dinləmək üçün bölgələrə səfərlər edirəm. Artıq müxtəlif rayonlarda olmuşam, bu gün də Xaçmazdayam. Dünən Qubadaydım, bu gün səhər Qusarda olmuşam. Dünən səhər gələrkən Siyəzəndə, Dəvəçidə də əhali ilə görüşmüşəm. Hər şeyi öz gözlərimlə görməliyəm. Harada problem varsa, aradan qaldırılmalıdır. Harada uğur varsa, gərək o, təqdirlə qarşılansın.
Mən seçkilərdən əvvəl söz vermişdim ki, Azərbaycanın hərtərəfli inkişafı üçün əlimdən gələni əsirgəməyəcəyəm. Seçkilərdən sonra qəbul olunmuş proqramlar, xüsusilə regional inkişaf proqramı bu gün uğurla həyata keçirilir. Qarşımıza qoyduğumuz bütün vəzifələr öz həllini tapır. O cümlədən sosial məsələlər həllini tapır, əmək haqları qaldırılır, minimum əmək haqqı artırılıbdır. Gələn il yenə də qaldırılacaq və ildən-ilə Azərbaycan vətəndaşları daha yaxşı yaşayacaqlar. Beşillik proqram həyata keçiriləndən sonra Azərbaycan iqtisadi cəhətdən daha da güclənəcək, inkişaf edəcəkdir. Bizim məqsədimiz Azərbaycanın dövlət müstəqilliyini daha da möhkəmləndirmək, ölkənin milli maraqlarını daha da yüksək səviyyədə qorumaq, ordumuzu gücləndirməkdir.
Bu gün sərhəd dəstəsində idim. Orada böyük işlər görülübdür. Bizim Sərhəd Qoşunlarımızın da fəaliyyəti çox yüksək səviyyədədir. Bu, məni çox sevindirir. Mən istəyirəm ki, Azərbaycanın bütün vətəndaşları - kənd təsərrüfatı ilə məşğul olanlar, müəllimlər, həkimlər, hərbçilər, – bir sözlə, hamı ildən-ilə daha da yaxşı yaşasın.
Büdcədən maliyyələşən təşkilatlarda işləyən insanların həyat səviyyəsinin yaxşılaşdırılması üçün onların əmək haqları qaldırılacaqdır. Qeyri-dövlət neft sektorunda çalışanlara, sahibkarlıqla məşğul olanlara da dövlət tərəfindən qayğı göstərilir. Bu il 100 milyard manat kredit nəzərdə tutulmuşdur. Bu kreditdən istifadə nəticəsində minlərlə yeni iş yerləri açılacaqdır.
Azərbaycanın iqtisadi potensialı ildən-ilə güclənir. Büdcəmiz artır. Gələn ilin büdcəsi də artacaqdır. Bu da, öz növbəsində, kreditlərin daha böyük həcmdə verilməsinə imkanlar yaradacaqdır. Mən verdiyim bütün vədlərə sadiqəm. Seçkilərdən əvvəl verdiyim hər bir sözümün üstündə dururam və bunların hamısını da sizlərin dəstəyi ilə yerinə yetirəcəyəm.
Azərbaycanda Heydər Əliyev siyasəti davam etdirilir. Bu siyasət xalqımız tərəfindən dəstəklənir. Prezident seçkilərində mən bu dəstəyi bir daha hiss etdim. Mən bu böyük etimadı doğruldacağam.
Əziz dostlar!
Mən çox şadam ki, bu gün sizinlə birlikdəyəm, Xaçmazdayam, sizinlə görüşürəm. Mən bundan sonra da Xaçmaza gələcəyəm, bütün bölgələrə gedəcəyəm. Mənim səfərlərim hansısa təbliğat, yaxud da seçkiqabağı kampaniya xarakteri daşımır. Azərbaycanın Prezidenti kimi Azərbaycan xalqı ilə birlikdə olmalıyam və birlikdəyəm. Azərbaycanın hər bir rayonu, hər bir kəndi mənim üçün doğmadır, əzizdir. Ona görə bundan sonra biz sizinlə tez-tez görüşəcəyik, birlikdə doğma Vətənimizi, müstəqil Azərbaycanımızı daha da gücləndirəcəyik.
Sizə cansağlığı, xoşbəxtlik arzulayıram. Sağ olun.
Bölmənin digər xəbərləri
