MƏDƏNİYYƏT
Azərbaycan Prezidentinin Nizami Gəncəvinin 870 illiyi ilə bağlı Sərəncamının yerinə yetirilməsi vəziyyəti müzakirə edilmişdir
Gəncə, 11 iyul (AZƏRTAC). Gəncə Şəhər İcra Hakimiyyətində Azərbaycan Respublikasının Prezidenti İlham Əliyevin “Dahi Azərbaycan şairi və mütəfəkkiri Nizami Gəncəvinin 870 illik yubileyinin keçirilməsi haqqında” 2011-ci il 23 dekabr tarixli Sərəncamından irəli gələn vəzifələrlə əlaqədar tədbirlər planının yerinə yetirilməsi vəziyyəti şəhər ziyalılarının, nizamişünas alimlərin, eləcə də ictimaiyyət nümayəndələrinin iştirakı ilə müzakirə edilmişdir.
Tədbiri giriş sözü ilə açan Gəncə Şəhər İcra Hakimiyyətinin başçısı Elmar Vəliyev dahi Azərbaycan şairi Nizami Gəncəvinin 870 illik yubileyinə hazırlıqla bağlı dövlət başçısının müvafiq Sərəncamından irəli gələn vəzifələrin yerinə yetirilməsi istiqamətində görülmüş işlərdən və qarşıda duran vəzifələrdən danışmışdır.
Yubileyin keçirilməsi ilə əlaqədar şəhər ziyalılarından, nizamişünas alimlərdən, həmçinin yaradıcı təşkilatların nümayəndələrindən ibarət təşkil olunmuş komissiyanın sədri, Azərbaycan Milli Elmlər Akademiyasının (AMEA) müxbir üzvü, AMEA-nın Gəncə Regional Elmi Mərkəzinin direktoru Fuad Əliyevin komissiyanın gördüyü işlərə dair hesabatı dinlənilmişdir.
Bildirilmişdir ki, dövlət başçısının müvafiq Sərəncamı imzalamasından ötən dövr ərzində komissiyanın 7 iclası keçirilmiş, tədbirlər planı əsasında xeyli iş görülmüşdür. Gəncə Regional Elmi Mərkəzinin nəzdində Nizami şöbəsi yaradılmış, nizamişünas alimlərin, eləcə də ədəbiyyatşünasların iştirakı ilə kütləvi informasiya vasitələrində Nizami Gəncəvi irsinin təbliği ilə əlaqədar maraqlı yazılar və verilişlər təşkil edilmiş, ingilis və rus dillərində bukletlər çap olunmuşdur.
Dövlət başçısının müvafiq Sərəncamından sonra Gəncədə yaradılmış Nizami Mərkəzinin direktoru, professor Xəlil Yusiflinin şairin “Xosrov və Şirin”, “Leyli və Məcnun” və “Sirlər xəzinəsi” əsərləri yenidən Azərbaycan dilinə tərcümə edilərək nəfis şəkildə nəşr olunmuşdur. Bundan əlavə, komissiyanın üzvü Samir Pişnamazzadənin “Nizami məqbərəsinin tarixi” və Sevda Qurbanəliyevanın “Nizami Gəncəvi və musiqi” kitabları çap olunmuşdur. Hazırda Nizami Gəncəvinin sözlərinə yazılmış musiqilərdən ibarət kompakt diskin hazırlanması üzərində iş aparılır.
Müşavirədə qeyd edilmişdir ki, dahi şairin dünyanın bir çox ölkələrində saxlanılan əlyazmalarının surətinin Gəncəyə gətirilməsi sahəsində də müəyyən iş görülmüşdür. Artıq bu əlyazmaların bir hissəsi Böyük Britaniya, Almaniya, Avstriya, Rusiya, Fransa və s. ölkələrin muzeylərindən gətirilərək nümayiş etdirilməsi üçün inşası başa çatmaqda olan Nizami muzeyində guşə yaradılır. Muzeyin zənginləşdirilməsi üçün digər eksponatların da əldə edilməsi istiqamətində işlər həyata keçirilir.
Müzakirələr zamanı bildirilmişdir ki, dövlət başçısının diqqət və qayğısı sayəsində dahi söz ustasının məqbərəsi də əsaslı şəkildə təmir edilmiş, 37 hektar ərazidə 50 min ağac əkilmiş, 4 hovuz, 2 şəlalə və 1 süni göl yaradılmışdır. Hazırda ərazidə abadlıq və yenidənqurma işləri sürətlə davam etdirilir.
Müzakirələrdə nizamişünas alimlər Xəlil Yusifli, Süsənbər Məmmədova, şəhər mədəniyyət və turizm idarəsinin rəisi Sənan Hacıyev, şəhərin baş rəssamı Şərif Sərifov, Gəncə Dövlət Universitetinin kafedra müdiri Sevda Qurbanəliyeva, şəhər təhsil idarəsinin rəisi Zakir Hüseynov və başqaları çıxış edərək dünya poeziyasının günəşi Nizami Gəncəvinin 870 illik yubileyi ilə əlaqədar görülən işlərdən danışmış, sentyabrın üçüncü ongünlüyündə keçiriləcək yubiley tədbirləri ilə əlaqədar arzu və təkliflərini bildirmişlər.
Müşavirədə Gəncədəki İmamzadə ziyarətgahının, “Səbiskar” məzarlığının və Şəhidlər xiyabanının əsaslı təmiri ilə bağlı müzakirələr də aparılmışdır. Qeyd edilmişdir ki, artıq xeyli vaxtdır dövlət başçısının diqqət və qayğısı sayəsində İmamzadə ziyarətgahı tamamilə yenidən qurulur. Burada insanların rahat ziyarəti üçün demək olar ki, hər bir şərait yaradılır. Yüksək peşəkarlıqla aparılan təmir və yenidənqurma işlərinin gedişi ilə maraqlanan dövlət başçısı və onun xanımı, Heydər Əliyev Fondunun prezidenti, UNECKO və İSESCO-nun xoşməramlı səfiri, Milli Məclisin deputatı Mehriban Əliyeva bir neçə dəfə burada olmuş və öz tövsiyələrini də vermişlər.
“Səbiskar” məzarlığı isə demək olar ki, Gəncənin tarixini özündə yaşadan yerlərdəndir. 300 ildən artıq yaşı olan məzarlıqda 100-dən artıq tarixi abidə, türbələr, kitabələr və xəttatlıq nümunələri vardır. Bundan əlavə, burada bir çox tarixi şəxsiyyətlərin, eləcə də Azərbaycan Xalq Cümhuriyyəti rəhbərlərinin, Şeyx Nizami səcərəsinə məxsus olan görkəmli şəxsiyyətlərin məzarları vardır ki, onlar da uzun illərin təbii aşınmaları nəticəsində məhv olmaq təhlükəsi ilə üzləşmişdir.
Çıxış edənlər bu tarixi abidənin qorunmasının vacibliyindən danışmış, tarixi şəxsiyyətlərin türbələrinin, eləcə də sərdabələrinin öyrənilməsi, bərpası və yenidən qurulması üçün arzu və təkliflərini vermiş, bu işdə bütün gəncəlilərin iştirakının vacibliyini vurğulamışlar.
Müşavirədə Şəhidlər xiyabanında görülən işlərə də münasibət bildirilmişdir. Qeyd edilmişdir ki, torpaqlarımızın bütövlüyü uğrunda şəhid olmuş mərd oğullarımızın uyuduqları məzarlıq yenidən qurulmuş, burada “Əbədi məşəl” abidəsi ucaldılmışdır. Hazırda xiyabanda abadlıq və quruculuq işləri davam etdirilir.
Müşavirədə çıxış edən şəhər ictimaiyyətinin nümayəndələri milli-mənəvi dəyərlərimizə hörmətlə yanaşdığına, onun qorunması və yaşadılması istiqamətində göstərdiyi diqqət və qayğıya görə dövlət başçısına minnətdarlıq ifadə etmişlər.