2008-ci il oktyabrın 15-də keçirilmiş Azərbaycan Respublikası Prezidentinin seçkiləri ilə bağlı bu il oktyabrın 21-də Fransa Respublikasının Bakıdakı səfirliyi tərəfindən Avropa İttifaqının Prezidentliyi adından bəyanat yayılmışdır.

Azərbaycan Respublikasının Mərkəzi Seçki Komissiyası Avropa İttifaqı Prezidentliyinin bu mövqeyindən təəssüflənərək bəyan edir ki, Azərbaycanda keçirilmiş Prezident seçkilərini 50.000-ə qədər yerli, 100-dən çox beynəlxalq nüfuzlu qurumları təmsil edən 1250 beynəlxalq müşahidəçi izləmişdir. Müşahidəçilərin 409 nəfəri ATƏT-i, 34 nəfəri Avropa Şurasının Parlament Assambleyasını, 27 nəfər Avropa İttifaqını və Avropa Parlamentini təmsil etmişlər. Bundan başqa, 183 müşahidəçi Seçki Müşahidəçilərinin Dünya Şəbəkəsini, 100-ə yaxın müşahidəçi Avropa İttifaqına daxil olan ölkələrin parlamentlərini təmsil etmişlər.

Seçkilərin yekunları ilə bağlı ATƏT-in, Avropa Şurasının və Avropa Parlamentinin 2008-ci il oktyabrın 16-da yayılmış bəyanatında qeyd edilir ki, "seçkilər ATƏT və Avropa Şurası qarşısında olan öhdəliklərə və digər beynəlxalq standartlara cavab verməkdə əhəmiyyətli tərəqqi nümayiş etdirmişdir". Eyni zamanda, bəyanatda qeyd edilirdi ki, "seçkilər bütün öhdəliklərə tam cavab verməmişdir".

Avropa Şurası Parlament Assambleyasının müşahidə missiyasının rəhbəri Andres Herkel Prezident seçkiləri ilə bağlı bu il oktyabrın 16-da keçirilən mətbuat konfransında vurğulamışdır ki, кеçən seçkilərlə müqayisədə bu il keçirilən Prezident seçkilərində seçkilərin idarə edilməsində gözəçarpacaq dərəcədə irəliləyişlər olmuşdur. Eyni zamanda, o, bir sıra çatışmazlıqların olmasını qeyd etmişdir.

Avropa Şurası Nazirlər Komitəsinin sədri, İsveçin xarici işlər naziri Karl Bildt müxalifətin bir hissəsinin seçkilərə qatılmamasından təəssüflənsə də, qeyd etmişdir ki, "seçkilərin keçirilməsi zamanı qeydə alınmış müsbət irəliləyişləri alqışlayırıq".

Mərkəzi Seçki Komissiyasi təəccüblənir ki, Avropa İttifaqının Prezidentliyi adından yayılmış bəyanatda adları çəkilən və digər beynəlxalq qurumların seçkilərlə bütövlükdə və eyni zamanda seçkilərin ayrı-ayrı aspektləri ilə bağlı hesabatlarında rast gəlinməyən "seçkilər beynəlxalq standartlara cavab vermir" ifadəsi işlənilmişdir. Mərkəzi Seçki Komissiyası xatırlatmaq istərdi ki, Avropa İttifaqının xarici siyasət və təhlükəsizlik üzrə ali nümayəndəsi Havyer Solana Prezident seçkiləri ilə bağlı bəyanatında seçkilərin sakit şəraitdə, heç bir qanun pozuntusuna yol verilmədən və yaxşı təşkil olunmuş şəkildə keçdiyini qeyd edərək bildirmişdir ki, "müxalifətdən olan namizədlər üçün daha ədalətli şərait yaradılması məni razı salıb". Avropa İttifaqı Avropa Komissiyasının xarici əlaqələr və Avropa Qonşuluq Siyasəti üzrə ali komissarı Benita Ferrero-Valdner ATƏT-in seçkilərdə qeydə aldığı tərəqqini alqışlamış və eyni zamanda, müxalifətdən olan namizədlərin seçkilərdə iştirakı üçün daha yaxşı şəraitin yaradılmasını müsbət qiymətləndirmişdir.

Beləliklə, Avropa İttifaqı Prezidentliyinin yaydığı bəyanat mahiyyət etibarı ilə əsasları məlum olmayan səbəblərdən bir tərəfdən Prezident seçkilərini izləmiş çoxminli müşahidəçilər korpusunun, digər tərəfdən isə Avropa İttifaqının yüksək vəzifəli şəxslərinin mövqeyinin üstündən qara xətt çəkir.

Azərbaycan Respublikasının Mərkəzi Seçki Komissiyası hesab edir ki, bu ilin əvvəllərində qonşu ölkələrdə keçirilən seçkilərlə bağlı Avropa İttifaqı tərəfindən göndərilən təbrik məktubları ilə müqayisədə Azərbaycanda keçirilən seçkilərə aid bu mövqe ən azı anlaşılan deyildir.

Azərbaycan Respublikasında keçirilmiş Prezident seçkilərinə Avropa İttifaqı Prezidentliyinin bu cür mövqeyi Azərbaycan Respublikası seçicilərinin iradəsinə hörmətsizlik nümayiş etdirdiyinə görə bizdə dərin təəssüf hissi doğurmaya bilməz.

Azərbaycan Respublikasının

Mərkəzi Seçki Komissiyası.