RƏSMİ XRONİKA
AZƏRBAYCAN RESPUBLİKASININ PREZİDENTİ ZATİ-ALİLƏRİ İLHAM ƏLİYEV VƏ İORDANİYA HAŞİMİLƏR KRALLIĞININ KRALI ƏLAHƏZRƏT II ABDULLAH İBN ƏL HÜSEYN ARASINDA KEÇİRİLMİŞ GÖRÜŞDƏN SONRA QƏBUL EDİLMİŞ BİRGƏ BƏYANNAMƏ
Zati-aliləri Prezident İlham Əliyev Əlahəzrət Kral II Abdullahın Azərbaycana iki qardaş ölkə arasında əlaqələrin möhkəmləndirilməsinə xidmət edən səfərini alqışlayır. İordaniya ilə Azərbaycan arasında diplomatik münasibətlər qurulmasının 15-ci ildönümü ilə əlaqədar olaraq, Tərəflər iki ölkə arasında son illərdə əlaqələrin sürətlə inkişaf etməsini və dərinləşməsini razılıqla qeyd edirlər.
Bu, özünü ən yüksək səviyyədə rəsmi şəxslərin səfər mübadilələrində, hər iki ölkənin paytaxtlarında səfirliklərin açılmasında, Əmmanla Bakı arasında birbaşa müntəzəm hava uçuşlarının təşkil edilməsində və iki ölkə arasında iqtisadi, siyasi və mədəni əlaqələrin daha da möhkəmləndirilməsinə və genişləndirilməsinə yönəlmiş səylərin intensivləşdirilməsində təzahür etdirir.
Tərəflər, Azərbaycan ilə İordaniya arasında möhkəmlənən dostluq münasibətlərini, eləcə də beynəlxalq məsələlərlə əlaqədar öz ölkələrinin üst-üstə düşən maraqlarını məmnunluqla qeyd edirlər.
Tərəflər, müxtəlif iqtisadi və ticarət xarakterli tədbirlərin, o cümlədən hazırda Bakıda davam edən İordaniyanın ticarət sərgisi və son bir il ərzində biznes heyətlərinin səfər mübadiləsinin həyata keçirilməsi də daxil olmaqla, hər iki ölkənin özəl sektorları arasında əlaqələrin inkişafının sürətlənməsindən xüsusi məmnunluqlarını ifadə etdilər.
Tərəflər, hər iki ölkənin özəl sektorlarını çox əlverişli siyasi əlaqələr, hüquqi və institusional çərçivələrdən, habelə ticarətin və iqtisadi mübadilənin genişləndirilməsinə xidmət etmək üçün yaradılmış nəqliyyat imkanlarından istifadə etməyə çağırırlar.
Tərəflər, eyni zamanda, bu gün ikiqat vergiqoymanın aradan qaldırılması və investisiyaların təşviqi və qorunması sazişlərinin imzalanmasını alqışlayırlar.
Hər iki lider, həmçinin neft və qaz kəşfiyyatı, nəqliyyat, kənd təsərrüfatı, təhsil və xidmətlər sahəsində də əməkdaşlığın davam etdirilməsi barədə razılığa gəlirlər.
Tərəflər, BMT və onun ixtisaslaşmış strukturları çərçivəsində əməkdaşlığı bundan sonra da davam etdirəcəklərini təsdiq edirlər və beynəlxalq münaqişələrin həllində BMT-nin rolunun gücləndirilməsinin vacibliyini vurğulayırlar.
Prezident İlham Əliyev İordaniyanın BMT və İKT çərçivəsində Azərbaycanın mövqeyinin dəstəklənməsini davam etdirməsini yüksək qiymətləndirmişdir.
Tərəflər, Azərbaycan Respublikası ilə İordaniya Haşimilər Krallığı arasında beynəlxalq təşkilatlar, o cümlədən İKT çərçivəsində mövcud əməkdaşlığın davam etdirilməsi, həmin təşkilatlar çərçivəsində qarşılıqlı maraq kəsb edən məsələlər üzrə bir-birinin mövqelərinin dəstəklənməsi və əlaqələndirilməsi barədə razılığa gəldilər.
Tərəflər, regional və qlobal təhlükəsizliyin möhkəmləndirilməsinə, əməkdaşlığın bütün sahələrində qarşılıqlı münasibətlərin inkişafına yönəlmiş siyasi məsləhətləşmələrin, sıx əlaqələrin və birgə fəaliyyətin inkişafının davam etdirilməsinin zəruriliyini təsdiq edirlər.
Tərəflər, iki ölkənin qanunverici və icra orqanları arasında əlaqələrin dərinləşməsinə və bu məqsədə nail olmaq üçün səfərlərin, təcrübə mübadilələrinin genişləndirilməsinə və bütün sahələrdə əməkdaşlığın həyata keçirilməsinə xüsusi əhəmiyyət verirlər.
Tərəflər, aralarındakı iqtisadi və siyasi münasibətlərin hərtərəfli inkişafının etibarlı əsası kimi, iki dövlət arasında hüquqi çərçivənin möhkəmlənməsini məmnuniyyətlə qeyd edirlər.
Tərəflər, regionlararası nəqliyyat dəhlizləri, o cümlədən tarixi Böyük İpək yolunun, Şərq-Qərb, Şimal-Cənub nəqliyyat dəhlizləri layihələrinin bərpasının regionun iqtisadi və sosial inkişafında rolunu və sivilizasiyalar arasında dialoqun dərinləşməsində əhəmiyyətini xüsusi qeyd etdilər.
Tərəflər, həmçinin Bakı-Tbilisi-Ceyhan neft boru kəmərinin və Bakı-Tbilisi-Ərzurum qaz kəmərinin iqtisadi inkişaf, regional sabitlik və beynəlxalq enerji təhlükəsizliyi istiqamətində oynadığı strateji rolu qeyd etdilər.
Tərəflər, Avropa və Asiya arasında nəqliyyat-kommunikasiya əlaqələrinin inkişafını və yük daşımalarının genişləndirilməsini regional əməkdaşlığın mühüm addımı hesab edir və Bakı-Tbilisi-Qars yeni birbaşa birləşdirici dəmir yolu xəttinin yaradılmasının əhəmiyyətini qeyd edirlər.
Tərəflər, aqressiv separatizmin artan təhlükəsini qeyd edərək, terrorizm də daxil olmaqla, separatist rejimlərin silah və insan alveri, narkotik maddələrin istehsalı və yayılması, beynəlxalq təhlükəsizlik və sabitliyi təhdid edən digər cinayətkar fəaliyyətləri ilə əlaqədar narahatlıq ifadə etdilər, beynəlxalq birliyi bu cür fəaliyyətlərə qarşı zəruri tədbirlər görməyə çağırdılar.
Tərəflər, beynəlxalq səviyyədə tanınmış sərhədlərin dəyişdirilməsi məqsədi ilə zor işlətməyin və zor işlətməklə hədələmənin qəbuledilməzliyini bir daha təsdiq edir və bildirirlər ki, beynəlxalq birliyin bütün təcavüz aktlarına, eləcə də dövlətlərin suverenliyi və ərazi bütövlüyünə zərər yetirən bütün fəaliyyətlərə qarşı yönəlmiş qətiyyətli səylərinin birləşdirilməsi qlobal təhlükəsizliyin təminatının əsas amilidir.
Tərəflər, BMT Baş Məclisinin “Azərbaycanın işğal olunmuş ərazilərində vəziyyət” adlı qətnaməsinin Ermənistan-Azərbaycan, Dağlıq Qarabağ münaqişəsinin sülh yolu ilə həll edilməsinə mühüm töhfə verəcəyindən məmnunluqlarını ifadə edərək, münaqişənin Azərbaycan Respublikasının suverenliyi, ərazi bütövlüyü və sərhədlərinin toxunulmazlığı əsasında tezliklə həllinin vacibliyini vurğuladılar.
Onlar, eyni zamanda, İsrail-Fələstin münaqişəsinin BMT TŞ qətnamələrinə və Yaxın Şərqdə sülh naminə Yol Xəritəsinə və 2002-ci il Ərəb Sülh Təşəbbüsünə uyğun olaraq, ədalətli həllinə və Yaxın Şərqdə sülh və sabitliyə nail olunmasına yönəlmiş bütün səylərə dəstək verdiklərini vurğulayırlar.
Hər iki tərəf təsdiq etdilər ki, münaqişənin yalnız ədalətli və daimi həlli çərçivəsində İsrail ilə yanaşı sülh və təhlükəsizlik şəraitində yaşayan müstəqil Fələstin dövlətinin yaradılması hər iki xalqın hüquq və maraqlarına cavab verə bilər. Hər iki Tərəf razılığa gəlmişdir ki, sülh prosesinə beynəlxalq dəstək verilməsi, tərəflərin yekun statusun müəyyən edilməsinə dair danışıqlar zamanı ortaya çıxan maneələrin aradan qaldırılmasına yardım göstərilməsi üçün əhəmiyyətlidir.
İraqdakı vəziyyətlə bağlı hər iki Tərəf İraqda milli birliyə və sabitliyə nail olunmasına yönəlmiş səylərə öz dəstəklərini ifadə etmiş və İraq cəmiyyətinin bütün tərkib hissələrinin iştirakı ilə vahid İraq çərçivəsində təhlükəsizlik və sabitliyin bərqərar olmasının zəruriliyini vurğulamışlar.
Tərəflər, terrorizmlə mübarizədə daha səmərəli tədbirlərin həyata keçirilməsinin və bu istiqamətdə beynəlxalq səylərin möhkəmləndirilməsinin, həmçinin terrorizmlə mübarizədə birgə əməkdaşlığın genişləndirilməsinin zəruriliyini vurğuladılar.
İki lider ekstremizmin artmasından və müsəlman cəmiyyətlərində radikal ideologiyaların inkişafını pərdələmək üçün İslamın adından sui-istifadə edilməsindən narahat olduqlarını bir daha bildirir və İslamın fundamental əxlaq və prinsipləri olan mötədilliyin, rəhmliliyin, zorakılıq və terrorizmin inkar edilməsinin izah olunması üçün ərəb və İslam dövlətləri arasında əlaqələndirmənin gücləndirilməsinin vacibliyini vurğulayırlar.
Tərəflər, bu Birgə Bəyannamənin Azərbaycan və İordaniya arasında münasibətlərin inkişaf etdirilməsinə və hərtərəfli genişlənməsinə təkan verəcəyinə əminliklərini ifadə edirlər.
Bakı, 5 may 2008-ci il.