MƏDƏNİYYƏT
Azərbaycan rəssamları Moskvada keçirilən VI Beynəlxalq “Ənənələr və müasirlik” İncəsənət Festivalında iştirak edirlər
Bakı, 4 iyul (AZƏRTAC). Moskvada, “Manej” Mərkəzi Sərgi Salonunda “Ənənələr və müasirlik” adlı VI Beynəlxalq İncəsənət Festivalının açılış mərasimi olmuşdur. Festivalın təşkilatçısı Moskva mədəniyyət departamentinin, Rusiya Federasiyası Dövlət Dumasının Mədəniyyət Komitəsinin, “World for Cultur and Peace” Beynəlxalq Fondunun və Rusiya Rəssamlıq Akademiyasının dəstəyi ilə UNESCO-nun himayəsi altında Mədəniyyətə və müasir incəsənətin inkişafına yardım üzrə Moskva İctimai Fondudur.
Festivalın beynəlxalq münsiflər heyətinə SSRİ, Rusiya və Azərbaycanın Xalq Rəssamı, Rusiya Rəssamlıq Akademiyasının vitse-prezidenti Tahir Salahov başçılıq edir. Festivalda onun da əsərləri nümayiş etdirilir.
Festivalda Azərbaycan incəsənətini ən perspektivli rəssamlar - Məryəm Ələkbərli və Rəşad Mehdiyev təmsil edirlər.
Təşkilatçıların fikrincə, festival çərçivəsində art-səmada yeni ulduz parlamışdır - gənc və istedadlı azərbaycanlı rəssam Məryəm Ələkbərli. Moskva Müasir İncəsənət Muzeyində M.Ələkbərlinin sərgisinin kuratoru Olqa Sviblova rəssamın yaradıcılığının parlaq xarakteristikasını vermişdir: “Məryəm incəsənətlə və incəsənətdə yaşayır. O, incəsənət vasitəsilə özünü kəşf edib və onu dünya ilə ünsiyyətinin başlıca vasitəsinə çevirib. Ola bilsin ki, məhz buna görə onun bədii mesajı bu qədər güclü və inandırıcıdır. Rəssamın əsərləri müasir incəsənət həvəskarlarında çox böyük maraq doğurmuşdur. Sərginin açılışına gələn tamaşaçılar isə bir nəfər kimi Məryəmin üslubunu böyük Matisin üslubu ilə müqayisə etmişlər”.
Sərgidə Azərbaycanı daha bir tanınmış rəssam, Dövlət Rəssamlıq Akademiyasının müəllimi, fəlsəfə elmləri doktoru Rəşad Mehdiyev təmsil edir. “Ənənələr və müasirlik” festivalı çərçivəsində Moskvada onun ilk sərgisi Mədəniyyət və Turizm Nazirliyinin, Azərbaycanın Rusiyadakı səfirliyinin dəstəyi ilə həyata keçirilmişdir. Onun rəsmləri tamaşaçıları valeh etmiş, istər tanınmış sənətşünaslarda, istərsə də sıravi rəsm həvəskarlarında canlı maraq doğurmuşdur.
Sərgini açan Rusiya Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy incəsənət festivalını əlamətdar hadisə adlandırmışdır. O, xüsusilə qeyd etmişdir ki, gözəl rəssamların iştirakı ilə təşkil olunmuş sərgi görkəmli rəssam Tahir Salahovun rəhbərliyi altında keçirilir. İki mədəniyyətə məxsus olan rəssamın yaradıcılığı bu festivalın adında öz əksini tapmışdır: ənənələr və müasirlik. M.Şvıdkoyun sözlərinə görə, bu festival öz zəruriliyini sübut etmişdir. Bu isə çox vacibdir, çünki insanlar müxtəlif - ənənəvi və çox müasir, radikal sənət kontekstində yaşayırlar. O demişdir: Burada müxtəlif nəsillərin sənətkarları, müxtəlif estetik baxışlar təmsil olunmuşdur və zənnimcə, sərginin gözəlliyi də bundadır”.
Festivalın keçirilməsini yüksək qiymətləndirən Azərbaycanın Rusiyadakı səfiri Polad Bülbüloğlu qeyd etmişdir ki, belə layihələr mədəniyyətlərimizi yaxınlaşdıran, qarşılıqlı mədəni əlaqələri gücləndirən, MDB-nin Humanitar Əməkdaşlıq Fondunun hərtərəfli dəstəklədiyi mühüm inteqrasiya prosesidir. Festival iştirakçılarına uğurlar arzulayan səfir demişdir: “Biz bu festivalı həmişə dəstəkləmişik, bundan sonra da dəstəkləyəcəyik. Düşünürəm ki, Tahir Salahov kimi görkəmli sənətkarın və gənc rəssam Məryəм Ələkbərlinin pavilyonlarının yan-yana olması çox önəmlidir. Bu, müxtəlif mədəniyyətlər, müxtəlif dəst-xətlərdir. Lakin bütün bunlar hamımızı zənginləşdirir.
Rusiya Rəssamlıq Akademiyasının vitse-prezidenti Tahir Salahov bildirmişdir ki, festivalda 30-dan çox ölkə iştirak edir. Bu festivalda görüşmək müxtəlif ölkələri təmsil edən rəssamlar üçün böyük sevincdir. Dünya şöhrətli rəssam xüsusi vurğulamışdır ki, burada incəsənətlə nəfəs alan müxtəlif nəsillərdən olan rəssamların əsərləri nümayiş etdirilir. Salahov demişdir: “Bizim görüşməyimiz, yaradıcılıq təcrübəmizi bölüşməyimiz üçün məkanın olması böyük xoşbəxtlikdir”.
Festivalın təşkilatçısı, Moskva Mədəniyyətə və Müasir İncəsənətin İnkişafına İctimai Yardım Fondunun prezidenti Vera Kisilyova bu layihəni dəstəklədiklərinə görə iştirakçılara minnətdarlığını bildirmişdir. Qeyd etmişdir ki, bu layihənin məqsədi müasir incəsənətdə yeni adların üzə çıxmasının, istedadlı rəssamların dəstəklənməsidir. Özü də təkcə tanınmış ustaları yox, həm də sənətə yeni qədəm qoyan rəssamları.
Rusiya Federasiyası Prezidentinin Mərkəzi Federal Dairədə səlahiyyətli nümayəndəsinin köməkçisi Anton Malışov xalqların yaxınlaşmasına yönəlmiş belə layihələrin dəstəkləndiyini qeyd etmişdir.
Moskva İctimai Yardım Fondu Himayədarlar Şurasının sədri Mark Leyvikov, İsrailin Rusiyadakı səfiri Doret Qolender də festivala və rəssamlara müvəffəqiyyət arzulamışlar.
Qeyd etmək lazımdır ki, festivalın ideyası müxtəlif ölkə və xalqların mədəniyyətini yaxınlaşdırmaq, milli kolorit və ənənələri əks etdirən əsərləri təqdim etmək, dünya incəsənətinin geniş palitrasını göstərmək, müasir mədəniyyətin bütün ənənə və istiqamətlərini bir sərgi məkanında birləşdirməkdir.
Asya Hacızadə
AZƏRTAC-ın xüsusi müxbiri
Moskva