Kişilər arasında boks yarışının dördüncü günü Azərbaycanın ən ağır çəkili boksçusu, ikiqat dünya və Avropa çempionu, Olimpiya Oyunlarının bürünc mükafatçısı Məhəmmədrəsul Məcidovun parlaq qələbəsi ilə əlamətdar olub. 91 kiloqramdan yuxarı çəki dərəcəsində mübarizə aparan təmsilçimiz gürcüstanlı Mixeil Baxtidzeyə 3:0 hesabı ilə qalib gələrək adını dörddəbir finala yazdırıb.

Azərbaycanın birinci xanımı, “Bakı-2015” ilk Avropa Oyunları Təşkilat Komitəsinin sədri Mehriban Əliyeva, Heydər Əliyev Fondunun vitse-prezidenti Leyla Əliyeva və Arzu Əliyeva boksçumuzun qələbəsini tribunadan izləyiblər.

21:46

Avropa çempionu, Olimpiya Oyunlarının bürünc mükafatçısı Teymur Məmmədov boks yarışlarında növbəti görüşünü keçirib. Onun budəfəki rəqibi polşalı Jordan Kulinski olub. Boksçumuz döyüşü 3:0 hesabı ilə xeyrinə başa vuraraq ardıcıl ikinci qələbəsini qazanıb və dörddəbir final mərhələsinə adlayıb.

19:50

Mübarizəyə səkkizdəbir final mərhələsindən başlayan Leyla Cavadova çıxış etdiyi 69-75 kq çəki dərəcəsində rusiyalı Yaroslava Yakuşinaya 0:2 hesabı ilə məğlub olaraq mübarizəni dayandırıb.

18:25

Günün ikinci yarısı 48-51 kiloqram çəki dərəcəsində çıxış edən qadın boksçuların mübarizəsi ilə başlayıb.

Axşam seansında Azərbaycanın daha üç boksçusu rinqə çıxacaq. İdmançılarımızdan ilk olaraq rinqə 69-75 kiloqram çəki dərəcəsində təmsil olunan qadın boksçu Leyla Cavadova çıxacaq. Onun rəqibi Rusiya idmançısı Yaroslava Yakuşina olacaq.

Kişi boksçuların yarışında isə tamaşaçılar daha iki idmançımızın çıxışına azarkeşlik edəcəklər. 81 kiloqramda Avropa çempionu, Olimpiya Oyunlarının bürünc mükafatçısı Teymur Məmmədov polşalı Jordan Kulinskidən üstün olmağa çalışacaq. 91 kiloqramdan yuxarı çəki dərəcəsində isə ikiqat dünya və Avropa çempionu, Olimpiya Oyunlarının bürünc mükafatçısı Məhəmmədrəsul Məcidov gürcüstanlı Mixeil Baxtidze ilə münasibətlərinə aydınlıq gətirəcək.

Günün ikinci yarısında səkkizdəbir final mərhələsində 48-51, 69-75 (qadınlar), 56, 81 və 91+ (kişilər) kiloqram çəki dərəcələrində ümumilikdə 20 görüş keçiriləcək.

17:11

“Bakı-2015” ilk Avropa Oyunlarında çıxış edən boksçularımızdan daha birinin rəqibi məlum olub.

Yarışda 46-49 kiloqram çəki dərəcəsində mübarizə aparan dünya və Avropa çempionu Salman Əlizadənin rəqibi səkkizdəbir finalda bolqarıstanlı Tinko Banakanovu məğlubiyyətə uğradan İrlandiya boksçusu Brendan İrvin olacaq.

Görüş iyunun 22-də baş tutacaq.

Salman Əlizadə yarışa birbaşa olaraq dörddəbir finaldan qoşulacaq.

16:44

“Bakı-2015” ilk Avropa Oyunlarında çıxış edən boksçularımızdan daha birinin rəqibi məlum olub.

Yarışda 49 kiloqram çəki dərəcəsində mübarizə aparan dünya və Avropa çempionu Salman Əlizadənin rəqibi səkkizdəbir finalda bolqarıstanlı Tinko Banakanovu məğlubiyyətə uğradan İrlandiya boksçusu Brendan İrvin olacaq.

Görüş iyunun 22-də baş tutacaq.

Qeyd edək ki, Salman Əlizadə yarışa birbaşa olaraq dörddəbir finaldan qoşulacaq.

15:34

Avropa çempionatının gümüş mükafatçısı Tayfur Əliyev səkkizdəbir final mərhələsində rumıniyalı Nikolae Andreiana ilə üz-üzə gəlib.

Azərbaycan təmsilçisinin üstünlüyü şəraitində keçən görüş 3:0 hesabı ilə boksçumuzun xeyrinə başa çatıb.

13:43

Boks yarışlarının beşinci günündə Azərbaycanın beş boksçu rinqə çıxacaq.

AZƏRTAC xəbər verir ki, ilk olaraq “Baku Cristall Hall”da rinqə Azərbaycan boksçularından 51 kiloqram çəki dərəcəsində Anaxanım Ağayeva çıxıb. Lakin o, birinci Avropa Oyunlarında ilk görüşündə Avropa çempionatının gümüş mükafatçısı polşalı Sandra Drabikə 0:3 hesabı ilə məğlub olaraq mübarizəni dayandırıb.

Digər boksçumuz Tayfur Əliyev də (56 kq) yarışa səkkizdəbir final mərhələsindən qoşulacaq. Gənc boksçumuz ispaniyalı Dieqo Ferrer Pereyranı məğlub edən Nikolae Andreiana (Rumıniya) ilə üz-üzə gələcək. Görüş saat 15.00-da keçiriləcək.

Daha bir xanım təmsilçimiz Leyla Cavadova mübarizəyə saat 19.00-da qoşulacaq. O, 75 kiloqram çəki dərəcəsində rusiyalı boksçu Yaroslava Yakuşina ilə qarşılaşacaq.

Bu dəfə 81 kiloqram çəki dərəcəsində çıxış edəcək Avropa çempionu, Olimpiya Oyunlarının bürünc mükafatçısı Teymur Məmmədov isə bu mərhələdə Polşa idmançısı Jordan Kulinski ilə görüşəcək. Teymur Məmmədov birinci Avropa Oyunlarında çıxışına onaltıdabir final mərhələsindən başlayıb.

Əsas medal ümidlərimizdən ikiqat dünya çempionu, Olimpiya Oyunlarının bürünc mükafatçısı Məhəmmədrəsul Məcidov da səkkizdəbir finalda mübarizəyə qoşulacaq. Komandamızın kapitanı ukraynalı Vladislav Sirenkonu məğlub edən gürcüstanlı Mixail Baxtidze ilə saat 21.45-də qarşılaşacaq.

13:23

Bakı, 19 iyun, A.Yadigarov, S.Allahverdiyeva, AZƏRTAC

İyunun 19-da - boks yarışlarının dördüncü günündə “Baku Cristal Hall”da “Bakı-2015” ilk Avropa Oyunlarında qadın idmançıların mübarizəsinə start verilib.

AZƏRTAC xəbər verir ki, günün ilk yarısında səkkizdəbir final mərhələsində 48-51 və 69-75 kiloqram çəki dərəcələrində qadın, 46-49, 56 və 81 kiloqram çəki dərəcələrində isə kişi boksçular rinqə çıxacaqlar.

Günün birinci yarısında 48-51 kiloqramda çıxış edən Azərbaycanın qadın boksçusu Anaxanım Ağayeva mübarizəyə qoşulacaq. Onun rəqibi polşalı Sandra Drabik olacaq.

Səhər seansında Azərbaycan kişi boksçuların mübarizəsində də təmsil olunacaq. Avropa çempionatının gümüş mükafatçısı Tayfur Əliyev rumıniyalı Nikolae Andreana ilə qarşılaşacaq.

Günün birinci yarısında ümumilikdə 16 görüş keçiriləcək.