CƏMİYYƏT
Azərbaycanın ərəb dünyasında nüfuzu daha da artır
Qahirə, 26 iyul, AZƏRTAC
İkinci Qarabağ müharibəsindən sonra Yaxın Şərqin və Körfəzin ərəb ölkələrində nüfuzu daha da artıb. Artıq Səudiyyə Ərəbistanı, Misir, Birləşmiş Ərəb Əmirlikləri kimi regional güclər ölkəmizlə sıx əməkdaşlıq istiqamətində mühüm addımlar atır, nəhəng layihələr həyata keçirirlər.
Etiraf etmək lazımdır ki, 44 günlük müharibədən əvvəl ərəb dövlətlərinin diplomatları və media nümayəndələri Azərbaycanla bağlı səthi məlumatlardan çıxış edir, bəziləri isə erməni təbliğatının yalanlarına daha çox yer ayırırdılar. Əlbəttə, ölkəmizin diplomatik nümayəndəlikləri ərazilərimizin 20 faizinin Ermənistan tərəfindən işğalı, Xocalı soyqırımı və 31 Mart – Azərbaycanlıların Soyqırımı Günü ilə bağlı mütəmadi silsilə tədbirlər keçirir, ərəb mediasında məqalələrlə çıxış edirdilər. Lakin bu təbliğat həmin ölkələrin geniş ictimaiyyətində çox vaxt biganəliklə qarşılanırdı.
Prezident İlham Əliyevin Qarabağın azadlığı uğrunda döyüşlərin getdiyi günlərdə diplomatik və informasiya müharibəsinə də rəhbərlik etməsi bu sahələrdə radikal dönüş yaratdı. Ərəb ölkələrinin “Əl Cəzirə”, “Əl Ərəbiyə”, “Əl Məmləkə” və digər nüfuzlu telekanalları dövlətimizin başçısının bəyanatları, xalq müraciətləri və müsahibələrinə geniş yer ayırır, eyni zamanda, geniş oxucu auditoriyasına malik olan qəzetlər və portallar Ordumuzun cəbhədə qazandığı uğurları ətraflı işıqlandırırdı.
Həmin günlərdə Misir, Səudiyyə Ərəbistanı, BƏƏ, İordaniya, Əlcəzair, Bəhreyn və digər ərəb ölkələrinin mətbuatında 5 mindən artıq xəbər, reportaj və məqalələr yayımlanıb. Dövlətimizin başçısının fəaliyyəti ilə bağlı AZƏRTAC-ın ərəb dilində hazırladığı xəbərlər, foto və videomaterialları MENA, SPA, APS, WAM, NNA və digər rəsmi agentliklər mütəmadi şəkildə yayırdılar. Müqayisə üçün qeyd edək ki, ərəb KİV-də Ermənistanın mövqeyini əks etdirən cəmi 5-6 material dərc olunmuş, bundan dərhal sonra həmin mətbu orqanları Azərbaycanın səfirliklərinin erməni yalanlarını ifşa edən bəyanatlarını dərc etmişdi. İnformasiya müharibəsində diaspor təşkilatları, xüsusən Misir, İordaniya və Küveytdəki soydaşlarımız da fəal iştirak ediblər.
İkinci Qarabağ müharibəsində İslam Əməkdaşlıq Təşkilatı, Müsəlman Liqası, Ərəb Dövlətləri Liqasının Azərbaycanın haqlı mövqeyini dəstəkləyən bəyanatları bütün dünyada təklənmiş işğalçı Ermənistana diplomatik zərbə oldu. Azərbaycanın şanlı Zəfəri isə ərəb ölkələrində böyük məmnunluqla qarşılandı, dövlət və hökumət başçıları, siyasi, ictimai, dini xadimlər bu münasibətlə Prezident İlham Əliyevə təbrik məktubları ünvanladılar. Bu məqamda Ermənistanın keçmiş prezidenti Armen Sarkisyanın Səudiyyə Ərəbistanı və BƏƏ-yə səfərlərini xatırlatmaq yerinə düşər. Onun bu ölkələrə səmərəsiz səyahətinin əsas məqsədi rəsmi Ər-Riyadla diplomatik münasibətlər qurmaq, həmçinin Əbu-Dabidən sərmayələr qoparmaq idi. Məlum olduğu kimi, missiya uğursuzluqla nəticələndi və A.Sarkisyan bunu “Əl Ərəbiyə” telekanalına müsahibəsində də etiraf etdi.
Qeyd etmək lazımdır ki, postmüharibə dövründə Azərbaycan mediası və ərəb ölkələrindəki diaspor təşkilatlarının erməni vəhşiliyini göstərən kadrları və xəbərləri geniş ictimaiyyətə yayması, erməni təbliğat maşınının guya Qarabağda onlara məxsus olan, əslində, qədim Alban kilsələrinin dağıdılması haqqında feyk informasiyalarını ifşa etməsi, dağıdılmış və təhqir olunmuş, hətta donuz axuruna çevrilmiş məscidlərin nümayiş etdirilməsi erməni mənşəli jurnalistlərinin ərəb mətbuatına yolunu tamamilə bağlamış oldu. İndi heç bir İslam ölkəsinin ciddi mətbu orqanı müsəlmanların müqəddəs məkanlarını bu cür təhqir edənlərlə təmas qurmaq istəmir.
Azərbaycan dövləti informasiya müharibəsində qazandığı uğurları davam etdirir. İşğaldan azad edilmiş ərazilərdə geniş bərpa-quruculuq işləri ilə paralel olaraq dünyanın nüfuzlu siyasətçiləri, media nümayəndələri və iş adamlarının Qarabağa mütəmadi səfərləri ərəb mətbuatının ən çox gündəmində olan mövzulardır. Qoşulmama Hərəkatı və İƏT çərçivəsində son aylar təşkil olunan tədbirlərdə iştirak edən ərəb ölkələrinin beyin mərkəzlərinin rəhbərləri və media nümayəndələri öz ölkələrinin mətbuatında geniş analitik yazılar və məqalələrlə çıxış ediblər. Onlar dəfələrlə vurğulayıblar ki, Azərbaycan İslam aləmində son əsrdə torpaqlarını işğaldan azad edən yeganə ölkədir və bu Qələbə Prezident İlham Əliyevin sərkərdəlik, diplomatik məharəti sayəsində mümkün olub.
Ərəb dövlətlərinin Qalib ölkə olan Azərbaycanla iqtisadiyyat, turizm və enerji sahələrində əməkdaşlığı da gündən-günə inkişaf edir. Postmüharibə dövründə Səudiyyə Ərəbistanının “ACWA Power” şirkəti tərəfindən Azərbaycanda inşa ediləcək 240 MVt gücündə “Xızı-Abşeron” Külək Elektrik Stansiyasının təməlqoyma mərasiminin keçirilməsi mühüm hadisədir. Belə ki, Azərbaycana yatırılan 300 milyon dollara yaxın sərmayə “ACWA Power” şirkətinin Səudiyyə Ərəbistanı hüdudlarından kənarda qoyduğu ən iri sərmayədir. Bu ilin martında, həmçinin 230 MVt gücündə “Qaradağ” Günəş Elektrik Stansiyasının təməlqoyma mərasimi çərçivəsində BƏƏ-nin “Masdar” şirkəti ilə dörd anlaşma memorandumu imzalanıb. Bu sənədlər Azərbaycanda bərpa olunan enerjinin tətbiqini dəstəkləmək, eyni zamanda dənizdə külək enerjisindən istifadə, bu enerji hesabına “yaşıl hidrogen” istehsalı, karbon tutulması, istifadəsi və saxlanması, həmçinin digər tədbirləri əhatə edən interqrasiya olunmuş həllərə dair potensial əməkdaşlıq imkanlarını ehtiva edir. Bundan başqa, Misir, Bəhreyn, İordaniya şirkətləri Qarabağda aparılan tikinti-quruculuq işlərinə böyük maraq göstərir, müvafiq şirkətlər arasında danışıqlar gedir. Əməkdaşlığın daha bir prioritet istiqaməti də turizm sektorudur. Artıq Azərbaycan ərəb turistlərin sevimli istirahət məkanına çevrilib.
Bəli, indi Azərbaycan ərəb dünyasında ən populyar və etibarlı tərəfdaş kimi qəbul olunur. Bütün bu nailiyyətlər isə dövlətimizin başçısı, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında həyata keçirilən xarici siyasi kursun və informasiya siyasətinin nəticəsidir.
Oqtay Bayramov
AZƏRTAC-ın xüsusi müxbiri
Qahirə