SİYASƏT
AZƏRBAYCANIN MALAYZİYADAKI SƏFİRLİYİ “THE STAR” QƏZETİNDƏ ÇAP OLUNMUŞ MƏQALƏYƏ ETİRAZINI BİLDİRMİŞDİR
Malayziyanın “The Star” qəzetinin 17 oktyabr tarixli nömrəsində “Associated press” agentliyinə istinadən Azərbaycanda keçirilmiş prezident seçkiləri ilə bağlı məqalə dərc olunmuşdur.
Azərbaycanın Malayziyadakı səfirliyinin əməkdaşları məqalədəki qeyri-dəqiq məqamlarla əlaqədar qəzetin baş redaktoru Datuk Vong Chun Vai ilə əlaqə saxlamış və etirazını bildirmişlər. Qəzetin redaksiyası anlaşılmazlıqla bağlı üzr istəmiş və səfirliyin mövqeyini çap etməyə hazır olduğunu bəyan etmişdir.
Səfir Tahir Kərimov bununla bağlı baş redaktora açıq məktub ünvanlamışdır. Məktub qəzetin 4 noyabr tarixli nömrəsində dərc olunmuşdur.
“Azərbaycan seçkiləri Avropa İttifaqı standartlarına cavab verir” sərlövhəli məktubda bildirilmişdir ki, qəzetin 17 oktyabr tarixli nömrəsində dərc olunmuş məqalədə həqiqəti əks etdirməyən məqamlar vardır. Bu məqamlar ATƏT-in beynəlxalq qurumların ciddi etirazına səbəb olmuş bəyanatı ilə bağlıdır. Halbuki, Azərbaycanda seçkiləri izləyən Beynəlxalq Seçki Müşahidə Missiyası (BSMM) bildirmişdir: “Mərkəzi Seçki Komissiyası seçkiləri səmərəli formada təşkil etmiş, mətbuat və müşahidəçilər üçün açıq olmaqla tez-tez iclaslar keçirmiş, qərarları internet səhifəsində yerləşdirmiş, geniş miqyasda seçici təlimi kampaniyası və seçki rəsmiləri üçün seminarlar keçirmişdir”. Ən başlıcası, BSMM bildirmişdir ki, bu seçkiləri nəzərəçarpan dərəcədə irəliləyiş hesab etmək olar. Seçkilər ATƏT-in, Avropa Şurasının standartlarına və digər beynəlxalq standartlara cavab vermişdir.
İkinci, bir daha bəyan edirəm ki, Avropa dəyərlərini bölüşən Azərbaycan demokratik, dünyəvi dövlətdir və onun xarici siyasətinin əsas prioritetlərindən biri Avratlantik məkana inteqrasiyadır.
Bundan başqa, İlham Əliyevin prezidentliyinin birinci dövründə Azərbaycanda bütün sahələrdə sürətli inkişaf hamıya bəllidir.
Keçən illə müqayisədə 25 faiz artan iqtisadiyyatına görə Azərbaycan dünyanın lider dövlətləri arasında yer almışdır. Sosial-iqtisadi və humanitar sahələrdə bütün dövlət proqramları müvəffəqiyyətlə yerinə yetirilmiş və 2003-cü ildən bəri 700 min yeni iş yerləri açılmışdır”.
######