MƏDƏNİYYƏT
Azərbaycanlı rəssamlar Məryəm Ələkbərli və Rəşad Mehdiyev incəsənət sahəsində mötəbər “Vera” mükafatına layiq görülmüşlər
Moskva, 11 iyul (AZƏRTAC). İstedadlı Azərbaycan rəssamları Məryəm Ələkbərli və Rəşad Mehdiyev incəsənət sahəsində mötəbər “Vera” mükafatına layiq görülmüşlər.
Moskvanın “ET CETERA” teatrında “Ənənələr və müasirlik” altıncı Moskva Beynəlxalq incəsənət festivalının yekunlarına dair “Vera” mükafatının təntənəli təqdim olunma mərasimi keçirilmişdir.
Festival iyulun 4-10-da Moskvanın “Manej” sərgi salonunda təşkil olunmuşdur.
Təntənəli mərasimi Mədəniyyət və Müasir İncəsənətin Dəstəklənməsi İctimai Fondunun prezidenti Vera Kisilyova açaraq “Ənənələr və müasirlik” festivalının başa çatdığını bildirmişdir. O, Moskvada sənətini nümayiş etdirmiş bütün iştirakçıları təbrik etmişdir. V.Kisilyova bildirmişdir ki, festival müasir incəsənətdə yeni adların kəşf olunması məqsədi ilə keçirilir və bu il beynəlxalq münsiflər heyəti müxtəlif nominasiyalarda 22 qalib seçmişdir.
“World for Culture and Peace” Beynəlxalq Fondunun rəyasət heyətinin sədri Mark Leyvikov bildirmişdir ki, bu gün mükafatlar yaxşıların yaxşısına, ona layiq olanlara, incəsənət sahəsində öz sözünü demiş iştirakçılara təqdim ediləcəkdir.
Sonra mükafatların təqdim edilməsinə başlanmışdır. Azərbaycanın istedadlı rəssamı Məryəm Ələkbərliyə “Qızılgül, qızılgül, qızılgül” işinə görə rəssamlıq istiqamətində “Yeni baxışa görə” nominasiyasında bürünc heykəlcik və diplom təqdim olunmuşdur.
İncəsənət sahəsində öz tutarlı sözünü demiş Məryəm Ələkbərli mükafata görə təşəkkürünü bildirmişdir.
Sərginin birinci günündən təşkilatçılar deyirdilər ki, festival çərçivəsində incəsənət səmasında yeni ulduz - gənc və istedadlı Azərbaycan rəssamı Məryəm Ələkbərli parlamağa başlamışdır. Moskva Müasir İncəsənət Muzeyində M.Ələkbərlinin kuratoru Olqa Sviblova onun yaradıcılığını belə səciyyələndirmişdir: “Məryəm incəsənətlə yaşayır. Özünü incəsənətdə tapan rəssam əsərlərini dünya ilə başlıca ünsiyyət vasitəsinə çevirmişdir. Bəlkə buna görədir ki, onun rəsm mesajı belə güclü və inandırıcıdır”. Azərbaycanlı rəssamın işləri müasir incəsənətsevərlərdə böyük maraq doğurmuşdur. Sərginin açılışına gələnlərin hamısı Məryəmin üslubunu dahi Matisin üslubu ilə müqayisə etmişlər.
Digər istedadlı və özgür Azərbaycan rəssamı Rəşad Mehdiyev “Leyla” işinə görə “Rəssamlıq” istiqamətində “Milli özgürlüyə görə” nominasiyasında qalib gəlmişdir.
R.Mehdiyev yaradıcılığına verilən yüksək qiymətə görə münsiflər heyətinə təşəkkürünü bildirmişdir. Mötəbər münsiflər heyətinin fikrincə, Rəşad Mehdiyevin yaradıcılığında Azərbaycan rəngkarlığının ən yaxşı ənənələri və novatorluq birləşmişdir. Onun üslubunda xalis ənənəvi cizgilərlə yanaşı, yeni dil, yeni plastika, yeni ifadə üslubu sezilir.
Qaliblərə mükafatların təqdim olunması musiqili kompozisiyalarla müşayiət edilmişdir.
“Vera” bürünc heykəlciyi təsviri incəsənət sahəsində ilk mükafatdır. O, yaradıcılığa, sevgiyə və uğura inamın rəmzidir. “Vera” mükafatı nominatlar üçün özünə inamın parlaq təcəssümü və gələcək yaradıcılıq üçün təkandır. “Vera” obrazının yaradılması üzərində Rusiyanın Əməkdar rəssamı, Rusiyada və xarici ölkələrdə keçirilmiş bir çox müsabiqələr üçün mükafatların müəllifi olmuş Viktor Mitroşin işləmişdir.
2012-ci ildə mükafat 6 istiqamətdə 21 nominasiyada təqdim olunmuşdur. Mükafat uğrunda 30 ölkədən rəssamlar mübarizə aparmışlar. Görkəmli incəsənət xadimlərinin daxil olduqları beynəlxalq münsiflər heyətinə SSRİ, Rusiya və Azərbaycanın Xalq Rəssamı, SSRİ və Azərbaycan Dövlət mükafatları laureatı, Rusiya Rəssamlıq Akademiyasının vitse-prezidenti Tahir Salahov rəhbərlik etmişdir.
Asya Hacızadə
AZƏRTAC-ın xüsusi müxbiri
Moskva