ELM VƏ TƏHSİL
Bakı Ali Neft Məktəbində Dünya Azərbaycanlılarının Həmrəyliyi Günü qeyd edilib
Bakı, 25 dekabr, AZƏRTAC
Bakı Ali Neft Məktəbində (BANM) Dünya Azərbaycanlılarının Həmrəyliyi Günü və Yeni il münasibətilə tədbir keçirilib.
BANM-dən AZƏRTAC-a bildirilib ki, ali məktəbin rəhbərliyinin, professor-müəllim və inzibati heyətinin, tələbələrinin iştirak etdiyi tədbirdə əvvəlcə Azərbaycan Respublikasının dövlət himni səsləndirilib.
Tədbiri giriş sözü ilə açan rektor Elmar Qasımov bütün BANM ailəsini Dünya Azərbaycanlılarının Həmrəyliyi Günü və qarşıdan gələn Yeni il münasibətilə təbrik edib, onlara işlərində müvəffəqiyyətlər arzulayıb.
Rektor bildirib ki, dekabrın 31-i dünya azərbaycanlılarının həmrəylik bayramına çevrilib və bu bayram müxtəlif ölkələrdə yaşayan azərbaycanlılarla birlik və həmrəylik yaratmaq üçün böyük əhəmiyyətə malikdir.
“Yola salmaqda olduğumuz 2019-cu il ölkəmiz və xalqımız üçün əlamətdar illərdən biri oldu. Həyata keçirilən məqsədyönlü siyasət nəticəsində ölkəmizin dinamik inkişafı, beynəlxalq nüfuzu, xalqımızın rifahı daha da möhkəmlənib. Bu il neft-qaz sektoru üçün də uğurlu il kimi yadda qaldı. Əfsanəvi “Neft daşları”nın 70 illiyi, TANAP - Trans-Anadolu qaz kəmərinin istifadəyə verilməsi ilin önəmli enerji hadisəsi kimi tarixə düşdü. Enerji sektoru üçün yüksəkixtisaslı mühəndis kadrları hazırlayan ali təhsil ocağı kimi 2019-cu il Bakı Ali Neft Məktəbi üçün də uğurlu illərdən biri oldu. Ali məktəbimiz peşəkar, yüksək intellektual kadr hazırlığı missiyasını bu il də uğurla davam etdirdi”, - deyə rektor bildirib.
Qeyd olunub ki, Prezident İlham Əliyevin “2019/2020-ci tədris ilində Azərbaycan Respublikasının ali məktəblərinə daxil olan tələbələrə Prezident təqaüdünün verilməsi” haqqında Sərəncamına əsasən, Bakı Ali Neft Məktəbinin 23 tələbəsi Prezident təqaüdünə layiq görülərək birinci qrup üzrə ən yüksək nəticə nümayiş etdirib.
Rektor deyib: “Daxil olduğu qrup üzrə ən yüksək bal toplayan abituriyentlər cari tədris ilində də yenə BANM-i seçdi. 2019/2020-ci tədris ilində qəbul olan tələbələrin 103 nəfəri 650-dən çox bal toplayıb. Cari tədris ilində ali təhsil müəssisələrinə keçirilmiş qəbul imtahanlarının ixtisas seçimi nəticəsində Bakı Ali Neft Məktəbinin 2 ixtisası - İnformasiya təhlükəsizliyi - 673,5 bal, Proseslərin avtomatlaşdırılması mühəndisliyi - 657,8 bal olmaqla, növbəti dəfə ölkə universitetləri arasında ən yüksək keçid balı olan ixtisaslar oldu. Eyni zamanda, ali məktəbin bütün məzunları beynəlxalq, transmilli və yerli neft-qaz şirkətlərində işlə təmin olundular”.
Tədbirdə BANM tələbələrinin hazırladığı “O olmasın, bu olsun” operettasından videofraqmentlər nümayiş etdirilib. Sonra tamaşanı ərsəyə gətirən kollektiv mükafatlandırılıb.
Daha sonra “Erasmus+” proqramında, “Technip FMC” və Heydər Əliyev Fondunun birgə layihəsi olan “Texnoloji biliklərin ötürülməsi” üzrə magistr proqramında iştirak hüququ qazanmış tələbələrin təqdimatı olub.
Tədbirin bədii hissəsində BANM və Azərbaycan Milli Konservasiyasının tələbələrinin repertuarları maraqla qarşılanıb.