Bakı, 28 dekabr (AZƏRTAC). Xəbər verdiyimiz kimi, Yeni il münasibətilə dekabrın 28-dən 31-dək paytaxtın Binəqədi rayonu Dərnəgül yaşayış sahəsində, 6 nömrəli peşə liseyinin həyətində, Xətai rayonu ərazisindəki “Bakı” kinoteatrının yanında, Nərimanov rayonu, Əliyar Əliyev küçəsi 26 ünvanda, “Bakı Taxıl” ASC-nin ərazisində, Nəsimi rayonu “Təzə bazar” MMC-nin ərazisində, 3-cü mikrorayon yaşayış massivindəki “Tovuz-Baltiya LTD”nin ərazisində, Səbail rayonu, Badamdar qəsəbəsi, 239 nömrəli məktəbin yanında, Suraxanı rayonu, Əmircan qəsəbəsi, Səttar Bəhlulzadə küçəsi 2 ünvanda, Yeni Günəşli qəsəbəsi, “Günəş” ticarət mərkəzinin yanında, Yasamal rayonu, Şərifzadə küçəsi 131 ünvanda - Bakı Dövlət Rabitə və Nəqliyyat kollecinin yanında bayram satış yarmarkalarının keçirilməsi qərara alınmışdır. 

İqtisadi İnkişaf Nazirliyi, Kənd Təsərrüfatı Nazirliyi və Bakı Şəhər İcra Hakimiyyəti tərəfindən sahibkarlarla birgə təşkil olunan yarmarkaların məqsədi bayram ərəfəsində əhalinin ərzaq və kənd təsərrüfatı mallarına artan tələbatının daha dolğun ödənilməsi, istehlakçıların seçim imkanlarının artırılması, eləcə də süni qiymət artımının qarşısının alınmasıdır.

AZƏRTAC xəbər verir ki, dekabrın 28-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının bayram satış yarmarkaları başlamışdır. Dörd gün davam edəcək yarmarkalara mövsümə uyğun olaraq əsasən meyvə-tərəvəz məhsulları və digər ərzaq malları çıxarılmışdır.

“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdir.

Dekabrın 28-də burada şəhər sakinlərinə Sabirabad, Gədəbəy, Hacıqabul və digər rayonlardan gətirilmiş 20,25 ton məhsul, o cümlədən 1 ton ət, 0,3 ton ağartı, 5 ton tərəvəz, 4,5 ton kartof, 7 ton meyvə, 0,3 ton taxıl məhsulları, 20 min ədəd yumurta və s. təklif olunurdu.

Kənd Təsərrüfatı Nazirliyinin nümayəndəsi Rövşən Əliyev dedi ki, bayram ərəfəsində yarmarkadakı qiymətlər bazardakından 20-25 faiz ucuzdur. Qoyun ətinin kiloqramı 6 manata, mal əti 5 manat 50 qəpiyə, soğan 25-30, kartof 40-60, yumurtanın bir ədədi 8 qəpiyə və s. satılır. Ümumilikdə, bayram yarmarkasının davam edəcəyi 4 gün ərzində satışa 100 tondan çox məhsul çıxarılması nəzərdə tutulur.

Kənd Təsərrüfatı Nazirliyinin nümayəndəsi Fəxrət Eminov məlumat verdi ki, Yeni il ərəfəsində Yasamal rayonunda, Bakı Rabitə və Nəqliyyat Kollecinin həyətində təşkil edilmiş yarmarkada nümunəvi səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlıq etməyə gələn paytaxt sakinlərinə əlverişli şəraitin yaradılması bu əraziyə təhkim olunmuş Salyan, Qusar, Astara, Şabran rayonlarının, bundan əlavə, Gədəbəy və Göyçay rayonlarının fermerləri və torpaq mülkiyyətçilərini satışa daha çox məhsul çıxarmağa sövq etmişdir. Bunun nəticəsidir ki, onlar bayramqabağı yarmarkanın ilk günündə satışa 75,1 ton meyvə-tərəvəz, bostan bitkiləri, mal və qoyun əti, ağartı, bayram çərəzləri və digər məhsullar gətirmişlər. Ümumilikdə, yarmarkanın davam edəcəyi 4 gün ərzində satışa 140 tondan çox məhsul çıxarılması təxmin edilir.

Burada satışa çıxarılan məhsulların əksəriyyətini mövsümi tərəvəz, o cümlədən yerkökü, çuğundur, kələm, soğan, kartof, xiyar, pomidor, göyərti, həmçinin meyvələrdən alma, armud və s. təşkil edir. Yarmarkada mövsümə uyğun məhsullardan olan balqabaq, nar, heyva və digər meyvə-tərəvəzlər daha çoxdur. Məhsullar bazarlardakından 25-30 faiz ucuz satılır.

Bütün məhsulların sanitar-gigiyenik vəziyyəti Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən diqqətlə yoxlanılır.

Yarmarkada nəzarət tərəzisi qoyulmuş, lövhələrdə qiymətlərin bazardakılarla müqayisəsi göstərilmişdir.

Cümə günü Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 18 ton müxtəlif çeşidli kənd təsərrüfatı məhsulları və digər ərzaq malları gətirilmişdir.

Kənd Təsərrüfatı Nazirliyinin nümayəndəsi Məmməd Həziyev bildirdi ki, qarşıdakı əlamətdar bayramlarla bağlı yarmarkaya gətirilmiş məhsulların çeşidi xeyli dəyişmişdir. Çalışmışıq ki, bayram günlərində qəsəbə sakinləri süfrələrini lazımi məhsullarla bəzəyə bilsinlər.

Yarmarka dekabrın 31-dək davam edəcəkdir. Bu da qəsəbə sakinlərinin ucuz və keyfiyyətli məhsul əldə etməsinə imkan verəcəkdir. Yarmarkada qiymətlər bazardakından 20-30 faizədək ucuzdur.

Alıcılar kartof, soğan, yerkökü, ət, süd, göyərti, alma, xurma, naringi, kələm və digər məhsulları həvəslə alırlar.

Yarmarkalarda məhsulların keyfiyyəti ciddi surətdə yoxlanılmış, xüsusilə ət və süd məhsulları baytar müayinəsindən keçirilmişdir.

Dekabrın 28-də Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (25,1 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,8 ton) satışa Şəki, Samux, Quba, Biləsuvar, Cəlilabad və Ağsu rayonlarından gətirilmiş ümumilikdə 27,9 ton məhsul çıxarılmışdır.

Kənd Təsərrüfatı Nazirliyinin nümayəndəsi Mustafa Rüstəmov bildirdi ki, 4 gün davam edəcək hər iki yarmarkada əhaliyə satılmaq üçün daha 29 ton məhsul gətiriləcəkdir. Bayram ərəfəsində hər iki yarmarkada mövsümə uyğun meyvələrdən nar, heyva, xurma, həmçinin alma, armud, tərəvəzlərdən pomidor, xiyar, soğan, kartof, badımcan, bibər, lobya və digər məhsulların, xüsusilə ağartı məhsullarının alıcıları çoxluq təşkil edir. Qiymətlər bazarlarla müqayisədə 30-35 faiz ucuzdur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.

Kənd Təsərrüfatı Nazirliyinin nümayəndəsi Oqtay Hüseynov məlumat verdi ki, bayram ərəfəsində Xətai rayonunda, “Bakı” kinoteatrının yaxınlığındakı yarmarkada paytaxt sakinlərinə Salyan, Biləsuvar, Qax, Şəmkir, Qəbələ, Kürdəmir, Quba, Astara, Daşkəsən rayonlarından 377 ton meyvə-tərəvəz, ət və süd məhsulları və digər ərzaq malları gətirilmişdir.

Məhsullar bazarlardakından 20-25 faiz ucuz qiymətə satılacaqdır. Burada nəzarət gücləndirilmiş, alıcı və satıcılara hər cür şərait yaradılmışdır.

Bayram ərəfəsində yarmarkada şəhər sakinlərinə sərfəli qiymətə mal və qoyun əti, yumurta, kartof, soğan, nar, heyva, xiyar, xurma, yerkökü, çuğundur, kələm, pomidor, naringi və digər məhsullar təklif olunur.

Kənd Təsərrüfatı Nazirliyinin nümayəndəsi Savalan Seyfəddinov bildirdi ki, əlamətdar bayramlar ərəfəsində Nərimanov rayonundakı Ə.Əliyev küçəsində təşkil olunmuş yarmarkaya Xaçmaz, Tərtər, İmişli, Salyan rayonlarından fermerlər və digər torpaq mülkiyyətçiləri 4 gün müddətində müxtəlif çeşiddə, bol kənd təsərrüfatı məhsulları gətiriləcəklər.

Dekabrın 28-də yarmarkaya 22,7 ton məhsul gətirilmişdir

Fermerlər və digər torpaq mülkiyyətçiləri paytaxt sakinlərinə müxtəlif çeşiddə mövsümi meyvələr, həmçinin kələm, balqabaq və digər məhsullar təklif edirdilər. Bununla yanaşı, paytaxt sakinləri həmişə olduğu kimi, ət, süd məhsulları, yumurta, ağartı, göyərti və kartof, soğan, pomidor, xiyar, kələm, yerkökü, çuğundur və s. kənd nemətlərini də həvəslə alırdılar. Onların dediklərinə görə, bayramqabağı yarmarkadakı meyvə, göyərti və ağartı məhsullarının təzə və keyfiyyətli, eyni zamanda, bazarlardakından 25-35 faiz ucuz qiymətə olması çox sərfəlidir.

Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.

Kənd Təsərrüfatı Nazirliyinin nümayəndəsi Qadir Həsənov bildirdi ki, Yeni il bayramı ərəfəsində Binəqədi rayonu, 6 nömrəli Bakı Texniki Peşə Liseyinin qarşısındakı yarmarkada kənd təsərrüfatı və ərzaq məhsullarının satışı 4 gün davam edəcəkdir.

Dekabrın 28-də Bərdə, Siyəzən, Goranboy, Ağstafa və digər rayonlardan satışa 18,5 ton müxtəlif çeşiddə məhsul gətirilmişdir.

Fermerlər və digər torpaq mülkiyyətçiləri alma, nar, kartof, kələm, turp, yerkökü, çuğundur və digər məhsulları şəhər sakinlərinə bazardakından 20-30 faiz ucuz qiymətlərə təklif edirdilər.

Burada nümunəvi xidmətlər göstərilməsi üçün bütün lazımi şərait yaradılmışdır.

Ümumilikdə, dörd gün ərzində yarmarkada satışa 70 ton kənd təsərrüfatı məhsulları və digər ərzaq malları çıxarmaq nəzərdə tutulmuşdur.