BAKIDA BOKS ÜZRƏ BEYNƏLXALQ TURNİR BAŞLANMIŞDIR
Martın 6-da Bakıda, Olimpiya idman kompleksində Beynəlxalq Həvəskar Boks Assosiasiyasının (AİBA) prezidenti, professor Ənvər Çoudrinin şərəfinə təşkil edilmiş turnirin təntənəli açılış mərasimi olmuşdur.
Xatırladaq ki, bu turnir Bakıda 6-cı dəfədir ki, keçirilir. Amma əvvəlkilərdən fərqli olaraq, indiki turnirdə yeniyetmələr yox, yaşlılar yarışacaqlar. Turnirə beş qitədən 120-dən çox idmançı gəlmişdir. Respublikamızın idman şərəfini 35 boksçu qoruyacaqdır. Onların arasında Sidney olimpiadasının bürünc mükafatçısı Vüqar Ələkbərov da var.
Yariş iştirakçıları - Özbəkistan, Türkiyə, Tunis, Suriya, Rusiya, Filippin, Pakistan, Malayziya, Küveyt, Qazaxıstan, İordaniya, Yaponiya, İran, Hindistan, Yunanıstan, Gürcüstan, Misir, Kanada, Avstraliya, Azərbaycan komandaları tamaşaçıların alqış sədaları altında salona daxil oldular.
Azərbaycan Milli Olimpiya Komitəsinin Prezidenti, Milli Məclisin deputatı İlham Əliyevə və AİBA-nın prezidenti Ənvər Çoudri mərasimdə çıxış etdilər.
AZƏRBAYCAN MİLLİ OLİMPİYA KOMİTƏSİNİN
PREZİDENTİ, MİLLİ MƏCLİSİN DEPUTATI İLHAM ƏLİYEVİN ÇIXIŞI
- Hörmətli xanımlar və cənablar!
Əziz qonaqlar, əziz idmançılar!
Hörmətli cənab Çoudri!
Professor Ənvər Çoudrinin adını daşıyan beynəlxalq boks turnirinin açılışı münasibətilə sizin hamınızı ürəkdən təbrik edirəm.
Belə turnirlərin keçirilməsi Azərbaycanda gözəl ənənəyə çevrilibdir. Professor Çoudrinin şərəfinə Bakıda boks üzrə yeniyetmələr arasında beş dəfə turnir keçirilmişdir. Bu dəfə isə biz böyüklər arasında turnirin açılışına toplaşmışıq.
Xatırladım ki, bizim xahişimizi nəzərə alaraq, Beynəlxalq Boks Federasiyası yeniyetmələr arasında ilk Avropa və dünya çempionatlarını Bakıda keçirmişdir. Bu, Azərbaycanda boksun yayılmasına böyük kömək göstərmiş, ölkəmizdə boks məktəbinin güclənməsini təmin etmişdir. Bütün bunlara görə mən Milli Olimpiya Komitəsi adından və Azərbaycanın bütün idman ictimaiyyəti adından Beynəlxalq Boks Federasiyasına və onun prezidenti professor Ənvər Çoudriyə - Azərbaycanın böyük dostuna, görkəmli idman xadiminə öz dərin təşəkkürümü bildirirəm.
Azərbaycanda idman sürətlə inkişaf edir. Bizim olimpiya, dünya, Avropa çempionlarımız vardır. Onların sayı getdikcə artır. Eyni zamanda, biz uşaq və yeniyetmə idmanına böyük diqqət veririk. Çünki uşaq, yeniyetmə idmanı olmayan bir ölkədə, ümumiyyətlə, idman inkişaf edə bilməz. Bu gün burada iştirak edəcək idmançılar əvvəllər - beş il, dörd il bundan qabaq ilk təcrübələrini yeniyetmələrin yarışlarında əldə etmişlər.
Boks Azərbaycanda çox yüksək səviyyədədir. Bunun başlıca səbəbi Azərbaycan Boks Federasiyasının çox gözəl fəaliyyətidir. Eyni zamanda, bir səbəbi də ondadır ki, Beynəlxalq Boks Federasiyası və şəxsən dostumuş cənab Çoudri bizə çox diqqətlə yanaşır.
Əziz idmançılar! Mən bu turnirin açılışı münasibətilə sizi bir daha təbrik edirəm, sizə uğurlar, yeni qələbələr arzu edirəm. Sağ olun.
X X X
BEYNƏLXALQ HƏVƏSKAR BOKS
ASSOSİASİYASININ PREZİDENTİ, PROFESSOR ƏNVƏR ÇOUDRİNİN ÇIXIŞI
- Xanimlar və cənablar!
İlk növbədə sizi təbrik etmək istəyirəm.
Yenidən burada sizinlə olmağım mənim ücün ən böyük şərəfdir.
Yenidən bu gözəl şəhərdə olduğum üçün şərəf duyuram. Sizə öz minnətdarlığımı bildirirəm. Həm də ona görə ki, mənim qayğıma qalırsınız. Burada olduğum müddətdə sizin mənə göstərdiyiniz diqqəti heç vaxt yadımdan çıxarmayacağam.
Eyni zamanda, mənə verdiyi qiymətə görə hörmətli Prezident Heydər Əliyevə öz minnətdarlığımı bildirmək istəyirəm.
Sizi yenidən gördüyümə də çox şadam. Sevinirəm ki, yarışda iştirak etmək üçün buraya dünyanın bir neçə ölkəsindən idmançılar gəliblər. Ümid edirəm ki, müxtəlif ölkələrdən gələn idmançılar bu yarışda müvəffəqiyyət qazanacaqlar.
Azərbaycan idman sahəsində çox böyük uğurlar əldə edibdir. Yadımdadır ki, 2000-ci ildə Azərbaycan olimpiya oyunlarında necə müvəffəqiyyətlər qazanmışdır. Ümid və dua edirəm ki, burada yarışan bütün idmançılar, - baxmayaraq ki, başqa-başqa komandaların üzvləridirlər, - bir-birinə kömək edəcək, müvəffəqiyyət qazanacaqlar.
Mən yarışı gecikdirməmək üçün uzun nitq söyləmək istəmirəm. Bir daha yenidən deyirəm ki, mənə olan diqqətinizə və qayğınıza görə sizə təşəkkür edirəm. Sağ olun.
X X X
Azərbaycanın dövlət himni səsləndi.
AİBA-nın prezidenti, professor, doktor Ənvər Çoudrinin şərəfinə həsr edilmiş 6-cı beynəlxalq turnir açıq elan edildi.
Həmin gün turnirdə ilkin görüşlər keçirildi.
Turnirin açılış mərasimində gənclər, idman və turizm naziri Əbülfəz Qarayev, Bakı Şəhər İcra Hakimiyyətinin başçısı Hacıbala Abutalıbov, respublika idman federasiyalarının rəhbərləri, idman xadimləri iştirak edirdilər.
Bölmənin digər xəbərləri
