Bakı, 5 avqust (AZƏRTAC). Avqustun 4-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Paytaxt əhalisinin kənd təsərrüfatı məhsullarına tələbatını ödəmək məqsədilə keçirilən yarmarkalara mövsümə uyğun olaraq əsasən meyvə-tərəvəz məhsulları çıxarılmışdır.

Bazar günü “Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 10,5 ton məhsul, o cümlədən 0,4 ton ət, 0,2 ton ağartı, 2,3 ton tərəvəz, 2 ton kartof, 2,5 ton meyvə və s. təklif olunurdu. Ümumilikdə şənbə və bazar günlərində yarmarkada 22,5 ton məhsul satılmışdır.

Paytaxt sakinləri təzə və keyfiyyətli məhsullar alır, bəzi məhsulların bazarlardakından ucuz olduğuna görə yarmarkanın təşkilatçılarına və fermerlərə minnətdarlıqlarını bildirirdilər.

Kənd Təsərrüfatı Nazirliyinin nümayəndəsi Rövşən Əliyev dedi ki, yarmarkadakı qiymətlər bazarlardakından 20-25 faiz ucuzdur.

Burada qoyun ətinin kiloqramı 6 manata, mal əti 5 manat 50 qəpiyə, soğan 30-50, kartof 40-60, yumurtanın 1 ədədi 10 qəpiyə və s. satılır.

Yasamal rayonunda, Bakı Rabitə və Nəqliyyat Kollecinin həyətində təşkil edilmiş kənd təsərrüfatı məhsullarının satış yarmarkasına istirahət günlərində bu əraziyə təhkim olunmuş Salyan, Qusar, Astara, Şabran rayonlarının, bundan əlavə, Göyçay və Gədəbəy rayonlarının fermerləri və torpaq mülkiyyətçiləri 65,7 ton meyvə-tərəvəz, bostan məhsulları, ağartı, göyərti, digər kənd nemətləri gətirmişdilər.

Kənd Təsərrüfatı Nazirliyinin nümayəndəsi Fəxrət Eminov məlumat verdi ki, budəfəki yarmarkaya çıxarılan məhsullar arasında göyərti, təzə kartof-soğan, kələm, kahı, lobya, badımcan, bibər, meyvələrdən alma, armud, çiyələk, alça, gavalı, ərik, gilas, şaftalı, üzüm, zoğal, bostan məhsullarından qarpız, yemiş və digər mövsümə uyğun məhsullar üstünlük təşkil edir.

Şənbə günündə olduğu kimi, avqustun 4-də də yarmarkada nümunəvi səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlıq etməyə gələn paytaxt sakinlərinə əlverişli şəraitin yaradılması diqqəti daha çox cəlb edirdi. Bunun nəticəsində istirahət günlərində yarmarkaya daxil olmuş məhsulun 70 faizindən çoxu satılmışdır.

Bütün məhsulların sanitar-gigiyenik vəziyyəti Kənd Təsərrüfatı Nazirliyi yayında Dövlət Fitosanitar Nəzarəti Xidməti tərəfindən diqqətlə yoxlanılır.

Yarmarkada qoyulmuş nəzarət tərəzisində hər kəs aldığı məhsulun çəkisini yoxlaya bilər.

Kənd Təsərrüfatı Nazirliyinin nümayəndəsi Mustafa Rüstəmov məlumat verdi ki, bazar günü Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (18,1 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,2 ton) satışa bir gün əvvəl Şəki, Samux, Quba, Biləsuvar, Cəlilabad və Ağsu rayonlarından gətirilmiş ümumilikdə 20, 3 ton məhsul satılıb qurtarmaq üzrədir.

Hər iki yarmarkada meyvələrdən üzüm, zoğal, alma, armud, çiyələk, alça, ərik, gilas, şaftalı, tərəvəzlərdən pomidor, xiyar, soğan, kartof, lobya, badımcan, bibər, göyərti, bostan məhsullarından yemiş, qarpız və digər mövsümi məhsulların alıcıları çoxluq təşkil edir.

Bazarlarla müqayisədə qiymətlər 25-30 faiz ucuzdur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.

Xətai rayonunda, “Bakı” kinoteatrının yaxınlığındakı yarmarkaya Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən rayonlarından 210 ton meyvə-tərəvəz, ət və süd məhsulları gətirilmişdir.

Şənbə və bazar günlərində yarmarkada bazarlardakından 25-30 faiz ucuz qiymətə 206 tondan çox qarpız, yemiş, alça, gilas, ərik, üzüm, zoğal, əncir, alma, şaftalı, pomidor xiyar, kartof, soğan, badımcan, bibər, göyərti və digər məhsullar satılmışdır.

Şəhər sakinləri məhsulların keyfiyyətindən və yarmarkada yaradılan bolluqdan razıdırlar.

Bazar günü Binəqədi rayonu, 6 nömrəli Bakı Texniki Peşə Liseyinin qarşısındakı yarmarkada təzə və keyfiyyətli meyvə-tərəvəzlər, bostan məhsulları, o cümlədən üzüm, yerkökü, ərik, alma, pomidor, turp, badımcan, armud, xiyar, lobya, kələm, yemiş, qarpız diqqəti cəlb edirdi. Şəhər sakinləri Siyəzən, Goranboy, Ağstafa, Bərdə və digər rayonlardan gətirilmiş məhsulları bazarlardakından 25-30 faiz ucuz qiymətlərə ala bilirdilər.

Alıcılar göstərilən xidmətlərdən razı qaldıqlarını söyləyirdilər.

Kənd Təsərrüfatı Nazirliyinin nümayəndəsi Qadir Həsənovun verdiyi məlumata görə, şənbə və bazar günlərində yarmarkada 28 ton meyvə-tərəvəz, süd və bostan məhsulları satılmışdır.