Bakıda kənd təsərrüfatı məhsullarının növbəti satış yarmarkaları keçirilmişdir
Bakı, 12 mart (AZƏRTAC). Martın 12-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 10 tondan çox məhsul təklif olunurdu.
Paytaxt sakinləri təzə və keyfiyyətli məhsulları həvəslə alırdılar. Fikirlərini öyrəndiyimiz alıcılar bildirmişlər ki, artıq bazara getməyə ehtiyac qalmayıb, çünki burada həm qiymətlər 20-25 faiz ucuz, həm də məhsullar təzədir.
Yarmarka ərazisində alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdir.
Yasamal rayonunda, Bakı Rabitə və Nəqliyyat Kollecinin həyətində təşkil olunan yarmarkada satışa Salyan, Qusar, Astara, Şabran və Quba rayonlarından gətirilmiş 87 ton meyvə-tərəvəz, ət, balıq çıxarılmışdı. Bütün məhsullar bazarlardakından 25-30 faiz ucuz təklif olunurdu.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 14 tondan çox müxtəlif çeşidli kənd təsərrüfatı məhsulu gətirilmişdi.
Novruz bayramı ərəfəsində yarmarkaya gələnlərin sayı xeyli artmışdır. Qəbələdən qoz-fındıq gətirmiş Kənan Həsənov artıq 150 kiloqramdan çox məhsul satdığını bildirdi. O, məhsulun kiloqramını 3 manata təklif edirdi.
Kənd Təsərrüfatı Nazirliyinin nümayəndələri qiymətə və keyfiyyətə nəzarət edirdilər. Yarmarkada təklif olunan məhsulların qiyməti bazardakından 25-30 faiz ucuz idi.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada Qax, Salyan, Biləsuvar, Qəbələ, Ağcabədi, Şəmkir, Kürdəmir, Quba, Astara rayonlarından gətirilmiş 155 ton meyvə-tərəvəz, ət və süd məhsulları satılırdı.
Kənd Təsərrüfatı Nazirliyinin nümayəndəsi Oqtay Hüseynovun sözlərinə görə, yarmarkada məhsulların qiymətləri bazarlardakından 20-30 faiz ucuzdur. Eyni zamanda, bildirmişdir ki, məhsulların qiymətlərinə ciddi nəzarət olunur. Belə ki, qoyun ətinin kiloqramı 5 manata, mal əti 4 manat 50 qəpiyə, quş əti 2 manat 70 qəpik - 3 manat 10 qəpiyə, yumurtanın biri 11-12 qəpiyə, alma 40 qəpik - 2 manata, kartof-60-80, soğan və kələm 80 qəpiyə, narıngi 1 manat 20 - 1 manat 60 qəpiyə təklif edilir.
Şəhər sakinləri malların keyfiyyətindən və qiymətindən razıdırlar.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, Suraxanı rayonu ərazisində təşkil olunmuş yarmarkalarda - “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində satışa Samux, Daşkəsən, Quba, Biləsuvar və Cəlilabad rayonlarından gətirilmiş 41,8 ton məhsul çıxarılmışdır. Bazarlarla müqayisədə bütün məhsullar 25-30 faiz ucuz təklif olunur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilmişdir.
Binəqədi rayonu 6 nömrəli Bakı Texniki Peşə Liseyinin qarşısındakı yarmarkaya Bərdə, Siyəzən, Ağstafa, Goranboy rayonlarının fermerləri 25 tondan çox meyvə-tərəvəz, bostan məhsulları gətirmişdilər. Onlar məhsulları bazardakından 20-30 faiz ucuz qiymətlərə satırdılar.
Şəhər sakinləri kələmi, kartofu, narı, kökü, almanı və digər kənd təsərrüfatı məhsullarını həvəslə alırdılar.
Nərimanov rayonu Ə.Əliyev küçəsindəki yarmarkada Kənd Təsərrüfatı Nazirliyinin nümayəndəsi Fəxrad Eminovun verdiyi məlumata görə, satışa Xaçmaz, Tərtər, Daşkəsən, İmişli, Oğuz və Beyləqan rayonlarından gətirilmiş 38 ton keyfiyyətli məhsul, Giləzi broyler fabrikindən isə 10 min ədəd yumurta çıxarılmışdır. Həmişəkindən fərqli olaraq qoz, fındıq, quru meyvələr, ədviyyat daha çox alınır.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
######
Bölmənin digər xəbərləri
