REGİONLAR
Bakıda kənd təsərrüfatı məhsullarının Novruz satış yarmarkaları keçirilmişdir
Bakı, 19 mart (AZƏRTAC). Martın 19-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının Novruz satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-in həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 21 tondan çox məhsul, o cümlədən 2 ton ət, 0,2 ton ağartı, 5,5 ton tərəvəz, 8 ton kartof, 1,5 ton bostan məhsulları, 3,5 ton meyvə təklif olunurdu.
Kənd Təsərrüfatı Nazirliyinin nümayəndəsi Rövşən Əliyev dedi ki, yarmarkadakı qiymətlər bazardakından 20-25 faiz ucuzdur. Belə ki, qoyun ətinin kiloqramı 5 manata, mal əti 4 manat 50 qəpiyə, turp 30-40, kök, soğan və kartof 60-80, yumurtanın biri 11 qəpiyə və s. satılır.
Yarmarka ərazisində alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdir.
Yasamal rayonunda, Bakı Rabitə və Nəqliyyat Kollecinin həyətində təşkil olunan yarmarkada satışa Salyan, Qusar, Astara, Şabran və Quba rayonlarından gətirilmiş 86,4 ton meyvə-tərəvəz, ət, balıq çıxarılmışdı. Bütün məhsullar bazarlardakından 25-30 faiz ucuz təklif olunurdu.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 20 tondan çox müxtəlif çeşidli kənd təsərrüfatı məhsulu gətirilmişdi.
Novruz bayramı münasibətilə yarmarkaya gətirilən kənd təsərrüfatı mallarının çeşidi xeyli artmışdır. Bayram süfrəsi üçün zəruri olan qoz, fındıq daha çox alınırdı.
Kənd Təsərrüfatı Nazirliyinin nümayəndəsi Məmməd Həziyev bildirmişdir ki, Novruz bayramı ərəfəsində alıcıların yarmarkaya axını artmışdır. Fermerlərə və şəxsi təsərrüfat sahiblərinə satışa daha çox və müxtəlif çeşidli məhsul çıxarmaları üçün hər cür imkanlar yaradılmışdır.
Qəsəbənin sakinləri yarmarkanın davamlı təşkilinə görə minnətdarlıqlarını bildirirdilər.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada Qax, Salyan, Biləsuvar, Qəbələ, Ağcabədi, Şəmkir, Kürdəmir, Quba, Astara rayonlarından gətirilmiş 162 ton meyvə-tərəvəz, ət və süd məhsulları satılırdı.
Kənd Təsərrüfatı Nazirliyinin nümayəndəsi Oqtay Hüseynovun sözlərinə görə, yarmarkada məhsulların qiymətləri bazarlardakından 30 faiz ucuzdur. Eyni zamanda, bildirmişdir ki, məhsulların qiymətlərinə ciddi nəzarət olunur.
Novruz bayramı ərəfəsində burada satılan məhsullar arasında fındıq, qoz, şabalıd, alma, müxtəlif şirniyyat məmulatları üstünlük təşkil edirdi. Yarmarkada Novruzun rəmzi olan səməni də təklif olunurdu. Alıcılar bayram ərəfəsində yaradılmış bolluqdan, qiymətlərin ucuzluğundan razılıq edirdilər.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, Suraxanı rayonu ərazisində təşkil olunmuş yarmarkalarda - “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində satışa Samux, Daşkəsən, Quba, Biləsuvar və Cəlilabad rayonlarından gətirilmiş 42,3 ton məhsul çıxarılmışdır. Bazarlarla müqayisədə bütün məhsullar 25-30 faiz ucuz təklif olunur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilmişdir.
Kənd Təsərrüfatı Nazirliyinin nümayəndəsi Qadir Həsənovun sözlərinə görə, Binəqədi rayonu 6 nömrəli Bakı Texniki Peşə Liseyinin qarşısındakı yarmarkaya Bərdə, Siyəzən, Ağstafa, Goranboy rayonlarının fermerləri təqribən 24 ton meyvə-tərəvəz, bostan məhsulları gətirmişlər. Məhsullar bazardakından 20-30 faiz ucuz qiymətlərə satılır.
Şəhər sakinləri kələmi, kartofu, narı, kökü, almanı və digər kənd təsərrüfatı məhsullarını həvəslə alırdılar.
Nərimanov rayonu Ə.Əliyev küçəsindəki yarmarkada Kənd Təsərrüfatı Nazirliyinin nümayəndəsi Fəxrad Eminovun verdiyi məlumata görə, satışa Xaçmaz, Tərtər, Daşkəsən, İmişli, Oğuz və Beyləqan rayonlarından gətirilmiş 41,8 ton keyfiyyətli məhsul, Giləzi broyler fabrikindən isə 10 min ədəd yumurta çıxarılmışdır. Yarmarkada qoz, fındıq, quru meyvələr, ədviyyat daha çox alınır.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
######