SİYASƏT
BAKIDA OMBUDSMAN APARATININ ƏMƏKDAŞLARI ÜÇÜN SEMİNAR-TRENİNQ KEÇİRİLİR
AZƏRTAC xəbər verir ki, noyabrın 5-də Bakıda Azərbaycan Respublikasının İnsan Hüquqları üzrə Müvəkkili (Ombudsman) Aparatının əməkdaşları üçün Avropa İnsan Hüquqları Konvensiyasının 3-cü və 5-ci maddələrinin şərhinə dair ikigünlük seminar-treninq işə başlamışdır.
Avropa İnsan Hüquqları Konvensiyasının (AİHK) qüvvəyə minməsinin 55 illiyinə və BMT-nin İnsan Hüquqları Ümumi Bəyannaməsinin qəbul edilməsinin 60 illiyinə həsr olunmuş və "İnsan Hüquqları Mədəniyyətinin Təşviqi" üzrə Avropa Komissiyası ilə Avropa Şurasının (AŞ) birgə proqramı çərçivəsində keçirilən tədbir Avropa Komissiyasının və Avropa Şurasının maliyyə dəstəyi ilə AŞ-nin İnsan Haqları və Hüquqi Məsələlər üzrə Baş Direktorluğu və Azərbaycanın Ombudsman Aparatı tərəfindən təşkil edilmişdir.
Tədbiri giriş sözü ilə açan Azərbaycan Respublikasının insan hüquqları üzrə müvəkkili Elmira Süleymanova ölkəmizdə Ombudsman institutunun yaranması, inkişaf mərhələləri barədə geniş məlumat vermiş, təsisatın insan hüquq və azadlıqlarının qorunması istiqamətində həyata keçirdiyi tədbirlərdən danışmışdır.
Avropa Şurasının İnsan Haqları və Hüquqi Məsələlər üzrə Baş Direktorluğunun proqram üzrə məsləhətçisi Roman Huna yenidən Bakıya səfər etməsindən məmnunluğunu bildirərək, iki il bundan əvvəl Azərbaycanda AŞ-nin və Avropa Komissiyasının birgə layihəsi olan penitensiar xidmətin modernləşdirilməsi layihəsinin həyata keçirilməsində iştirakını xatırlatmışdır. Qonaq vurğulamışdır ki, bu gün Azərbaycanda aparılan uğurlu siyasi, iqtisadi və hüquqi islahatlar ölkənin Avropa ailəsinin bərabərhüquqlu üzvü olduğunu, burada həyatın bütün sahələrində inkişafın Avropa standartlarına tamamilə uyğunlaşdırıldığını bir daha sübut edir.
Seminar-treninqdə Avropa Şurasının eksperti Mark Endryu Cons, Azərbaycan Respublikası Ədliyyə Nazirliyinin İnsan Hüquqları və İctimaiyyətlə Əlaqələr İdarəsinin rəisi Faiq Qurbanov, Ədliyyə Nazirliyinin Tibb Baş İdarəsinin rəisi Rafael Mehdiyev və başqaları "Avropa İnsan Hüquqları Konvensiyasında işgəncə və digər qeyri-insani və ləyaqəti alçaldan rəftar və ya cəzaların ləğv edilməsi", "Penitensiar müəssisələrdə Avropa səhiyyə standartları və psixiatrik müəssisələrə qeyri-iradi yerlşəşdirmə", "Avropa İnsan Hüquqları Məhkəməsinin presedent hüququna əsasən saxlanılma" və "Həbs qətimkan tədbirinin Azərbaycan qanunvericiliyndə təsbiti və əməli təcrübədə tətbiqi" mövzularında məruzələr etmişlər.
Canlı diskussiya şəraitində kecən seminar-treninqin ilk günündə AİHK-in 3-cü və 5-ci maddələri geniş şərh olunmuş, Azərbaycanın hüquq-mühafizə sistemində bu müddəaların tələblərindən irəli gələn vəzifələrə diqqətlə əməl olunmasına dair çoxsaylı faktlar göstərilmişdir.
Seminar-treninq noyabrın 6-da işini davam etdirəcəkdir.