ELM VƏ TƏHSİL
Bakıda Türkiyə universitetlərinin növbəti təhsil sərgisi açılacaq
Bakı, 27 aprel, AZƏRTAC
Aprelin 29-da və 30-da “Hilton Baku” otelində “Təhsil” Cəmiyyətinin və “Akademi Group” Xaricdə Təhsil Mərkəzinin birgə təşkilatçılığı ilə Türkiyə universitetlərinin növbəti təhsil sərgisi keçiriləcək.
Təhsil Mərkəzindən AZƏRTAC-a bildiriblər ki, sərgidə tələbələrə xaricdə yüksək keyfiyyətli təhsil imkanları, yataqxanalar və digər məsələlər barədə ətraflı məlumat veriləcək. Tələbələr, həmçinin bu universitetlərin pulsuz və təqaüdlü təhsil imkanları barədə məlumatlandırılacaqlar.
Sərgidə Türkiyənin 20-dən çox dövlət və özəl universiteti stendi ilə təmsil olunacaq. İştirakçı universitetlərdən bir çoxu yeni dərs ilində azərbaycanlı tələbələr üçün güzəştləri təqdim edəcək.
Maraqlananlar akademi.az linki vasitəsilə online qeydiyyatdan keçə bilərlər.
Sərgiyə giriş ödənişsizdir.