BBC-nin qərəzli fəaliyyəti özünün nizamnaməsinə ziddir - ŞƏRH
Bakı, 5 sentyabr, AZƏRTAC
BBC media sahəsində əsas prinsip olan “qərəzsizlik” prinsipini yenə ayaqları altına ataraq Azərbaycana qarşı qarayaxma kampaniyasını davam etdirir. Ermənistanın və separatçıların “blokada” və “humanitar soyqırımı” şousunun təbliğatını bütün imkanlarınından istifadə edərək aparır. Azərbaycanın ərazi bütövlüyünü sual altına salaraq, region və rayonların rəsmi adlarını deyil, qondarma adlardan istifadə edərək məlumatlar yayımlayır. Halbuki, bir milyon vətəndaşımız öz yurdlarından didərgin salınanda, illərlə humanitar böhranla üzləşəndə, on minlərlə insanımız zülmə, soyqırımına, ölümə məruz qalanda, bütün tarixi və mədəni abidələrimiz məhv ediləndə nədənsə BBC və onun kimi işini qeyri-obyektiv fəaliyyət üzərində quran beynəlxalq media korporasiyaları susurdu.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
“Otuz ilə yaxın işğal altında qalan ərazilərdən məcburi köçürülmüş azərbaycanlıların yaşayışı, üzləşdikləri zülm BBC tərəfindən işıqlandırılmayıb. Amma dövlətimizin göndərdiyi ərzağı qəbul etməyib “biz türk unu yemərik” deyən erməninin “aclıqdan ölüm həddinə çatdığı” kimi yalan məlumatlar təqdim edilir. Əlbəttə, BBC-nin qərəzli fəaliyyəti media etikasına, özünün nizamnaməsinə, Beynəlxalq Konvensiya və qərarlarda “media fəaliyyəti” və “informasiya əldə etmək və yaymaq”la bağlı göstərilmiş normalarla ziddir. Media haqqında Azərbaycan Respublikası Qanuna görə ölkəmizin hüdudlarından kənarda olan və fəaliyyəti respublikamızın ərazisinə və əhalisinə istiqamətlənmiş bütün media subyektləri Azərbaycan Konstitusiya quruluşunun zorla dəyişdirilməsinə, ərazi bütövlüyünün parçalanmasına, hakimiyyətin zorla ələ keçirilməsinə və ya saxlanmasına çalışmamalı, həmçinin irqi, dini, etnik və digər ayrı-seçkilik səyləri göstərməməlidir. Çox təəssüflər olsun ki, öz fəaliyyət prinsiplərinə hörmət etməyən BBC Azərbaycanın Konstitusiya quruluşunun zorla dəyişdirilməsinə, ərazi bütövlüyünün parçalanmasına səbəb olan ermənilərin separatizm fəaliyyətinə qanuni don geyindirərək təbliğ etməklə Azərbaycan qanunlarını da pozur. Bu da imkan verir ki, Azərbaycan dövləti BBC-nin ölkə ərazisində fəaliyyətini məhdudlaşdırmaqla, onun media prinsiplərinə, bu sahədə milli və beynəlxalq qanunlara hörmətlə yanaşmasını tələb etsin”, - deyə politoloq vurğulayıb.
Onun sözlərinə görə, 44 günlük Vətən müharibəsi müddətində Prezident İlham Əliyev demək olar ki, hər gün xarici media qurumlarına müsahibələr verərək Ermənistan-Azərbaycan münaqişəsi barədə həqiqətləri dünya ictimaiyyətinə çatdırırdı. Qələbədən sonra da dövlətimizin başçısının iştirakı ilə media nümayəndələri ilə görüşlər, o cümlədən bu ilin iyul ayında 49 ölkədən 150 xarici qonağın, 34 dövlətin informasiya agentliklərinin və 12 beynəlxalq təşkilatın iştirakı ilə Şuşa Qlobal Media Forumu keçirilib. Həm Azərbaycan Prezidentinin media nümayəndələrinin suallarına verdiyi cavablar, həm də ərazidə Ermənistanın törətdiyi vəhşiliklər münaqişənin mahiyyətini, erməni separatizminin gətirdiyi vəziyyəti bütün dünyaya nümayiş etdirdi.
Münaqişə, onun nəticələri və Azərbaycan dövlətinin regionda sülhün əldə olunması sahəsində apardığı siyasət barədə kifayət qədər faktların açıqlığı və əldə olunması imkanları varkən, erməni lobbisinin təsiri ilə yüksək səviyyədə olan Azərbaycan-Böyük Britaniya münasibətlərinə xələl gətirmək məqsədilə BBC media qurumunun birtərəfli, qərəzli məlumatları yayması böyük təəssüf doğurur.
Bölmənin digər xəbərləri
