ELM VƏ TƏHSİL
BDU-da humanist pedaqogikaya dair III elmi-pedaqoji seminar keçirilib
Bakı, 4 mart, AZƏRTAC
Bakı Dövlət Universitetində (BDU) Filologiya fakültəsinin Azərbaycan dili və ədəbiyyatının tədrisi metodikası kafedrasının və tələbə elmi cəmiyyətlərinin birgə təşkilatçılığı ilə “Müəllim, məni öz içimdə alicənab və nəcib insan yaratmağa ruhlandır” adlı III elmi-pedaqoji seminar keçirilib.
Bu barədə AZƏRTAC-a BDU-dan məlumat verilib. Bildirilib ki, tədbirdə Coğrafiya fakültəsinin tələbəsi Nuray Babaşlı “Əsl müəllim gələcəyin memarı və qurucusudur”, Filologiya fakültəsinin tələbələri Məleykə Mirzəli “Ürəksiz nə anlaya bilərik?”, Bəsti Səttarova “Müəllim rəqabəti deyil, komanda olmağı öyrətməlidir”, Aytən Məhərrəmova “Bu gün məktəbimiz və ədəbiyyatımız necədirsə, sabah millətimiz də elə olacaq”, Sunay Qasımzadə “Tədrisin məqsədi harmonik mütəxəssis deyil, harmonik şəxsiyyət yetişdirməkdir”, Biologiya fakültəsinin tələbələri Elnur İmamalıyev “Əsl müəllim öz üzərində çalışaraq elm və insanlıq oduna qığılcım olmalıdır”, Məltəm Qasımova “Şagirdlərini ilhamlandıran dahi müəllimdir!”, Fizika fakültəsinin tələbəsi Səbinə Süleymanova “Müəllim, məni öz içimdə alicənab və nəcib insan yaratmağa ruhlandır” mövzularında məruzə ediblər.
Seminarda Azərbaycan Dövlət Pedaqoji Universitetinin rektoru professor Cəfər Cəfərov gələcəyin müəllimlərinin üzərinə çox böyük məsuliyyət düşdüyünü qeyd edib. C.Cəfərov vurğulayıb ki, Azərbaycan müəllimləri şagirdləri, ilk növbədə, şəxsiyyət kimi yetişdirməli, onlara humanizm prinsipləri aşılamalıdırlar.
Təhsil İnstitutunun Psixologiya və xüsusi təhsil şöbəsinin müdiri psixologiya elmləri doktoru Elxan Bəylərov, Humanist Pedaqogika üzrə Təhsil Müəssisələrinin Beynəlxalq Assosiasiyasının prezidenti Əməkdar müəllim Asif Cahangirov, 201 nömrəli tam orta məktəbin direktoru Afaq Əliyeva humanist pedaqogikanın prinsipləri barədə danışıb, sinifdaxili idarəetmə, şagirdlərin yaş psixologiyası, tənqidi təfəkkürün inkişafı ilə bağlı fikirlərini bölüşüblər.
Tədbirin sonunda tələbələr müəllim andı içiblər. Məruzə müəlliflərinə sertifikatlar təqdim olunub.