İDMAN
Birinci Avropa Oyunlarının taekvondo yarışları başa çatıb [YENİLƏNİB]
Yarışın qadınlar arasındakı finalında Fransa idmançısı Qvladis Epanque (+67 kq) serbiyalı Milika Mandiki 9:8 hesabı ilə məğlub edərək "Bakı-2015"-in qızıl medalına sahib çıxıb.
18:30
Kişilərin yarışının digər yarımfinal qarşılaşmasında isə rusiyalı Vladislav Larin (+80 kq) xorvatiyalı Vedran Qolecə 8:0 hesabı ilə qalib gələrək finala yüksəlib. Vladislav Larin qızıl medal uğrunda mübarizədə Azərbaycan taekvondoçusu, dünya çempionu Radik İsayev ilə qarşılaşacaq.
Yarışın qadınlar arasındakı yarımfinalında serbiyalı Milika Mandik (+67 kq) ukraynalı Marina Konievanı 15:1 hesabla məğlub edərək finala vəsiqə qazanıb. Onun finaldakı rəqibi xorvatiyalı İva Radosu 6:13 hesabı ilə məğlubiyyətə uğradan Fransa idmançısı Qvladis Epanque olacaq.
Qadınların yarışında mübarizə aparan Azərbaycan taekvondoçusu Marina Tedeyeva (+67 kq) ilk görüşündə ukraynalı Marina Konievaya məğlub olub. Ukraynalı idmançı finaladək irəliləyə bilmədiyindən Azərbaycan təmsilçisi təsəlliverici görüşlərə çıxa bilməyib və medal uğrunda mübarizəni dayandırıb.
17:32
Azərbaycan taekvondoçusu, dünya çempionu Radik İsayev “Bakı-2015”-də final mərhələsinə vəsiqə qazanıb.
AZƏRTAC xəbər verir ki, Radik İsayev 80 kiloqramdan yuxarı çəki dərəcəsi üzrə yarışın yarımfinalında sloveniyalı İvan Konrad Trajkoviç ilə güclərini sınayıb. Azərbaycan taekvondoçusu rəqibinə 17:2 hesabı ilə qalib gələrək finala vəsiqə qazanıb.
15:29
Azərbaycan təmsilçisi, dünya çempionu Radik İsayev dörddəbir final mərhələsində beynəlxalq turnirlərin qalibi olan niderlandlı Yeroen Vanroiy ilə qarşılaşıb. Rəqibini 8:6 hesabı ilə məğlub edən idmançımız yarımfinala yüksəlib.
11:05
Kişilərin yarışında 80 kiloqramdan yuxarı dərəcəsində dörddəbir final mərhələsindən birbaşa mübarizəyə qoşulacaq Azərbaycan taekvondoçusu Radik İsayevin rəqibi məlum olub. Azərbaycan yığma komandasının üzvü, dünya və Avropa çempionumuz ilk görüşdə hollandiyalı Yeroen Vanroiy ilə qarşılaşacaq.
10:42
Bakı, 19 iyun, Məmməd İsayev, AZƏRTAC
“Baku Crystal Hall”da birinci Avropa Oyunları çərçivəsində qadınlar və kişilər arasında taekvondo yarışları davam edir.
AZƏRTAC xəbər verir ki, iyunun 19-da dayanq üzərində qadınlar arasında 67 və kişilər arasında 80 kiloqramdan yuxarı çəki dərəcələrində taekvondoçular qüvvələrini sınayırlar.
Oyunlarda mübarizə aparacaq taekvondoçularımızdan Azərbaycan təmsilçisi Marina Tedeyeva (67 kq-dan yuxarı) ukraynalı Marina Konieva ilə görüşüb və rəqibinə 4:10 hesabı ilə məğlub olub. Ukraynalı idmançı finaladək irəliləsə onda Azərbaycan təmsilçisinin təsəlliverici görüşü olacaq.