İQTİSADİYYAT
Birinci rübdə Oğuzda ümumi məhsul istehsalı ötən ilin müvafiq dövrünə nisbətən 45,2 faiz artmışdır
Oğuz, 20 aprel (AZƏRTAC). 2011-ci ilin birinci rübündə Oğuz rayonunda iqtisadiyyatın əsas sahələrində istehsal olunmuş məhsul və xidmətlərin ümumi həcmi keçən ilin müvafiq dövrü ilə müqayisədə 45,2 faiz artaraq 13 milyon 816 min manat təşkil etmişdir. Rüb ərzində rayonda 390 min manatlıq sənaye məhsulu istehsal edilmişdir. Bu, ötən ilin eyni dövrü ilə müqayisədə 15 faiz çoxdur. 2010-cu ilin birinci rübü ilə müqayisədə pərakəndə əmtəə dövriyyəsi 11 faiz artaraq 10 milyon 70 min manat, əhaliyə göstərilən pullu xidmətlərin həcmi isə 3,3 faiz artaraq 1 milyon 830 min manat olmuşdur.
Bu faktlar aprelin 19-da Oğuz rayon icra hakimiyyəti başçısı yanında 2011-ci ilin birinci rübünün yekunlarına həsr olunmuş şura iclasında icra hakimiyyətinin başçısı Aydın Əlihüseynovun hesabat məruzəsində səsləndirilmişdir.
Məruzəçi daha sonra bildirmişdir ki, Oğuz şəhərində təməli 2007-ci ildə qoyulmuş yeni istirahət park kompleksinin tikintisi artıq başa çatmaq üzrədir. Birinci rübdə həmin ərazidə DSMF-nun rayon şöbəsi və rayon məhkəməsi üçün yeni inzibati binaların tikintisinə başlanmışdır. Hazırda Calut kəndində 220 şagird-yerlik yeni məktəb binasının tikintisi davam etdirilir. Turizmin inkişafı üçün geniş imkanların olduğunu bildirən A. Əlihüseynov, hazırda Oğuz şəhərində, Calut, Xalxal və Bucaq kəndlərində yeni turizm obyektlərinin tikildiyini, infrastrukturun yaradılması istiqamətində lazımi iş aparıldığını diqqətə çatdırmışdır. Qeyd olunmuşdur ki, 2010-cu ildə icrasına başlanılan Oğuz şəhərinin su təchizatı və kanalizasiya sisteminin yenidən qurulması layihəsi üzrə işlər də uğurla davam etdirilir.
Aqrar sahədə görülən işlərə toxunan natiq, 2011-ci ilin məhsulu üçün payızlıq taxıl əkilmiş 13567 hektar sahədə aqrotexniki qulluq işlərinin aparıldığını, indiyədək 1000 hektara yaxın sahəyə yazlıq bitkilərin əkildiyini bildirmişdir. Qeyd etmişdir ki, rüb ərzində rayonda 847 ton ət, 2787 ton süd, 595 min ədəd yumurta istehsal edilmişdir ki, bu da keçən ilin eyni dövrü ilə müqayisədə xeyli çoxdur. Rüb ərzində “Aqroservis” tərəfindən 290 ton azot gübrəsi gətirilərək güzəştli qiymətlərlə kənd təsərrüfatı istehsalçılarına satılmışdır. Bundan əlavə, fermerlərə 19 ədəd yeni texnika lizinqə verilmişdir. Yaşayış məntəqələri və əkin sahələrinin daşqın və sel-sulardan mühafizəsi məqsədi ilə Oğuzçay, Qalaçay, Türyançay və Daşağılçay sistemlərində 78 min kubmetr həcmdə çay məcrasının təmizlənməsi işləri görülmüşdür.
Məruzədə, həmçinin, birinci rübdə əhalinin təbii qaz, elektrik enerjisi, içməli su ilə təminatının yaxşılaşdırılması sahəsində görülən işlərdən bəhs edilmiş, qarşıda duran vəzifələrə toxunulmuşdur.
Məruzə ətrafında çıxışlar olmuşdur.