BOKS ÜZRƏ BEYNƏLXALQ TURNİR BAŞA ÇATMIŞDIR
Martın 9-da Bakıda, Olimpiya İdman Kompleksində Beynəlxalq Həvəskar Boks Assosiasiyasının \AİBA\ prezidenti, professor Ənvər Çoudrinin şərəfinə təşkil edilmiş turnirin final görüşləri keçirilmişdir.
Azərbaycan boksçuları Şahin İmranov 54 kiloqram, Rövşən Hüseynov 57 kiloqram, Emil Məhərrəmov 60 kiloqram, Vüqar Ələkbərov 81 kiloqram, Vüsal Amanov 91kiloqram və Rəşad Süleymanov ən ağır çəkidə qalib gələrək qızıl medallara layiq görüldülər.
Digər çəki dərəcələrində Filippinin iki boksçusu, Qazaxıstan, Özbəkistan, Pakistan və İran komandalarının hərəsindən bir idmançı turnirin qalibi oldu.
Azərbaycan Milli Olimpiya Komitəsinin prezidenti, Milli Məclisin deputatı İlham Əliyev, Avropa Boks Federasiyasının prezidenti Emil Jeçev, respublika gənclər, idman və Turizm naziri Əbülfəz Qarayev və başqaları qaliblərə qızıl medallar, dipıomlar və xatirə hədiyyələri təqdim etdilər.
Beləliklə, Bakıda beş qitənin 20 ölkəsindən 120-dən çox idmançının iştirakı ilə keçirilən boks üzrə 6-cı beynəlxalq turnirə yekun vuruldu. Azərbaycan boksçuları 6 qızıl, 2 gümüş və 11 bürünc medal qazanaraq, komanda hesabında birinci yerə çıxdılar. İkinci, üçüncü və dördüncü yerləri isə Filippin, Pakistan və Özbəkistan boksçuları tutdular. Azərbaycan komandası turnirin ən yaxşı komandası adına layiq görüldü.
Beynəlxalq Həvəskar Boks Assosiasiyasının prezidenti, professor Ənvər Çoudri ənənəvi turnirin çox gözəl, yüksək səviyyədə təşkilindən məmnun qaldığını bildirdi. O, Azərbaycan Boks Federasiyasının prezidenti, MOK-un baş katibi Ağacan Abiyevə turnirin baş mükafatını təqdim etdi. Xatırladaq ki, həmin kubok altıncı dəfədir ölkəmizin paytaxtında qalır.
Azərbaycan MOK-un prezidenti İlham Əliyev 63,5 kiloqram çəki dərəcəsində turnirin qalibi, ən texnikalı boksçu adına layiq görülmüş Pakistan idmançısı Əsgər Əlişaha xatirə hədiyyəsi və kubok təqdim etdi.
X X X
Milli Olimpiya Komitəsinin prezidenti İLHAM ƏLİYEV turnirin gedişi zamanı Azərbaycan televiziyasına müsahibə vermişdir:
JURNALİST: İlham müəllim, Azərbaycan boksçularından üçüncüsü qızıl medala layiq görülür. Milli Olimpiya Komitəsinin on illik yubileyi qeyd ediləcəkdir. Bu mükafatları bir növ yubileyə hədiyyə kimi qiymətləndirmək olar.
İLHAM ƏLİYEV: Elədir, mən sizinlə razıyam. İdmançılarımızın çıxışı bizi çox sevindirir. Qeyd etdiyiniz kimi, artıq bizim idmançılarımız üç qızıl medal qazanıblar. Mən çox şadam ki, xüsusilə Rövşən Hüseynov bu turnirin qızıl mükafatçısı oldu. Bilirsiniz ki, o, çox istedadlı idmançıdır, əvvəllər də çox gözəl çıxış edirdi. Amma sonra o, qəzaya düşmüşdü. Ondan sonra onun boksla məşğul olmasında bir müddət fasilə yarandı. Bir neçə il bundan qabaq mən onunla görüşərkən yenidən boksla məşğul olmağa dəvət etdim. O, bunu qəbul etdi. Ona görə onun qələbəsi məni xüsusilə sevindirir. Əlbəttə, digər idmançılarımızın gözəl çıxışları da məni sevindirir. Amma Rövşənin qələbəsi mənim üçün çox böyük töhfədir, böyük bir hədiyyədir. Ona görə mən onu bu münasibətlə təbrik etdim və medal təqdim etdim.
Hələ yarışlar davam edir, idmançılarımız finalda əksər çəki dərəcələrində çıxış edəcəklər. İnanıram ki, qızıl medalların sayı bundan da çox olacaqdır.
SUAL: Bu günlər respublikamızın idman həyatında xüsusi bir canlanma duyulur. Boksçuların beynəlxalq yarışı, indi, bir qədər sonra voleybolçular mübarizəyə başlayacaqlar. Mütəxəssislərin də rəyi belədir ki, bütün bunlar təsadüf deyildır. Yəni Azərbaycanda idmanın inkişafında belə bir tərəqqiyə nail olunubdur. Siz bundan sonra Azərbaycan idmanının gələcəyini necə görürsünüz? Yəqin bu cür vəziyyət davam edəcəkdir?
CAVAB: Mən əminəm ki, davam edəcəkdir. Yəni artıq Azərbaycanda idman sahəsində çox gözəl təməl qoyulubdur. Biz aparılan işlərin nəticələrini görürük. Əminəm ki, Azərbaycanda idman bundan sonra da sürətlə inkişaf edəcəkdir. Dünya çempionatlarında, xüsusilə olimpiadada müxtəlif idman növlərində qələbələr olacaqdır. Bilirsiniz ki, biz indi olimpiadaya hazırlığa başlamışıq. Əminəm, bizim idmançılarımız bu olimpiadada daha çox medal qazanacaqlar. Bu canlanma duyulur, ictimaiyyət tərəfindən də müsbət qarşılanır. Əlbəttə, buna təkcə idman həvəskarları yox, eyni zamanda bütün vətəndaşlar sevinirlər. Çünki bu, Azərbaycanın idman şöhrətini, ümumiyyətlə, Azərbaycanın şöhrətini ucaldan bir amildir. İdman hər bir ölkə üçün vacibdir. Hesab edirəm, olimpiya oyunları yeganə vasitədir ki, ölkələr öz aralarında aşkar rəqabət aparırlar. Çünki digər sahələrdə rəqabət o qədər görünməyə də bilər. Amma bu, idmanda açıq-aydın görünür. Ona görə Azərbaycanda idmanın belə səviyyəyə qalxması hər bir azərbaycanlı üçün sevindiricidir. Mən bütün idman həvəskarlarını, vətəndaşlarımızı əmin etmək istəyirəm ki, Milli Olimpiya Komitəsi bu istiqamətdə öz fəaliyyətini bundan sonra da davam etdirəcək və xalqımızı, millətimizi neçə-necə belə qələbələrlə sevindirəcəkdir.
JURNALİST: Çox sağ olun. Bu qələbələr, eləcə də Milli Olimpiya Komitəsinin yubileyi münasibətilə sizi təbrik edirik, yeni qələbələr arzulayırıq.
Bölmənin digər xəbərləri
