“Baku Crystal Hall” da keçirilən boks yarışlarının beşinci günü davam edir.

Günün ikinci yarısında rinqə 52, 60, 69 və 91+ kiloqram çəki dərəcələrində kişi boksçular çıxacaqlar. Axşam saatlarında ümumilikdə 16 görüş keçiriləcək.

Bu gün Azərbaycanın iki idmançısı dörddəbir final mərhələsinə vəsiqə qazanıb.

17:00

Boks yarışlarının beşinci gününün ilk yarısının görüşləri başa çatıb.

Səhər seansına qadın boksçuların 51-54 və 60-64 kiloqram çəki dərəcələrində səkkizdəbir final qarşılaşmaları ilə start verilib. Bu mərhələdə Rusiya, İtaliya (2), Almaniya, Polşa  və Böyük Britaniya idmançıları qələbəyə sevinən tərəf olublar.

Kişi boksçuların yarışı böyük marağa səbəb olub. Belə ki, Azərbaycanın 52 və 60 kiloqram çəki dərəcələrində rinqə çıxan hər iki idmançısı - Elvin Məmişzadə və Albert Səlimov görüşlərini qələbə ilə başa vuraraq növbəti mərhələyə yüksəliblər. Boksçularımız müvafiq olaraq irlandiyalı Mayles Kasey və Gürcüstanı təmsil edən Otar Eranosyanı məğlub ediblər (3:0). Bu çəki dərəcələrində digər görüşlər Bolqarıstan-İspaniya, Almaniya-Ukrayna, Gürcüstan-Rusiya, Bolqarıstan-Ermənistan, Slovakiya-Türkiyə və İrlandiya-İtaliya idmançıları arasında keçirilib. Qarşılaşmaların nəticələrinə əsasən 52 kiloqramda Bolqarıstan, Almaniya və Rusiya, 60 kiloqram çəki dərəcəsində isə Bolqarıstan, Türkiyə və İrlandiya idmançıları “Bakı-2015”-də çıxışlarını davam etdirmək hüququ qazanıblar.

15:56

Azərbaycanın digər boksçusu da döyüşünü qələbə ilə başa vurub. Albert Səlimov (60 kq) gürcüstanlı rəqibi Otar Eranosyanı 3:0 hesabı ilə məğlub edərək adını dörddəbir finala yazıb. 

14:41

Boksçularımız günə uğurla başlayıblar.

Yarışda 52 kiloqram çəki dərəcəsində mübarizə aparan Avropa çempionatının mükafatçısı Elvin Məmişzadə irlandiyalı rəqibinə heç bir şans verməyib. Rəqibindən üstün döyüş nümayiş etdirən boksçumuz 3:0 hesabı ilə qalib gələrək dörddəbir finala yüksəlib.

14:21

Qadınların yarışında bu çəkidən əlavə, 60-64 kiloqramda da boksçular rinqə çıxacaqlar. Bu çəkidə dörd görüş keçiriləcək.

Günün maraqla gözlənən qarşılaşmaları isə kişilər arasında 52 və 60 kiloqram çəki dərəcələrində baş tutacaq. Bu çəkilərdə Azərbaycan boksçuları Elvin Məmişzadə və Albert Səlimov mübarizəyə qoşulacaqlar.

Həmin çəki dərəcələrində azarkeşlər Bolqarıstan-İspaniya, Almaniya-Ukrayna, Gürcüstan-Rusiya (52 kq), Bolqarıstan-Ermənistan, Slovakiya-Türkiyə və İrlandiya-İtaliya (60kq) görüşlərinə şahidlik edəcəklər.

Günün birinci yarısında kişi və qadın boksçuların yarışlarında ümumilikdə 15 görüş keçiriləcək.

14:07

“Bakı-2015” birinci Avropa Oyunlarında iyunun 20-də rinqə çıxacaq Azərbaycan boksçularının rəqibləri müəyyənləşib. Belə ki, bu gün “Baku Crystall Hall”da keçiriləcək döyüşlərdə iki təmsilçimiz iştirak edəcək.

AZƏRTAC xəbər verir ki, 52 kiloqram çəki dərəcəsində mübarizəyə Elvin Məmişzadə qoşulacaq. Avropa çempionatının mükafatçısı səkkizdəbir finalda belaruslu İvan Fiqurenkanı məğlub edən irlandiyalı Mayles Kasey ilə görüşəcək.

Daha sonra Rio-de-Janeyro Olimpiadasına artıq vəsiqəni təmin edən Albert Səlimov (60 kq) çıxış edəcək. O, bu mərhələdə latviyalı Artyom Ramlavsı məğlub edən Gürcüstan boksçusu Otar Eranosyan ilə qarşılaşacaq.

13:53

Bakı, 20 iyun, Samirə Allahverdiyeva, Abbasəli Yadigarov, AZƏRTAC

“Baku Crystal Hall”da boks yarışları davam edir.

AZƏRTAC xəbər verir ki, qadınların yarışında 51 kiloqram çəki dərəcəsində səkkizdəbir final mərhələsinin oyunları keçirilir. İlk görüşdə Rusiya idmançısı Yelena Savalyova irlandiyalı Mişela Valşa qalib gələrək dörddəbir final mərhələsinə yüksəlib. Növbəti görüşlər finlandiyalı Marjut Lausti və italiyalı Mariya Davide, almaniyalı Azize Nimani və Fransa boksçusu Delfin Mançini arasında keçiriləcək.

Bu çəki dərəcəsində Azərbaycan boksçusu Anna Əlmərdanova birbaşa döddəbir final mərhələsindən mübarizəyə qoşulacaq. Onun rəqibi Bolqarıstan idmançısı Stanimira Petrova olacaq.