bp ŞİRKƏTİNDƏ BİRİNCİ RÜBÜN YEKUNLARINA DAİR MƏTBUAT KONFRANSI KEÇİRİLMİŞDİR
D.Vudvord bildirdi ki, bu ilin ilk üç ayında “Çıraq”, “Mərkəzi Azəri” və “Qərbi Azəri” platformalarından birlikdə gündə orta hesabla 384.000 barrel neft hasil edilmişdir. 2006-cı il üçün neft hasilatı üzrə gündəlik proqnoz 439.000 barreldir.
Bu ilin sonunadək 3 platformadan gündəlik ümumi neft hasilatı həcminin yarım milyon barreldən artıq olacağı gözlənilir.
Məlumat verildi ki, Səngəçal terminalının gündəlik ümumi texnoloji emal gücü 400.000 barreldən 750.000 barrelə çatdırılmış, texnoloji emal olunmuş neftin Səngəçal terminalından, dəmir yolu da daxil olmaqla, mövcud ixrac marşrutları ilə ixracı davam etmiş, 6,5 milyon barrel neft Bakı-Tbilisi-Ceyhan (BTC) kəmərinin doldurulması üçün istifadə olunmuşdur.
“Mərkəzi Azəri” və “Qərbi Azəri” platformalarından hasil olunan səmt qazı hazırda 28 düymlük yeni sualtı qaz kəməri ilə Səngəçal terminalına çatdırılır və buradan “Azəriqaz”a təhvil verilir.
Cari ilin ilk üç ayında Səngəçal terminalından “Azəriqaz”a 440 milyon kubmetr qaz təhvil verilmişdir.
Qeyd edildi ki, “Dərinsulu Günəşli” (Faza 3) layihəsində bu ilin əvvəlindən bəri nəzərdə tutulduğundan artıq (48 faiz) irəliləyiş əldə edilmişdir. Qazma, texnoloji təchizat və yaşayış platformasının (QTTY) üst modullarının ölkə daxilində quraşdırılması 37 faiz tamamlanmış, bu platforma üçün ölkə xaricində quraşdırılan yaşayış blokları və qazma qurğuları İsveç və Hollandiyadan cari ilin 3-cü rübündə gətiriləcəkdir.
AÇG Faza 1 layihəsinin reallaşdırılmasına başlanandan bəri “İsrafil Hüseynov” borudüzən barjı vasitəsilə ümumi uzunluğu 900 kilometr olan (274 kilometr uzunluğunda Şahdəniz sualtı boru kəmərləri də daxil olmaqla) 18 sualtı boru kəməri çəkilmişdir. Səngəçal terminalındakı BTC baş nasos stansiyasının Faza 2 hissəsi də istismar əməliyyatlarına təhvil verilmişdir. BTC-nin baş nasos stansiyası AÇG Faza 2 obyektlərindən gələn neftin hamısının qəbul edilməsi üçün artıq hazırdır.
İndi burada 2400-dən artıq adam çalışır ki, onların 75 faizi yerli Azərbaycan vətəndaşlarıdır. Bu işçilərin təxminən yarısı Qaradağ rayonunun sakinləridir.
BTC-nin tamamlanması və boru kəmərinin neftlə doldurulması işləri ötən üç ayda ardıcıl irəliləmiş, həmin iş üçün nəzərdə tutulmuş 641 milyon dollar əsaslı xərclərin 247 milyon dolları sərf edilmişdir (bu məbləğə boru kəmərinin doldurulması və maliyyələşdirmə xərcləri də daxildir). Boru kəmərinin növbəti 440 kilometrlik hissəsində sınaq və istismar işləri aparılmış, Türkiyə hissəsində boru kəmərinin neftlə doldurulması və tamamlanması davam etmişdir. Aprelin əvvəlində Türkiyə ərazisindəki 3 saylı nasos stansiyasının (PT3) istismara verilməsi tamamlandıqdan sonra, aprelin 16-da 4 saylı nasos stansiyasına (PT4) qədər olan hissənin neftlə doldurulmasına başlanmışdır. Boruya gündə 175 min barrel neft vurulur. Neft hazırda PT3-dən PT4-ə doğru irəliləyir və onun PT4-ə təxminən səkkiz günə çatacağı gözlənilir. 1768 kilometrlik xəttin doldurulması üçün ümumilikdə 10 milyon barrel neft tələb olunur.
Şirkətin rəhbəri dedi ki, “Şahdəniz” qaz və kondensat yatağının işlənilməsi layihəsi üzrə tikinti işləri 2006-cı ilin əvvəlindən bəri cədvələ uyğun irəliləmiş, 1-ci mərhələ üzrə tikinti işlərinin ümumilikdə 93 faizi artıq tamamlanmışdır.
Birinci rübündə layihə üzrə bu il üçün nəzərdə tutulmuş 865 milyon dollarlıq əsaslı xərclər büdcəsinin 288 milyon dolları xərclənmişdir.
Layihə üzrə ilk qaz sentyabrın sonunadək dünya bazarına çatdırılacaqdır.
“Şahdəniz” sualtı boru kəmərlərinin çəkilməsi proqramı da uğurla başa çatmışdır. Hər birinin uzunluğu 90 kilometr olan üç boru kəməri - 26 düymlük qaz, 12 düymlük kondensat və 4 düymlük monoetilen qlikol kəməri çəkilmişdir.
D.Vudvord diqqətə çatdırdı ki, Cənubi Qafqaz Boru Kəmərinin layihəsi üzrə işlərin 96 faizi başa çatmışdır.
Natiq sağlamlıq, əməyin təhlükəsizliyi və ətraf mühit məsələlərinə xüsusi diqqət göstərildiyini vurğulayaraq dedi ki, sosial sərmayə layihələrinə “Azəri-Çıraq-Günəşli” üzrə 1.596 milyon, BTC/CQBK marşrutu boyunca 4.176 milyon, Azərbaycanın digər rayonlarında 380 min, “Şahdəniz” üzrə 612 min ABŞ dolları sərf edilmişdir.
Yerli işçi heyətinin sayı bp şirkəti üzrə 1506 nəfər, BTC/CQBK-də 1300 nəfər, “Şahdəniz” layihəsində 2100 nəfər olmuş, “Azəri” layihəsində podratçılar vasitəsilə görülən işlərə isə 7 min 900 nəfər cəlb edilmişdir.
Bu il görüləcək digər işlər barədə də danışan “bp-Azərbaycan”ın prezidenti D.Vudvord və ayrı-ayrı layihələrin rəhbərləri jurnalistlərin suallarına da cavab verdilər.