Bakı, 23 yanvar (AZƏRTAC). Britaniyanın balaca sakini Tilli Souford 15 aylıq olanda qaynar suyun içinə düşəndən bəri dəri köçürülməsi ilə bağlı 321 cərrahiyyə əməliyyatına məruz qalmışdır.

AZƏRTAC xəbər verir ki, Tillinin bədənində dəhşətli yanıqlar yaranmış, onun dərisinin 86 faizi yanmışdır. Qızın yalnız üzü xəsarətsiz qalmışdır. Hakimlər onun sağ qalma şansının 5 faiz olduğunu bildirmişdilər. Buna baxmayaraq, balaca Tilli 321 cərrahiyyə əməliyyatına məruz qaldıqdan sonra indi deyir, gülür, oynayır.

İngiltərənin Nottingempşir qraflığındakı Strilli şəhərində yaşayan Tilli 2009-cu ilin martında yanmışdır. 15 aylıq Tilli vannanın içindəki oyuncağı götürmək istəyəndə kiçik qardaşı təsadüfən isti su kranını açmışdır. Müvazinətini saxlaya bilməyən Tilli də qaynar su ilə dolu vannaya düşmüşdür.

Anası Emma Souford qışqıraraq vanna otağına girmiş, qızını qaynar sudan çıxarmışdır. Lakin Tilli artıq yanmışdır.

Anası bildirmişdir ki, ikinci mərtəbədəki otaqları yığışdırırdım. Aşağıya, paltaryuyan maşını yoxlamağa düşəndə Tillinin qışqırığını eşitdim. Onu heç vaxt tək qoymurdum. Amma Tillinin başı oynamağa elə qarışmışdı ki, ona mane olmadım. Tillini vannadan çıxaranda balam huşunu itirmişdi. Dərisi də tikə-tikə əlimdə qalmışdır.

Emma və əri Kayl dərhal Tillini Birmingham Children's Hospitala aparmışlar. Burada Tilli 12 saatlıq cərrahiyyə əməliyyatına məruz qalmışdır.

Həkimlər dediklərinə görə Tillinin yaşamaq şansı 5 faizdən artıq deyildir. Valideynləri artıq onun dəfninə hazırlaşırdılar. Lakin Tilli ölümə təslim olmadı, 321 əməliyyat keçirdi.

Cərrahlar Tillini normal vəziyyətə gətirmək üçün köpəkbalığı qığırdağı və inək kollagenindən istifadə etmişlər.

Həkimlər bildirmişlər ki, onlar indiyədək belə yanıq halları ilə qarşılaşmamışdılar. Üstəlik, Tillinin əhvalatı dünya tibbində ən nadir sağalmalardan biri sayılır.