SİYASƏT
Britaniyanın televiziya kanalında Azərbaycanla diplomatik münasibətlərin 30 illiyindən və bu illər ərzində qazanılan uğurlardan danışılıb VİDEO
London, 10 iyun, AZƏRTAC
Diplomatik münasibətlərin 30 illiyi ilə bağlı “Lancaster House”da keçirdiyimiz tədbirə müvafiq olaraq Britaniya tərəfi Bakı şəhərində təntənəli tədbir təşkil edib. Həmçinin Prezident İlham Əliyev ilə Baş nazir Boris Conson arasında məktub mübadiləsinin baş tutması əlaqələrimizin yüksək səviyyədə olduğunu bir daha sübut edir.
AZƏRTAC xəbər verir ki, bu sözləri Azərbaycanın Böyük Britaniya və Şimali İrlandiya Birləşmiş Krallığındakı səfiri Elin Süleymanov geniş auditoriyaya malik “GB News” televiziya kanalına müsahibəsində deyib.
Müsahibədə Avropada enerji təhlükəsizliyi, Azərbaycan-Britaniya əlaqələri, yaşıl enerji, diplomatik münasibətlərin yaranmasının 30 illiyi, Azərbaycan ilə Ermənistan arasında münasibətlərin normallaşması və sair mövzulara toxunulub.
Aparıcı Darren Makkafri ilk olaraq, Azərbaycan Britaniya diplomatik münasibətlərin yaranmasının 30 illiyindən söz açaraq bu illər ərzində qazanılan uğurlar barədə sual verib.
Diplomat Azərbaycan ilə Birləşmiş Krallıq arasında münasibətlərin yüksək səviyyəyə qalxdığını, Britaniyanın ən böyük xarici investor olduğunu, BP başda olmaqla, tikinti şəhərsalma kimi fərqli sahələrdə 600-dən çox Britaniya şirkətinin Azərbaycanda fəaliyyət göstərdiyini bildirib.
Səfir müsahibəsində Bakı-Tbilisi-Ceyhan neft boru xəttinin, Cənub Qaz Dəhlizinin Avropanın enerji təhlükəsizliyinə töhfə verdiyini və Azərbaycanın uzaqgörən strategiyasını bir daha sübut etdiyini vurğulayıb.
E.Süleymanov deyib: “Əlbəttə, Azərbaycan əməkdaşlığı artırmağa hazırdır, amma bu kimi layihələrin uğurunu təmin etmək üçün uzunmüddətli yanaşma və müqavilələr vacibdir. Azərbaycan yaşıl enerjiyə keçid mərhələsinə başlayıb və zaman göstərir ki, real fikir və praktik addımlar əsasında atılan addımlar daha səmərəli olur”.
Müsahibə zamanı Ermənistan-Azərbaycan münasibətlərinə toxunulub, ölkəmizin daim sülhün tərəfdarı olduğu, işğal məsələsinin məhz sülh yolu ilə həll edilməsi üçün 30 il davamlı danışıqların aparıldığı jurnalistin diqqətinə çatdırılıb.
Diplomat, Azərbaycanın tarix boyu demokratiya, sülh və sabitliyi dəstəklədiyini, insan hüquqlarına hörmətlə yanaşdığını, hətta Azərbaycan Xalq Cümhuriyyətinin Şərqdə qadınlara səsvermə hüququ verən ilk dövlət olduğunu bildirib.
Aynurə Tağıyeva
AZƏRTAC-ın xüsusi müxbiri
London