AZƏRTAC xəbər verir ki, bu il oktyabrın 6-7-də Belçikanın Brüssel şəhərində Avropa İttifaqı-Azərbaycan Parlamentlərarası Əməkdaşlıq Komitəsinin üzvlərinin 9-cu iclası keçirilmişdir. Milli Məclisin sədr müavini Valeh Ələsgərov və Avropa Parlamentinin fransalı deputatı Mari İsler Bequinin həmsədrliyi ilə aparılan iclasda Avropa İttifaqı və Azərbaycan Respublikası, Milli Məclis və Avropa Parlamenti arasında əməkdaşlığın müxtəlif istiqamətləri üzrə geniş müzakirələr aparılmışdır.

Müzakirələrdə Milli Məclisin və Avropa Parlamentinin deputatları, Azərbaycan Hökuməti və Avropa İttifaqının müvafiq qurumlarının nümayəndələri fəal iştirak edərək, gündəliyə daxil olan məsələlərə və əməkdaşlığın perspektivlərinə dair fikir və təkliflərini bölüşmüşlər.

İclasın nəticəsi olaraq, Avropa İttifaqı-Azərbaycan Parlamentlərarası Əməkdaşlıq Komitəsinin müvafiq Bəyanat və Tövsiyələri qəbul olunmuşdur. Bəyanat və Tövsiyələrdə Azərbaycan və Avropa İttifaqı arasında əlaqələrin gücləndirilməsinin hər iki tərəfin maraqlarına uyğun olması, Azərbaycan xalqının Avropanın digər xalqları ilə ümumi dəyərləri bölüşdüyü bir daha təsdiqlənmişdir. Azərbaycan-Avropa İttifaqı münasibətlərini və əməkdaşlığını daha da genişləndirmək və inkişaf etdirmək məqsədilə tərəflər qanunvericilik bazasının uyğunlaşdırmasına dair bütün lazımi tədbirlərin həyata keçirilməsinin vacibliyini qeyd etmişlər.

2006-cı ilin noyabrında qəbul edilmiş Avropa Qonşuluq Siyasəti çərçivəsində Fəaliyyət Planının vaxtında həyata keçirilməsinin vacibliyi qeyd olunaraq, Azərbaycanın və digər Cənubi Qafqaz ölkələrinin Avropa İttifaqına yaxınlaşmasının regionda sabitliyin və inkişafın möhkəmlənməsinə xidmət edəcəyi bildirilmişdir.

Bəyanat və Tövsiyələrdə Azərbaycan Respublikasının suverenliyi, ərazi bütövlüyü, beynəlxalq səviyyədə tanınmış və qəbul edilmiş sərhədlərinin toxunulmazlığı bir daha dəstəklənmiş, Ermənistan-Azərbaycan, Dağlıq Qarabağ münaqişəsinin sülh yolu ilə həll edilməsinin vacibliyi qeyd edilmişdir. Sənəddə Azərbaycanın işğal olunmuş ərazilərindən 1990-cı illərin əvvəllərində etnik təmizləmənin qurbanları olmuş yüz minlərlə məcburi köçkünün hələ də öz evlərinə təhlükəsiz və insan ləyaqətinə riayət ediləcək şəkildə geri dönmək hüququndan məhrum edilməsindən dərin təəssüf hissi vurğulanaraq, Ermənistan qüvvələrinin Dağlıq Qarabağ daxil olmaqla Azərbaycanın bütün işğal olunmuş ərazilərindən çıxarılmasına və məcburi köçkünlərin evlərinə qaytarılmasına çağırış ifadə olunmuşdur.

Bəyanat və Tövsiyələrdə BMT Baş Məclisinin Azərbaycanın işğal olunmuş ərazilərində vəziyyətlə bağlı 2008-ci il 14 mart tarixli qətnaməsi və NATO-nun 2008-ci il 3 aprel tarixli Buxarest Sammitinin Bəyannaməsi xüsusilə qeyd olunmuşdur.

Sənəddə Azərbaycanın Avropa ilə Asiyanı birləşdirən körpü kimi geostrateji əhəmiyyəti vurğulanaraq, ölkəmizin strateji enerji layihələrinin reallaşdırılması ilə bağlı imkanları və rolu qeyd olunmuş, Azərbaycanın 2007-2008-ci illərdə biznesin idarə edilməsi sahəsində ən qabaqcıl islahatçı və sərmayələr üçün açıq iqtisadiyyatı olan ölkələr sırasında olması alqışlanmışdır. Bu faktın Dünya Bankının və Beynəlxalq Maliyyə Korporasiyasının birgə hesabatında əks edildiyi bildirilmişdir.