Yevlax, 21 oktyabr (AZƏRTAC). 2013-ci ilin doqquz ayında Yevlax rayonunda ümumi daxili məhsulun (ÜDM) həcmi 366,4 milyon manat olmuşdur. Bu, ötən ilin eyni dövrünə nisbətən 78,5 milyon manat və yaxud 27,3 faiz çoxdur. ÜDM-in 8,6 milyon manatını sənaye, 65,2 milyon manatını kənd təsərrüfatı, 77,9 milyon manatını tikinti, 172 milyon manatını ticarət, 3,8 milyon manatını nəqliyyat, 0,8 milyon manatını rabitə, 38,2 milyon manatını digər xidmətlər təşkil etmişdir. Adambaşına 2969 manat ÜDM istehsal olunmuşdur ki, bu da 2012-ci ilin doqquz ayına nisbətən 622,5 manat artım deməkdir.

AZƏRTAC xəbər verir ki, bu faktlar Yevlax rayonunda ilin doqquz ayının yekunlarına həsr olunmuş hesabat yığıncağında səslənmişdir. Yığıncaqda daha sonra bildirilmişdir ki, rayonda geniş tikinti-quruculuq işləri aparılmış, infrastrukturun yaxşılaşdırılmasına, əhalini narahat edən problemlərin aradan qaldırılmasına xüsusi diqqət yetirilmişdir. Hesabat dövründə rayon sakinlərinə, sahibkarlara, iş adamlarına 23 milyon 796,8 min manat həcmində kredit verilmiş, 1027-si daimi olmaqla 1159 iş yeri açılmışdır.

Qeyd olunmuşdur ki, doqquz ayda bütün maliyyə mənbələri hesabına kapital qoyuluşuna 91 milyon manat vəsait yönəldilmiş, 180 çarpayılıq mərkəzi şəhər xəstəxanası, Sənaye və Energetika Nazirliyinin regional qaz nəzarəti idarəsinin binası tikilib istifadəyə verilmiş, hava limanının inzibati binası əsaslı təmir olunmuşdur. Həmçinin Balçılı kənd tam orta və Aran qəsəbə 3 nömrəli ümumi orta məktəbləri üçün yeni binalarının inşası, Heydər Əliyev Fondunun vəsaiti hesabına Kövər kənd tam orta məktəbinin əsaslı təmiri başa çatdırılmışdır.

Hesabat dövründə Yevlax şəhərindəki Heydər Əliyev Xiyabanı və Nizami parkı da əsaslı təmir olunmuşdur. 8 min nəfər əhalinin yaşadığı 11 yaşayış məntəqəsini birləşdirən Bakı-Qazax magistralı-Səmədabad-Qaraməmmədli-Rüstəmli-Qaramanlı-Köyük kəndlərarası avtomobil yolunun 5,5 kilometr hissəsi istifadəyə verilmişdir. Bakı-Şamaxı-Yevlax avtomobil yolunun Yuxarı Qarxun va Aşağı Qarxun kəndləri arasındakı 4,2 kilometr hissəsində isə tikinti işləri başa çatmaq üzrədir.

Həmçinin məlumat verilmişdir ki, hazırda Kür çayı sahilində 5 ulduzlu hotelin, təhsil şöbəsi, regional referens toksikologiya və karantin ekspertiza laboratoriyası, “Azərbaycan Beynəlxalq Bank” ASC-nin Yevlax filialı, Qaz İstismar Sahəsi, 11 saylı Ərazi Vergilər İdarəsi, İqtisadi İnkişaf Nazirliyinin Aran Regional İdarəsi üçün binaların tikintisi, Kür çayı üzərindəki dəmir yol körpüsünün əsaslı təmiri davam etdirilir.

Yığıncaqda ayrı-ayrı sahələr üzrə görülmüş işlər barəsində məlumat vermiş, əldə olunmuş uğurlardan, mövcud problemlərin aradan qaldırılması yollarından da danışılmış, qarşıda duran vəzifələr ətrafında fikir mübadiləsi aparılmışdır.