“Canavar” ləqəbli döyüşçünün cəsarət dastanı VİDEO
Ağstafa, 6 noyabr, Ruslan Novruzoğlu, AZƏRTAC
Hər xalqın tarixində elə igidlər var ki, onların həyat yolu bir məktəbə çevrilir. Onlar gücünü təkcə idmanda yox, Vətən sevgisində də göstərən, azadlıq və ədalət uğrunda sonadək mübarizə aparan insanlardır. Belə qəhrəmanların hekayələri gənclərə vətənpərvərlik, mərdlik və fədakarlığın nə demək olduğunu anlatmaq baxımından böyük əhəmiyyət daşıyır. İdman təcrübəsini döyüş şücaəti ilə birləşdirib Zəfər tariximizdə yer alan şəhidlərimizdən biri də Məhəmmədəli Ələkbərovdur.
AZƏRTAC-ın bölgə müxbiri xəbər verir ki, hələ uşaq yaşlarından idmana sevgisi olan Məhəmmədəlinin böyüdükcə bu sahədə nailiyyətləri də davam edir. Respublika üzrə keçirilən bir çox yarışlarda çox sayda fəxri fərman, medallar və idmanının “MMA Full Contact” döyüş növü üzrə kəmər və qızıl medal qazanıb. 1990-cı ildə Ağstafa rayonunun Poylu kəndində anadan olan şəhid Məhəmmədəli Ələkbərov hərbi xidmətini başa vurduqdan sonra 2014-cü ildən Dövlət Sərhəd Xidmətində xidmətə başlayıb. Həmin illərdə Sərhəd Xidmətinin Tədris Mərkəzində müxtəlif vəzifələrdə qulluq edən Məhəmmədəli öz nizam-intizamı ilə seçilib. 2020-ci ilin sentyabrında başlayan Vətən müharibəsi Məhəmmədəli üçün Birinci Qarabağ müharibəsi şəhidi olan əmisinin qisasını almaq üçün bir döyüş meydanı oldu. Elə məhz əmisinin doğum günündə, 22 oktyabrda şəhadətə yüksəlib. Məhəmmədəlinin anası deyir ki, oğlu Məhəmmədəli körpəliyindən həm idmana həm də Vətənə bağlı olub. Məktəbə gedəndən isə idmana xüsusi yer ayırdı, mütəmadi idmanla məşğul olurdu. “Məhəmmədəli üçün Vətən, sonra da sevimli məşğuliyyəti idman öndə dururdu. Tez-tez yarışlara gedirdi və turnirlərdən qalibiyyətlə gələrdi. Deyirdi qələbələrimi sənə həsr edirəm. Şəhid əmisi də idmançı olub. Məhəmmədəli həmişə məni fərəhləndirib. Onun uğurları məni çox sevindirirdi. Fəxr edirdim ki, mənim belə mərd, igid oğlum var” - deyə anası Təranə Ələkbərova bildirib.
Vətən müharibəsində Məhəmmədəli Ələkbərov Çevik Hərəkət Dəstəsinin tərkibində Füzuli və Cəbrayıl rayonları istiqamətlərində bir çox yaşayış məntəqələrinin azad olunması uğrunda döyüşlərdə uğurla iştirak edib. İran İslam Respublikası ilə Dövlət sərhədlərimizin bərpası zamanı məhz onun fədakarlığı nəticəsində döyüş yoldaşları mühasirədən çıxardılıb. “Oğluma döyüş yoldaşları “canavar” ləqəbi qoyublar. Göstərdiyi mərdlik və cəsarətə görə o ləqəbi qazanmışdı. Döyüş meydanına birinci girərmiş. Döyüş yoldaşları onun göstərdiyi igidliklərdən çox danışıb. Bu gün oğlumla fəxr edirəm. Allah oğluma, bütün şəhidlərimizə rəhmət eləsin!” - deyə, anası əlavə edib.
Dövlət Sərhəd Xidmətinin giziri, xüsusi təyinatlı Məhəmmədəli Ələkbərovun döyüş meydanındakı şücaəti dövlət tərəfindən də yüksək qiymətləndirilib. Gənc qəhrəman göstərdiyi rəşadətə görə, dövlət başçısının sərəncamları ilə “Hərbi xidmətə görə”, “Vətən uğrunda”, “Zəngilanın azad olunmasına görə”, Xocavəndin azad olunmasına görə”, “Cəbrayılın azad olunmasına görə” medalları və “3-cü dərəcəli Vətənə xidmətə görə” ordeni ilə təltif olunub. Vətənə iki qız əmanəti qalan şəhid Məhəmmədəli Ələkbərov Ağstafanın Poylu kənd qəbiristanlığında dəfn olunub.
Bölmənin digər xəbərləri
