Bakı, 6 avqust (AZƏRTAC). Cari ilin birinci yarısında Yeni Azərbaycan Partiyasına (YAP) 20 min 559 nəfər üzv qəbul olmuşdur ki, bu da ötən ilin müvafiq dövrü ilə müqayisədə 15 faiz çoxdur.

YAP-dan AZƏRTAC-a bildirmişlər ki, iyulun 1-nə olan məlumata görə partiya üzvlərinin sayı 575 min 591 nəfər olmuşdur.

Yeni Azərbaycan Partiyasının daim dövlətçiliyin möhkəmləndirilməsi və inkişafı ideyasını əsas götürməsi, təbliğ etməsi cəmiyyətimizin hər bir üzvündə bu ideyanın daşıyıcısı olmaq arzusu yaratmışdır. Elə bunun nəticəsidir ki, bu ilin ilk altı ayı ərzində YAP-a üzv qəbul edilənlərin sayı 20.559 nəfər olmuşdur.

Ümummilli lider Heydər Əliyevin rəhbərliyi ilə yaradılmış və bu gün Prezident İlham Əliyevin sədri olduğu YAP-ın cəmiyyətdə nüfuzu gündən-günə artmaqdadır.

YAP-ın, ideyalarını fəaliyyət proqramı kimi qəbul etdiyi ümummilli lider Heydər Əliyevin əsasını qoyduğu siyasi kursa sadiqlik nümayiş etdirməsi, həmçinin partiyanın sədri, Prezident İlham Əliyevin uğurlu daxili və xarici siyasət yürütməsi, Azərbaycanı modern dövlətə çevirməsi insanların bu partiyaya olan inamını daha da möhkəmləndirmişdir. Eyni zamanda, YAP-ın cəmiyyətin inkişafını hədəfləyən çoxsaylı sosial layihələr reallaşdırması, sosiumun kreativ və intellektual hissəsi olan gəncləri dövlətçilik, milli maraqlar ətrafında sıx birləşdirməsi onun tərəfdarlarının sayının dəfələrlə artmasına səbəb olmuşdur. Məhz bunun nəticəsidir ki, müvafiq dövrdə partiya sıralarına qəbul olunanların 11 mindən çoxunu (ötən ilin müvafiq dövründə bu rəqəm 9924 olmuşdur), yəni 53,5 faizini gənclər təşkil etmişdir.

Təbii ki, bu cür artım bir daha insanların Yeni Azərbaycan Partiyasına, onun sədrinə inandığını və onu dəstəklədiyini sübut edir. Şübhə yoxdur ki, partiyanın sıraları dövlətçiliklə bağlı olan insanların hesabına bundan sonra daha da genişlənəcək və cəmiyyətimiz ölkəmizin inkişafı prosesində YAP-la birgə addımlayacaqdır.