Cəlilabad, 5 noyabr, Bağır Əliyev, AZƏRTAC

Avropa İttifaqı (Aİ), BMT İnkişaf Proqramı, Azərbaycan Respublikasının Təhsil Nazirliyi və Peşə Təhsili üzrə Dövlət Agentliyinin birgə həyata keçirdiyi layihə çərçivəsində noyabrın 5-də Cəlilabad rayonunun Göytəpə şəhərində əsaslı təmir olunmuş Peşə Təhsili Mərkəzinin emalatxanasının açılışı olub. Tədbirdə Aİ-nin Azərbaycandakı Nümayəndəliyinin rəhbəri, səfir Kestutis Yankauskas, BMT İnkişaf Proqramının Azərbaycandakı Rezident Nümayəndəsi Alessandro Frakassetti, Təhsil nazirinin müavini İdris İsayev, Peşə Təhsili üzrə Dövlət Agentliyinin rəhbəri Pərviz Yusifov və Cəlilabad Rayon İcra Hakimiyyətinin başçısı Namiq Zeynalov iştirak ediblər.

AZƏRTAC-ın bölgə müxbiri xəbər verir ki, peşə təhsili emalatxanası Avropa İttifaqının maliyyələşdirdiyi “Azərbaycanda peşə təhsili və təlimi mərkəzlərinin müasirləşdirilməsi” adlı layihə çərçivəsində yenidən qurulub.

Əsaslı təmir edilən emalatxananın istifadəyə verilməsində məqsəd Lənkəran İqtisadi Zonasında Regional Peşə Təhsili və Təlimi (PTT) Mərkəzinin təsis edilməsinə dəstək göstərməkdir.

2018-ci ilin yazından həyata keçirilən layihə çərçivəsində Lənkəran iqtisadi rayonunda müasir regional PTT Mərkəzinə çevrilən Cəlilabad Peşə Liseyinin infrastrukturu, texniki bazası, təlim və fəaliyyət imkanlarını əhəmiyyətli dərəcədə dəyişib.

Cəlilabad PTT Mərkəzinin təhsil proqramında kənd təsərrüfatı və istehsal sektorundakı peşələrə önəm verilir.

1943-cü ildə təsis olunan hazırkı PTT Mərkəzinin özülünü təşkil edən Cəlilabad Peşə Liseyi Azərbaycanda ən qocaman və ilk peşə təhsili məktəblərindən biridir.

Region bol məhsul verən kənd təsərrüfatına görə tanındığı və MDB məkanında buğda, üzüm, tərəvəz və meyvə yetişdirən aparıcı rayon olduğu halda, Cəlilabadda və bütövlükdə Azərbaycanın cənub regionunda tikinti və mebel sənayesinə də böyük həcmdə yatırımlar edilir.

Yerli imkanları bu sahələrdə əmək bazarının tələblərinə uyğunlaşdırmaq və təhsillə məşğulluq arasında körpü yaratmaq məqsədilə BMT İnkişaf Proqramı mövcud vəziyyət və bazarla bağlı təhlillər aparıb. Nəticələr işsizliyin və hazırda əmək bazarında tələb olunan iş vərdişlərinə malik insanların çatışmazlığı hallarının aradan qaldırılmasında bir sıra yeni təhsil sahələrinin və mahiyyət etibarilə yeni tədris modullarının və tədris planlarının təsis edilməli olduğunu üzə çıxarıb.

Bu gün Cəlilabaddakı Regional PTT Mərkəzində müxtəlif proqramlar üzrə təhsil alan 480-ə yaxın tələbə peşə bacarıqlarını artırır.

Qeyd edək ki, 2018-ci ildən 280-dən çox tələbə məhz Avropa İttifaqının maliyyə dəstəyi hesabına PTT Mərkəzində tətbiq olunan altı yeni ixtisas üzrə praktiki iş vərdişlərinə yiyələnir. Bu sıraya kənd təsərrüfatı sahəsində önəm verilən sahə-fermerlik, məhsul yetişdirmə, şərabçılıq, habelə mebel istehsalı üzrə əlavə üç ixtisas-dülgərlik, mebel ustası və üzükçü-dizayner peşəsi aiddir.

Yeni təhsil sahələri, eyni zamanda, Azərbaycanın cənub rayonlarında gender maneələrinin aradan qaldırılmasında əhəmiyyətli rol oynayıb.

Cəlilabadda ilk dəfə olaraq, əksəriyyəti dizaynerlik və 2 qadın kənd təsərrüfatı ixtisaslarını seçməklə Cəlilabad Peşə Təhsil və Təlim Mərkəzində peşə təhsili proqramları üzrə təhsil almaq üçün 21 gənc qadın qeydə alınıb.

Ümumilikdə, Lənkəran iqtisadi rayonunda və Gəncədə həyata keçirilən layihələr sayəsində Cəlilabaddakı Peşə Təhsili və Təlimi Mərkəzində və Gəncədə Peşə Təhsili və Təlimi üzrə Kompetensiya Mərkəzində 54 yeni tədris modulunun tətbiqinə nail olunub.

Cəlilabadda birgə səylər nəticəsində kənd təsərrüfatı və mebel avadanlıqlarının istehsalı sahələrində altı yeni tədris planı və 27 tədris modulu hazırlanıb.

2018 və 2019-cu illər ərzində müəllimlər və kurs təlimatçıları üçün təşkil olunan 22-dən çox təlim proqramı müəllim heyətinin bacarıqlarının inkişaf etdirilməsi və tədris prosesinin əhəmiyyətli dərəcədə təkmilləşdirilməsi ilə nəticələnib.

Azərbaycanda peşə təhsili sisteminin daha da gücləndirilməsini məqsəd kimi qarşıya qoyan bu layihə dövlət-özəl sektor tərəfdaşlığının və yerli müəssisələrlə əməkdaşlığın vacibliyini önə çəkir. Bu öhdəliyə uyğun olaraq, təhsili başa vurmuş tələbələrin sonrakı məşğulluq imkanlarına dəstək göstərmək məqsədilə layihə çərçivəsində bir sıra özəl şirkətlərlə, o cümlədən “Günəşli aqro park”, “Cəlilabad şərab zavodu-2,” “Woodpecker” və “Embawood” şirkətləri ilə anlaşma memorandumu imzalanacaq.

Azərbaycanın peşə təhsili sisteminin gücləndirilməsi və müasirləşdirilməsi məqsədini daşıyan bu müştərək proqram Gəncədə və Cəlilabadda Təhsil Nazirliyi və Peşə Təhsili üzrə Dövlət Agentliyi ilə birgə BMT İnkişaf Proqramı tərəfindən həyata keçirilir.

Lənkəran iqtisadi rayonunda regional PTT Mərkəzinin təsis olunmasına, BMT İnkişaf Proqramının da qismən maliyyələşdirməsi daxil olmaqla, Avropa İttifaqı tərəfindən 1 milyon 444 min 444 avro məbləğində maliyyə vəsaiti ayrılıb.

Tədbir iştirakçıları əsaslı təmirdən sonra istifadəyə verilən peşə təhsili emalatxanasında yaradılan şəraitlə və Peşə Təhsili Mərkəzinin təcrübə sahəsində tələbələrin yetişdirdikləri kənd təsərrüfatı məhsulları ilə tanış olublar.