Ruandada güclü yağışlar nəticəsində 50-yə yaxın insan həlak olub
Bakı, 3 may, AZƏRTAC
Ruandada son iki ayda güclü yağışlar, o cümlədən torpaq sürüşməsi və ildırım vurması nəticəsində 50-yə yaxın insan həlak olub, 79 nəfər isə yaralanıb.
AZƏRTAC “The Star” saytına istinadla xəbər verir ki, fövqəladə halların idarə olunması üzrə nazir Albert Murasira açıqlamasında təxminən 12 nəfərin ildırım vurması, digərlərinin isə dağıntılar nəticəsində öldüyünü bildirib. Nazir 5 minə yaxın sakinin yüksək riskli zonalardan təhlükəsiz ərazilərə təxliyə edidiyini söyləyib.
Məlumatda bildirilir ki, təbii fəlakət infrastrukturlara, o cümlədən evlərə, körpülərə, məktəb binalarına, yollara və əkin sahələrinə ziyan vurub.
Mayın ilk on günündə Ruandanın bəzi bölgələrində güclü yağışların olacağı barədə xəbərdarlıq edilib. Daşqın təhlükəsi olan ərazilərin yaxınlığında yaşayan insanların təxliyə edilməsi tövsiyə olunub.
Xatırladaq ki, ötən ilin may ayında Ruandada daşqınlar və torpaq sürüşmələri nəticəsində 135 nəfər həlak olmuşdu.
Bölmənin digər xəbərləri
