Praqa, 15 noyabr, AZƏRTAC 

Çexiyanın paytaxtı Praqada yerləşən “Lucerna” sarayında, beynəlxalq “Doll Praga 2019” - kuklalar sərgisi açılıb. AZƏRTAC xəbər verir ki, sərgidə tətbiqi sənət nümunəsi sayılan kuklalarla yanaşı, marionet teatrlarında istifadə edilən kuklalar da nümayiş olunub.

Sərgidə 40 ölkədən gələn 130 sənətçi, ziyarətçilərə 1920-1930-cu illərin dəblərinə uyğun geyimdə kuklalar, marionetkalar və oyuncaq əşyalarında yaradıcılıq zövqü əksini tapan başqa əl işləri təqdim ediblər. Sərgidə Azərbaycandan Elmira Abbaslı və Çexiyada yaşayan soydaşımız Vəfa Aşumova da öz əl işlərini nümayiş ediblər.

Sərgi Çexiyanın birinci respublika (1918-1938 illər) dövrünün geyim və aksesuarlarında həyat tərzini nümayiş etmək məqsədi daşıyır.

Vəfa Aşumovanın sözlərinə görə, o, 2010-cu ildə Çexiyaya gələndən bu sənətlə məşğul olur.

“Biz Praqaya yeni köçəndə burada ilk dəfə kukla sərgisinin keçirilməsi haqqında elanla rastlaşdıq. Düşündüm ki, yəqin çox maraqlı sərgi olar və onu ziyarət etdim. Doğrudan da, gördüklərim məni heyran etdi və ürəyimdə bu sənətlə məşğul olmaq qərarına gəldim, başladım məlumat toplamağa. Kitab alırdım, əl işləri satılan mağazalara gedib müvafiq işlərlə tanış olurdum və ondan sonra birinci kuklamı yaratdım. İndiyə kimi o ilk kuklamı evdə xatirə kimi saxlayıram. İndiki sərgidə isə bizim milli geyimdə olan kukla ilə “Doll Prague” kukla sərgisində iştirak edirəm. Mən bütün kukla yaradıcılıq prosesindən zövq alıram. Kuklanın bədənini xüsusi kağız gilindən (ingiliscə: paper clay) düzəldərək onu havada quruduram və o, sanki çox yumşaq taxtaya dönür. Sonra kukla lazımi insan dərisi tonunda boyanır. Paltarın tikilməsi üçün mən yalnız xalis təbii parçalar işlədirəm, xırda naxış və zinət əşyalarını isə Praqada yerləşən antikvar mağazalarında axtarıram”, - deyə V.Aşumova söyləyib.

Pərvanə Qarayeva

AZƏRTAC-ın xüsusi müxbiri

Praqa